Mafoko a bofelo a ga Dafite
1Jaana a, ke mafoko a bofelo a ga Dafite; Dafite morwa Jese a bua, monna yo o ne a golelediwa kwa godimo a re: Motlodiwa wa Modimo wa ga Jakobe, le mokwadi yo o rategang wa dipesalema tsa Iseraele; a re:
2“Mowa wa ga Jehofa
o ne wa bua ka nna,
lefoko la gagwe
le ne le le mo lolemeng lwa me.
3Modimo wa Iseraele o rile,
yo e leng Lefika la Iseraele
o buile le nna;
a re: Motho yo o busang batho ka
tshiamo,
yo o busang mo poifong
ya Modimo,
4o tlaa nna jaaka lesedi la bosa
fa letsatsi le tlhaba,
e le moso o o se nang maru;
fa bojang jo botalana
bo tswetswena mo mmung,
ka phatsimo e e phepa
morago ga pula.
5Ruri ntlo ya me
ga e a nna jalo le Modimo;
le fa go ntse
o dirile le nna kgolagano
e e sa khutleng,
e e rulagantsweng
mo dilong tsotlhe,
e e tlhomameng;
gonne ke poloko yotlhe ya me,
keletso yotlhe ya me,
le fa o sa e tswedisetse pele.
6Mme baikepi botlhe
ba tlaa nna jaaka mitlwa
e e nang le go kgoromediwa fela,
ka e sa kake ya tshwarwa
ka letsogo;
7Mme monna yo o e amang
o na le go e tshola
ka selepe le ngakale;
mme e tlaa fisediwa ruri
ke molelo mo felong ga yone.”
Batlhabani ba diganka ba ga Dafite
8A, ke maina a batho ba ba diganka ba Dafite o ne a na nabo; Jošebebašebethe wa Motakemone, mogolwane wa balaodi ba mephato; ga bo go le Adino wa Moesene le ene, yo o ne a tlhabana le batho ba le 800, mme ba bolaelwa gongwe fela.
9Morago ga gagwe ga nna Eleasare morwa Dotai morwa motho wa Moahohi, mongwe wa banna ba bararo ba diganka ba ba kileng ba nna le Dafite, jale ka ba kgoba Bafilisitia ba ba neng ba phuthegetse go tlhabana, mme banna ba Iseraele ba ne ba tsamaile. 10Ene a nanoga a kgemetha Bafilisitia ga tsamaya letsogo la gagwe la lapa, le seatla sa gagwe sa huparela tšhaka; Jehofa a dira phenyo e kgolo ka tsatsi leo; batho ba bowa ba tla morago ga gagwe, ba tla go thopa fela.
11Yo o ne a rulagana nae e ne e le Shama morwa Agee wa Moharare. Bafilisitia ba ne ba phuthegile ba le lesomo kwa go ne go na le sebata sa lefatshe gone se se tletseng lotlhodi; mme batho ba tswa ba tshaba Bafilisitia. 12Ene a ema fa gare ga sebata seo, a se tlhabanela, a bolaya Bafilisitia; mme Jehofa a dira phenyo e kgolo.
13Batho ba le bararo mo bagolwaneng ba ba 30 ba ya, ba fitlha kwa go Dafite kwa logageng lwa Adulame, mo motlheng wa thobo; lesomo la Bafilisitia le ne le thibeletse mo molapong wa Refaime. 14Ya re mo lobakeng loo Dafite a bo a le mo kagong e e thata, setlhopha sa masole a Bafilisitia se le mo Bethelehema. 15Dafite o ne a na le tlhologelelo ya go re a bo mongwe a ka ka a nnosa metsi a sediba sa Bethelehema, se se fa kgorong! 16Banna ba bararo ba ba diganka ba thobeselela ntwa ya Bafilisitia, ba ya ba ga metsi mo sedibeng sa Bethelehema, se se neng se le fa kgorong, ba a tsaya ba a isa kwa go Dafite; mme a gana go a nwa, a a tsholela fa pele ga Jehofa. 17A re: “A go nne kgakala le nna, Jehofa, fa nka dira seo se; a ke tlaa nwa madi a banna ba ba tsamaileng ba le mo pitlaganong ka ga botshelo jwa bone?” Ke gone ka moo a gana go nwa. Dilo tse banna ba bararo ba ba diganka ba di dirile.
18Abišai, monnaa Joabe, morwa Seruja, e ne e le mogolo wa ba bararo, a tsholeletsa batho ba ba 300 lerumo la gagwe, a ba bolaya, mme a bona leina mo go ba bararo. 19A ga e ne e le ene yo o tlotlego bogolo mo go ba bararo? Ke gone ka moo a beewa molaodi wa bone; le fa go ntse jalo ga a ka a fitlha mo borarong jwa ntlha.
20Benaia morwa Joiata, morwa monna yo o pelokgale wa Kabeseele, yo o ne a dirile ditiro tse dikgolo, a bolaya bomorwa Ariele wa Moabe boo babedi; le gone a fologa a ya a bolaya tau mo gare ga mokole, go le kapoko; 21a bolaya Moegepeto, e le monna yo o bopegileng sentle; Moegepeto o ne a tshotse lerumo; ene a fologela kwa go ene a tshotse tsamma fela, a phamola lerumo mo seatleng sa Moegepeto, a mmolaya ka lerumo la gagwe. 22Benaia morwa Joiata a dira dilo tse, mme a dirana le leina mo banneng ba bararo ba diganka. 23O ne a le tlotlego bogolo go ba ba 30, mme a se ka a fitlha mo borarong jwa ntlha. Dafite a mmaya molaodi wa balebedi ba gagwe.
24Asahele monnaa Joabe e ne e le mongwe wa ba ba 30; Elehanane morwa Toto wa Betheleheme;
25Shama wa Moharote, Elika wa Moharote;
26Helese wa Mopalete, Ira morwa Ikeše wa Motekoa;
27Abiesere wa Moanathothe, Mebunai wa Mokušathe;
28Salemone wa Moahohe, Maharai wa Monetofa;
29Helebe morwa Baana wa Monetofa, Itai morwa Ribai wa Gibea wa bana ba Benjamine;
30Benaia wa Mopirathone, Hitai wa dinokana tsa Gaaše;
31Abi-alebone wa Moareba, Asemafethe wa Mobarahume;
32Eliahaba wa Mošalebona, bomorwa Jašene, Jonathane;
33Shama wa Moharare, Ahiame morwa Sharare wa Moharare;
34Elefelete morwa Ahasebai, morwa motho wa Momaakathe, Eliame morwa Ahithofele wa Mogilo;
35Hesero wa Mokaremele, Paarai wa Moarebe;
36Igale morwa Nathane wa Soba, Bani wa Mogate;
37Seleke wa Moamone, Naharai wa Mobeerothe, e le batshola dibolao ba ga Joabe morwa Seruia;
38Ira wa Moithire, Garebe wa Moithire;
39Uria wa Mohite: batho ba le 37 fa ba le mmogo.
