DITIRO 12

₁Jaana e rile ka lobaka loo, kgosi Herote a ntshetsa bangwe ba phuthego mabogo a gagwe go ba utlwisa botlhoko. ₂A bolaya Jakobe mogoloa Johane ka tšhaka. ₃Ya re a bona fa go kgatlhile Bajuta, a tswelela pele, a tshwara le ene Petere. Mme malatsi ao ya bo e le a senkgwe se se sa bedisiwang. ₄Ya re a sena go mo tshwara, a mo tsenya mo ntlong ya kgolegelo, a mo laolela ditlhophana di le nne tsa batlhabani, tse di batho ba le bane gore ba mo dise; a ikaeletse gore e tlaa re Tlolaganyo e sena go feta a mo ntshetse mo bathong. ₅Petere a tswalelwa jalo mo ntlong ya kgolegelo; mme a direlwa thapelo ke phuthego ka tlhaofalo fa pele ga Modimo.

₆E rile fa Herote a tlaa tloga a mo ntsha, Petere a bo a robetse fa gare ga batlhabani ba le babedi sigong joo, a golegilwe ka diketane di le pedi, balebedi le bone ba le fa mojakong, ba disitse ntlo ya kgolegelo. ₇Mme bonang, moengele wa Morena a ema fa go ene, le lesedi la phatsima mo ntlong ya kgolegelo; a batola Petere fa lotlhakoreng, a mo tsosa, a re: “Tsoga ka bonako.” Diketane tsa wa mo mabogong a gagwe. ₈Moengele a mo raya a re: “Itlame, o rwale ditlhako.” Mme a dira jalo. A mo raya a re: “Apara kobo ya gago o ntshale morago.” ₉A tswela kwa ntle, a mo sala morago; mme a bo a sa itse fa e le ammaaruri mo go dirilweng ke moengele, a itlhoma a bona ponatshegelo fela. ₁₀Ya re ba sena go feta ba tebelo ya ntlha le ya bobedi, ba fitlha fa setswalong sa tshipi sa mojako o o tswelang mo motseng; mme sa ba ipulela fela ka sosi; ba tswela kwa ntle, ba feta ka mmila o mongwe, mme moengele a itse go kgaogana nae.

₁₁E rile Petere a sena go itharabologelwa, a re: “Jaana ke a itse fa ruri Morena a romile moengele wa gagwe go tla go nkgolola mo seatleng sa ga Herote, le mo tebelelong yotlhe ya batho ba Bajuta.”

₁₂Ya re a sena go akanya selo se, a ya kwa ntlong ya ga Maria, mma Johane, yo o bidiwang Mareko; mme batho ba le bantsi ba bo ba phuthegetse teng, ba rapela. ₁₃Ya re a kgwanyakgwanya setswalo sa kgoro, lelata lengwe, yo go tweng Rota a ya go reetsa. ₁₄Ya re a lemoga lentswe la ga Petere, a se ka a bula ka ntlha ya boitumelo, a tabogela mo teng, a bolela fa Petere a ema fa kgorong. ₁₅Mme ba mo raya ba re: “O a tsenwa.” Mme ene a tlhomamisa thata fa go ntse fela jalo. Ba re: “E tlaa bo e le moengele wa gagwe.”

₁₆Mme Petere a nna a kgwanyakgwanya; ya re ba sena go bula, ba mmona, ba gakgamala. ₁₇Ene, e rile a sena go ba gwetlha ka seatla, gore ba didimale, a ba bolelela ka fa Morena o mo ntshitseng mo ntlong ya kgolegelo ka gone. A ba raya a re: “Lo bolelele Jakobe le bakaulengwe.” Foo a tsamaya, a ya felong go sele. ₁₈Jaana, ya re bosa boo sa, ga nna kwalanyo e kgolo mo batlhabaning, ya go re Petere o ile kae. ₁₉E rile Herote a sena go mmatla, mme a sa mmone, a kolotisa balebedi, mme a laola gore ba bolawe. Mme ene a tloga mo Jutea a fologela kwa Kaesarea, a ya a diega teng.

₂₀Jaana o ne a kgopilwe thata ke ba Ture le Sitone; mme ba tla mo go ene ka bongwe fela jwa pelo; mme e re ka ba ntshitse Belaseto molebalebedi wa kgosi tsala ya bone, ba lopa kagiso, ka lefatshe la bone le otlwa ke lefatshe la kgosi.

₂₁Ya re ka letsatsi lengwe le le laotsweng, Herote a ikgabisa ka diaparo tsa segosi, mme a dula mo setulong sa bogosi, a laya batho ka puo e kgolo. ₂₂Batho ba thela lošalaba ba re: “Ke lentswe la modimo mongwe, ga se la motho.” ₂₃Ka bonako moengele wa Morena a mo itaya, ka a sa neye Modimo tlotlo; mme a jewa ke diboko, a swa.

₂₄Mme lefoko la Modimo la tota, la ata.

₂₅Barenabase le Saule ba boa kwa Jerusalema, ba sena go wetsa tirelo ya bone, ba tla le Johane yo o bileng a bidiwa Mareko.