MORERI 5

₁O re o tsena mo ntlong ya Modimo o nannabetse lonao lwa gago; gonne go atamela go utlwa, go molemo bogolo go setlhabelo sa dieleele, gonne ga di itse fa di dira bosula. ₂O se ka wa phamoga ka molomo, mme a pelo ya gago e se nne bonako go bua sengwe fa pele ga Modimo; gonne Modimo o kwa legodimong, mme wena o mo lefatsheng; mme ke gone, a mafoko a gago a nne makhutshwane. ₃Gonne toro e tle e tle ka bontsi jwa ditirotiro; le lentswe la seeleele le tla ka bontsi jwa mafoko. ₄Fa o ikanela Modimo ka ikano, o se ka wa diega go e lefa; gonne ga o na kgatlhego mo dieleeleng; o lefe se o ikanneng ka ga sone. ₅Go molemo, go re o se ikane, bogolo go go re o ikane mme o sa lefe. ₆O se ka wa leseletsa molomo wa gago wa leofisa nama ya gago; le gone o se ka wa bua fa pele ga moengele, wa re: “E ne e le timelo;” ana Modimo o ka bo o galefelelang lentswe la gago o ba o senya tiro ya diatla tsa gago? ₇Gonne go tle go dirafale jalo ka ntlha ya bontsi jwa ditoro, le maithamako, le mafoko a mantsi; mme wena, o boife Modimo.

₈Fa o bona patikego ya bahumanegi, le bapatiki ba tlosa katlholo le tshiamiso mo kgaolong nngwe ya lefatshe, o se ka wa gakgamalela selo seo; gonne mongwe yo o godimo ga yo o godimo o etse tlhoko; mme go na le ba ba godimo ga bone.

₉Gape loato lwa mmu ke lwa botlhe; le e leng kgosi ka yosi e direlwa ke masimo.

₁₀Yo o ratang selefera ga a ketla a kgora selefera; le yo o ratang letlotlo ga a ketla a kgora loato; se le sone ke boithamako. ₁₁Fa dilo di ata, ba ba di jang le bone ba ntsifale; mme ke molemo wang mo go mong wa tsone, fa e se go di bona ka matlho fela? ₁₂Boroko jwa motho yo o dirang bo monate, le fa a ja bonnye kgotsa bogolo, mme go kgora ga mohumi ga go mo leseletse go robala.

₁₃Go na le bosula jo bo botlhoko jo ke bo bonyeng tlase ga letsatsi, ke go re dikhumo tse di bolokwang ke mong wa tsone di mo utlwise botlhoko. ₁₄Dikhumo tseo di nyelele ka go welwa ke bosula bongwe; mme fa motho yoo a tshotse ngwana wa mosimane, ga go na sepe mo seatleng sa gagwe. ₁₅Jaaka a dule mo sebopelong sa ga mmaagwe, o tlaa ba a tloga jaaka a tsile, a sa ikatega, mme a se ketla a tsaya sepe ka ga letsapa la gagwe, se o ka tsamayang ka sone a se tshotse mo seatleng. ₁₆Mo le gone ke bosula jo bo botlhoko, go re, mo dilong tsotlhe jaaka a tsile, o tlaa tsamaya fela jalo; mme ka a direla phefo o a ba a na le molemo wang? ₁₇Le gone o tle a jele mo lefifing ka metlha yotlhe ya gagwe, mme a tshwenyege thata, a nne le botlhoko le kgakalo. ₁₈Bonang, mo ke go bonyeng fa go le molemo go bile go le gontle, ke go re motho a je a nwe, a je monate wa letsapa la gagwe lotlhe, le o ineileng letsapa mo go lone tlase ga letsatsi, ka metlha yotlhe ya botshelo jwa gagwe jo Modimo o bo mo neileng; gonne ke yone kabelo ya gagwe. ₁₉Le motho mongwe le mongwe yo Modimo o mo neileng dikhumo le thuo, wa ba wa mo naya thata ya go di ja, le go itseela kabelo ya gagwe, le go itumela mo letsapeng la gagwe; moo, ke neo ya Modimo. ₂₀Gonne ga a ketla a gakologelwa bobe ka metlha ya botshelo jwa gagwe; gonne Modimo o mo fetola mo boitumelong jwa pelo ya gagwe.