AMOSE 8

₁Morena Modimo a ntshupetsa se: Ka bona seroto sa loungo lwa letlhabula. ₂Mme a re: “Amose, o bonang?” Ka re: “Ke bona seroto sa loungo lwa letlhabula.” Foo Jehofa a nthaya a re: “Bokhutlo bo tsile mo bathong ba me Baiseraele; ga nketla ke tlhola ke ba feta gope. ₃Dipina tsa tempela e tlaa na dipokolelo mo motlheng oo,” go bua Morena Modimo: “Ditoto di tlaa nna dintsi; gongwe le gongwe ba tlaa di latlhela kwa ntle ba tuuletse fela.”

₄Utlwang se, lona ba lo ratang go kometsa batlhoki, le go tlhokafisa bahumanegi ba lefatshe, ba lo reng: ₅“Go rogwa ga kgwedi go tlaa feta leng, gore re tle re rekise mabele? Le sabata, gore re tle re beye mabele mo paananeng? Ka go dira seelo sa emere se nne sennye, le šekela se nne segolo, ka go ferekana ka tsietso ka dilekanyo tsa pego tsa tsietso; ₆gore re tle re reke bahumanegi ka selefera, le motlhoki ka ditlhako tse pedi, re be re rekise mapapa a mabele.” ₇Jehofa o ikanne ka tlotlomalo ya ga Jakobe, a re: “Ruri ga nketla ke lebala gope ditiro dipe tsa bone. ₈A lefatshe ga le ketla le roromela mo, le mongwe le mongwe yo o agileng teng a sula pelo? Ee, le tlaa gogomoga lotlhe jaaka noka; le gone le tlaa rwalelesega le ba le kokobela gape, jaaka noka ya Egepeto. ₉Go tlaa dirala mo motlheng oo,” go bua Morena Modimo, a re: “Ke tlaa phirimisa letsatsi go le motshegare o mogolo, ke tlaa fifatsa lefatshe go le motshegare o o phepa. ₁₀Ke tlaa fetola mediro ya lona telo, le dipina tsotlhe tsa lona khutsafalo; ke tlaa baya letsela la kgetse mo dithekeng tsotlhe, le logatadima mo ditlhogong tsotlhe; ke tlaa go dira gore go nne jaaka fa go lelelwa ngwana wa mosimane yo o esi, le bokhutlo jwa gone gore e nne motlha o o galakang.

₁₁“Bonang metlha e etla,” go bua Morena Modimo: “Ke tlaa tsosa leuba mo lefatsheng, e seng leuba la dijo le fa e le lenyora la metsi, fa e se leuba la go utlwa lefoko la ga Jehofa. ₁₂Ba tlaa kailakaila ba tswe lewatleng ba ye lewatleng, ba tswe botsheka ba ye fela kwa botlhabatsatsi; ba tlaa nna ba tabogela kwa le kwa ba senka lefoko la ga Jehofa, mme ga ba ketla ba le bona.

₁₃“E tlaa re mo motlheng oo makgarebane a mantle le makau a tlaa idibadiwa ke lenyora. ₁₄Bone ba ba ikanang ka seleo sa Samaria ba re: ‘Jaaka Modimo wa gago, Dane, o tshedile’; le go re: ‘Jaaka tsela ya Beerešeba e tshedile’; le e leng bone ba tlaa wa, mme ga ba ketla ba tlhola ba tsoga.”