DUTERONOME 10

₁“E rile ka baka loo Jehofa a nthaya a re: ‘Ipetlele matlapa a le mabedi a a tshwanang le a ntlha, o tlhatlogele kwano go nna mo thabeng, o bo o itirele letlole la logong. ₂Ke tlaa kwala mo matlapeng a, mafoko a a ne a le mo matlapeng a ntlha a o a thubileng, mme o tlaa a tsenya mo letloleng.’

₃“Jalo ka dira letlole ka mokala, ka betla matlapa a a tshwanang le a ntlha, ka tlhatloga mo thabeng ke tshotse matlapa a mabedi ka seatla. ₄Mme a kwala mo matlapeng, jaaka go kwalwa ga ntlha, ditaolo tse some, tse Jehofa o ne a di buile le lona mo thabeng a le mo gare ga molelo ka letsatsi la phuthego, mme Jehofa a a nneela. ₅Ka retologa ka fologa mo thabeng, ka tsenya matlapa mo letloleng le ke ne ke le dirile; ke gone kwa a gone jaaka Jehofa a ntaotse.” ₆Bana ba Iseraele ba bothologa ba tswa Beerothe-bene-jaakane ba ya kwa Mosera; Arone a swela gone, a ba a fitlhwa gone; mme Eleasare morwawe a direla mo tirong ya boperesiti mo boemong jwa gagwe.

₇Go tloga foo ba etela kwa Gutegota; go tswa Gutegota ba ya kwa Jotebatha, lefatshe la dinokana tsa metsi. ₈Ya re ka baka loo Jehofa a lomolola lotso lwa ga Lefi, go tla ba rwala letlole la kgolagano ya ga Jehofa, le go ema fa pele ga Jehofa go mo direla, le go segofatsa ka leina la gagwe, nako e sa le eno. ₉Ke gone ka moo Lefi o se nang kabelo le fa e le boswa mo baneng ba ga rraagwe; Jehofa ke ene boswa jwa gagwe, jaaka Jehofa Modimo wa gago a ne a bua nae.

₁₀“Ka tlhola mo thabeng, jaaka ga ntlha, malatsi a le 40 le masigo a le 40, mme Jehofa a ntlheetsa le ka lone lobaka loo; Jehofa a se ka a ikutlwa go go senya. ₁₁Jehofa a ntlhaya a re: ‘Nanoga, o etelele tšhaba e pele; ba tlaa tsena ba ya go rua lefatshe le ke le ikanetseng borra ba bone go le ba naya.’

₁₂“Jaana wena Iseraele, ana Jehofa Modimo wa gago o lopang mo go wena, fa e se gore o boife Jehofa Modimo wa gago, go sepela mo ditseleng tsotlhe tsa gagwe, le go mo rata, le go direla Jehofa Modimo wa gago ka pelo yotlhe ya gago le ka mowa otlhe wa gago. ₁₃Go tshegetsa ditaolo tsa ga Jehofa, le ditao tsa gagwe, tse ke di go laolelang gompieno, gore go nne molemo mo go wena? ₁₄Bona, legodimo ke la ga Jehofa Modimo wa gago, le legodimo la magodimo, le lefatshe le tsotlhe tse di mo go one. ₁₅Jehofa o ne a kgatlhega fela mo go borraeno go ba rata, a itshenkela losika lwa bone morago ga bone, e bong lona, mo ditšhabeng tsotlhe jaaka go ntse gompieno. ₁₆Ke gone rupisang dipelo tsa lona, mme lo se tlhole lo nna thamo di thata. ₁₇Gonne Jehofa Modimo wa lona ke one Modimo wa medimo le Morena wa barena, Modimo o mogolo o o nonofileng, o o boitshegang, o o sa tlhokomeleng bomangmang jwa batho, le fa e le go amogela tuelo. ₁₈O dirisetsa masiela le mosadi wa motlholagadi katlholo, o rata moeng ka go mo naya dijo le diaparo. ₁₉Ke gone lo rateng moeng, gonne lo ne lo le baeng mo lefatsheng la Egepeto. ₂₀O boife Jehofa Modimo wa gago; o direle ene; o ngaparele ene, o ikane ka leina la gagwe. ₂₁Ke ene pako ya gago, ke ene Modimo wa gago o o go diretseng dilo tse dikgolo tse di boitshegang tse, tse matlho a gago a di bonyeng. ₂₂Borraeno ba ne ba fologela kwa Egepeto, e le batho ba le 70 fela; jaanong Jehofa Modimo wa gago o go dirile jaaka dinaledi tsa legodimo ka bontsi.