DITIRO 14

₁Ga dirala ya re mo Ikonio, ba tsena mmogo mo ntlong ya thuto ya Bajuta, mme ba bua thata, ga ba ga tla ga dumela bontsi jo bogolo jwa Bajuta le jwa Bagerika. ₂Bajuta ba ba ganang go utlwa ba hudua dipelo tsa Baditšhaba, ba ba tlhoisa bakaulengwe. ₃Mme ba diega ka lobaka lo loleele teng, ba bua ka pelokgale mo Moreneng, Morena a supa ka ga lefoko la tshegofatso ya gagwe, a ba naya gore ditshupo le dikgakgamatso di dirwe ka diatla tsa bone. ₄Batho ba bantsi ba motse ba ne ba kgaoganye; bangwe ba tshaba le Bajuta, ba bangwe le baaposetole.

₅Ya re ba tsogelwa ke ntwa ya Baditšhaba le Bajuta, ba na le balaodi ba bone, ba re ba ya go ba gagautla mo go tlhabisang ditlhong, le go ba kgobotletsa ka maje, ₆ba ba tlhalefa, ba tshabela kwa metseng ya Lukaonia, e bong kwa Lusetera le Derebe, le kwa lefatsheng mo tikologong ya metse eo; ₇ba rera Mafoko a a Molemo teng.

₈Mo Lusetera ga bo go dutse monna mongwe yo o palelwang ke dinao, o sa le a nnana a sa tswa sebopelong sa ga maagwe, yo o iseng a ke a tsamaye gope ka dinao. ₉Ene yo, a utlwa Paulo a bua; yo e rile a tsepega matlho mo go ene, a fitlhela a na le tumelo ya go fodisiwa. ₁₀A bua ka lentswe le le godileng a re: “Ema ka dinao, o thokgame!” Mme a tsapoga a tsamaya ka dinao. ₁₁E rile matshutitshuti a batho a bona se Paulo o se dirileng, ba tlhatlosa mantswe, ba bua ka puo ya Selukaonia, ba re: “Medimo e fologetse mo go rona ka setshwano sa batho.” ₁₂Ba raya Barenabase leina ba re, Jupitere, Paulo ba re, Merekurio, ka e le ene mmui yo mogolo. ₁₃Moperesiti wa ga Jupitere, yo tempele ya gagwe e leng fa pele ga motse, a lere dikgomo le mekgabo ya ditšheše fa dikgorong tsa motse, mme a rata go isa setlhabelo le matshutitshuti a batho.

₁₄E rile baaposetole, Barenabase le Paulo, ba utlwa jalo, ba ikgagola diaparo, ba tlolela mo bontsing ba goa, ₁₅ba re: “Banna, lo direlang dilo tse? Le rona re batho ba re nang le maikutlo a a etsang a lona, re lo leretse Mafoko a a Molemo a go re, lo tlogele dilo tse tsa boithamako, lo sokologele mo Modimong o o tshedileng, o o dirileng legodimo le lefatshe le lewatle, le tsotlhe tse di mo go tsone; ₁₆o e rileng mo metlheng ya ditshika tse di fetileng wa lesa ditšhaba tsa sepela mo ditseleng tse e leng tsa tsone fela. ₁₇Le fa go ntse jalo wa se ka wa nna fela o se na sesupo, ka o ne o ntse o dira molemo, wa lo nesetsa dipula tse di tswang mo legodimong, wa lo naya metlha ya maungo, wa tlatsa pelo tsa lona ka dijo le boitumelo.”

₁₈Mme le fa ba bua mafoko a a ntseng jaana, go batlile go retela go thiba batho ba bantsi, gore ba se ba isetse setlhabelo.

₁₉Ga goroga Bajuta ba ba tswang Antioke le Ikonio; e rile ba sena go kgona matshutitshuti a batho, ba kgobotletsa Paulo ka maje, ba mo gogela kwa ntle ga motse, ba ithaya ba re o sule. ₂₀Ya re barutwa ba sa ntse ba mo dikanyeditse a tsoga, a tsena mo motseng; ya re ka moso a tswa a ya le Barenabase kwa Derebe.

₂₁Ya re ba sena go rera Mafoko a a Molemo mo motseng oo, mme ba dirile barutwa ba le bantsi, ba boela kwa Lusetera, le kwa Ikonio le kwa Antioke. ₂₂Ba nitimisa mewa ya barutwa, ba ba laya, gore ba nnele ruri mo tumelong, ba re: “Re na le go tsena mo bogosing jwa Modimo ka dipitlagano di le dintsi.” ₂₃E rile ba sena go ba laolela bagolwane mo phuthegong nngwe le nngwe, le go rapela, ba ithibile mo dijong, ba ba neela Morena yo ba dumetseng mo go ene.

₂₄Ba ralala Pisidia, ba tla ba fitlha mo Pamfilia. ₂₅Ya re ba sena go bolela lefoko mo Perega, ba fologela kwa Atalia; ₂₆mme ba tswa teng ka sekepe ba ya kwa Antioke, kwa ba kileng ba neelwa mo tshegofatsong ya Modimo teng, gore ba ye tirong e jaana ba e weditseng.

₂₇E rile ba sena go fitlha, ba phuthile phuthego, ba bolela dilo tsotlhe tse Modimo o di dirileng nabo, le ka fa o phunyeditseng Baditšhaba kgoro ya tumelo ka teng. ₂₈Mme ba diega ka lobaka lo loleele le barutwa.