Petere le Korenelio
1Jaana ga bo go le monna mongwe mo Kaesarea, leina la gagwe go twe Korenelio, e le molaodi wa mophato o go tweng wa Itale. 2E le motho yo o dumelang, le yo o boifang Modimo, le ka botlhe ba ntlo ya gagwe, yo o bileng a fa batho thata, a rapela Modimo ka metlha yotlhe. 3E rile ka lobaka lo e ka neng e le lwa nako ya boraro, ya motshegare wa maitseboa, a bona sentle ka ponatshegelo moengele wa Modimo a tsena kwa go ene, a mo raya a re: “Korenelio.”
4Ene ya re a tsepega matlho mo go ene, ka a boifa a re: “Ke eng, Morena?” A mo raya a re: “Merapelo ya gago, le dikatso tsa gago di tlhatlogile, di ile go nna segopotso fa pele ga Modimo. 5Jaana, roma batho kwa Jopa, ba ye go lere mongwe yo go tweng Simone, yo o okeleditsweng leina la Petere. 6O nna mo goo rra Simone, mosugi wa matlalo, yo ntlo ya gagwe e fa lewatleng.” 7E rile moengele yo o buileng nae a sena go tsamaya, a bitsa batlhanka ba gagwe ba le babedi, ba na le motlhabani yo o dumelang, e le wa ba ba tleng ba mo direle ka gale; 8ya re a sena go ba bolelela gotlhe, a ba roma kwa Jopa.
9Jaana ya re ka moso, bone ba mo loetong lwa bone, ba atametse motse, Petere a tlhatlogela kwa godimo ga ntlo a ya go rapela, e ka ne e le ka lobaka lwa nako ya 12 ya motshegare o mogolo. 10Mme a bolawa ke tlala, a eletsa ga ja; ya re ba sa ntse ba baakanya, ya ne e kete o welwa ke tsitego ya pelo. 11A bona legodimo le atlhamologa, le setsholo sengwe se fologa e kete letsela le legolo, le lepeleditswe ka dinaka tsoo nne, le fitlha fa fatshe. 12Mo go lone ga bo go le dingwe tsa ditshedi tsotlhe tse di maoto mane, le dilo tse di gagabang tsa lefatshe, le dinonyane tsa loapi. 13Mme ga tla lentswe kwa go ene la re: “Tsoga Petere; tlhaba o je.”
14Mme Petere a re: “A go se nne jalo Morena; gonne ga ise nke ke je gope se e leng selo fela, le fa e le se se sa itshekang.”
15Mme lentswe la ba la tla kwa go ene lwa bobedi la re: “Se Modimo o se ntlafaditseng, o se ka wa se kaya selo fela.” 16Mme mo ga dirwa gararo, setsholo seo sa tloga sa tsholelwa kwa legodimong.
17Ya re Petere a ntse a akabetse thata, gore ponatshegelo e o e bonyeng e ka ne e kayang, bonang banna ba ba romilweng ke Korenelio, ka ba boditse ntlo ya ga Simone, ba bo ba eme fa mojakong. 18Ba bitsa, ba botsa gore a Simone, yo o okeleditsweng leina la Petere, a o ntse teng?
19E rile Petere a sa ntse a akanya ponatshegelo, Mowa wa mo raya wa re: “Bona, banna ba le bararo ba a go batla. 20Nanoga o fologe, o ye nabo o sa belaele sepe; gonne ke ba romile.” 21Petere a fologela kwa banneng, a re: “Bonang, ke nna yo lo mmatlang; ke eng se lo se tletseng?”
22Ba re: “Korenelio, molaodi wa mophato, e le motho yo o siameng, yo o boifang Modimo, yo o bolelwang ka molemo ke morafe wa Bajuta, o ne a tlhagisiwa ke Modimo ka moengele yo o boitshepo, gore a rome a go biletse kwa ntlong ya gagwe, gore a utlwe mafoko mo go wena.” 23Jalo a ba raya a re, ba tsene mo teng, mme a ba latsa teng. Ya re ka moso a tsoga a bolola nabo, le bangwe ba bakaulengwe ba ba mo Jopa ba ya nae. 24Ya re ka moso o mongwe ba tsena mo Kaesarea. Mme Korenelio a bo a ba lebeletse, a bile a phuthile ba ga gabo le ditsala tsa gagwe tse dikgolo. 25Ga dirala ya re Petere a tsena, Korenelio a mo kgatlhantsha, a wela fa dinaong tsa gagwe, a mo obamela. 26Mme Petere a mo kakatlolola, a re: “Ema, le nna ka nosi ke motho.” 27Ya re a ntse a bua nae, a tsena, mme a fitlhela batho ba le bantsi ba phuthegile. 28A ba raya a re: “Le lona ka losi lo a itse, jaaka e le mo go sa letlelelwang motho yo e leng Mojuta, fa a ka ikopanya le mongwe wa morafe o sele, le fa e le go tsena kwa go ene; le fa go ntse jalo Modimo o nkaetse gore ke se ka ka raya ope ka re, motho fela, kgotsa ka re, ga a a itsheka. 29Ke gone e rileng ke ile go bidiwa, ka tla fela ke se na kgang. Ke a botsa ka re, lo mpileditse eng?”
30Mme Korenelio a re: “E rile maloba ka bo ke dira thapelo ya nako ya boraro maitseboa mo ntlong ya me; mme bonang, motho a ema fa pele ga me, a le diaparo tse di galalelang. 31A re: ‘Korenelio, thapelo ya gago e utlwilwe, le dikatso tsa gago di a gakologelwa fa pele ga Modimo. 32Ke gone, roma kwa Jopa, o ye go bitsa Simone, yo o okeleditsweng leina la Petere; o nna mo ntlong ya ga Simone mosugi wa matlalo, fa lewatleng.’ 33Mme ka akofa ka roma kwa go wena; mme o jahile o tle. Ka re, re fano rotlhe fa pele ga Modimo, gore re utlwe dilo tsotlhe tse o di laoletsweng ke Morena.”
Petere o bua mo ntlong ya ga Korenelio
34Petere a tswa molomo a bua a re: “Ammaaruri ke a lemoga fa Modimo e se motlhaodi wa batho; 35mo merafeng yotlhe, yo o boifang one, a ba a dira tshiamo, o a lebosega mo go one. 36Lefoko le o le rometseng bana ba Iseraele, o bolela Mafoko a a Molemo a kagiso ka Jesu Keresete – ke ene Morena wa botlhe – 37ka re lefoko leo, le lona lo a le itse, le le boletsweng mo lefatsheng lotlhe la Jutea, go simolola kwa Galilea, morago ga kolobetso e Johane o e rerileng; 38ke raya Jesu wa Nasaretha, jaaka Modimo o mo tloditse ka Mowa o o Boitshepo le ka nonofo, yo o ne a nna a dikologa a dira molemo, a fodisa botlhe ba ba patikwang ke diabolo; gonne Modimo o ne a na nae. 39Re basupi ba dilo tsotlhe tse o di dirileng mo lefatsheng la Bajuta le mo Jerusalema; yo ba bileng ba mmolaile ka go mo pega mo setlhareng. 40Ene Modimo o mo tsositse ka letsatsi la boraro, mme wa mo naya gore a bonadiwe; 41e seng mo bathong botlhe, fa e se mo basuping ba ba itshenketsweng gale ke Modimo, e bong mo go rona ba re jeleng, ra nwa nae a sena go tsoga mo baswing. 42Mme a re laya gore re rerele batho, re supe fa yo e le ene yo o laotsweng ke Modimo, gore a nne moatlhodi wa batshedi le baswi. 43Ke ene yo baperofeti botlhe ba supang ka ga gagwe, fa mongwe le mongwe yo o dumelang mo go ene a tlaa bona boitshwarelo jwa dibe ka leina la gagwe.”
Baditšhaba ba amogela Mowa o o Boitshepo
44Ya re Petere a sa ntse a bua mafoko a, Mowa o o Boitshepo wa wela botlhe ba ba utlwang lefoko. 45Ba bogwera ba ba dumetseng, ba gakgamala thata, e bong ba ba tsileng le Petere, ka gobo neo ya Mowa o o Boitshepo e gorometditswe le mo go Baditšhaba. 46Gonne ba ba utlwa ba bua ka dipuo di sele, ba baka Modimo. 47Foo Petere a bua a re: “A mongwe o ka itsa metsi, gore batho ba ba se kolobediwe, ba ba amogetseng Mowa o o Boitshepo jaaka rona?” 48Mme a laola gore ba kolobediwe mo ineng la ga Jesu Keresete. Ba mo rapela gore a tlhole malatsi mangwe teng.
