Dafite le Siba
1E rile Dafite a sena go fapaanya tlhora ya thota go le gonnye, Siba motlhanka wa ga Mefibošethe a mo kgatlhantsha, a na le diesele di le pedi di belesitswe bosale, di belege dinkgwe di le 200, le marose a le lekgolo a ditshwabi tsa mefine, le maungo a letlhabula a le lekgolo, le mofalo wa bojalwa jwa mofine. 2Kgosi ya raya Siba ya re: “O kayang ka dilo tse?” Siba a re: “Diesele ke tsa go palangwa ke ba ntlo ya kgosi; senkgwe le muango a letlhabula ke a go jewa ke makau; bojalwa jwa mofine ke jwa go nowa ke ba ba lapileng mo nageng.”
3Kgosi ya re; “Morwa mong wa gago o kae?” Siba a raya kgosi a re: “Bona, o ntse kwa Jerusalema; gonne o rile: ‘Gompieno ba ntlo ya Iseraele ba tlaa nthebolela bogosi jwa ga rre.’ ”
4Foo kgosi ya raya Siba ya re: “Bona, tsotlhe tse e leng tsa ga Mefibošethe ke tsa gago.” Siba a re: “Ke a ikoba; a ke bone tsalano mo matlhong a gago, kgosi, morena wa me.”
Dafite le Shimei
5E rile kgosi Dafite a fitlha kwa Bahurime, bonang, ga tswa monna gone e le wa losika lwa ntlo ya ga Saule, leina la gagwe e ne e le Shimei, morwa Gere; a tswa, a tla a ntse a hutsa. 6A konopa Dafite, le batlhanka botlhe ba kgosi Dafite ka maje; mme batho botlhe, le ba ba diganka botlhe ba bo ba mo potile ka fa ntlheng ya le legolo le ya la molema. 7Shimei a re a hutsakanya a bua jaana a re: “Ga! Ga! Monna yo o tshololang madi ke wena, monna yo o seramatla ke wena; 8Jehofa o buseditse mo go wena madi otlhe a ba ntlo ya ga Saule, yo o busang mo boemong jwa gagwe; Jehofa o tsentse bogosi mo seatleng sa ga Abesalome morwao; bona, o tshwerwe mo bosuleng jwa gago ka o le monna yo o tshololang madi.”
9Foo ga bua Abišai morwa Seruja le kgosi, a re: “Ana ntša e e suleng e, e hutsetsang kgosi morena wa me? Ke a go rapela, mma ke kgabaganye ke ye go mo kgaola tlhogo.”
10Mme kgosi ya re: “Ke dirang ka lona bomorwa Seruja? E re ka a hutsakanya, le ka Jehofa a mo reile a re: ‘Hutsa Dafite;’ e mang yo o tlaa reng: ‘Ana o direlang jalo?’ ” 11Dafite a raya Abišai le batlhanka botlhe ba gagwe a re: “Bonang, morwaake yo o duleng mo mmeleng wa me, o batla go mpolaya; bogolo jang motho yo wa Mobenjamine a ga ka ke a dira jalo? Mo leseng, lo mme a hutsakanye; gonne Jehofa o mo laotse. 12E tle e re gongwe Jehofa a lebe tshiamololo e ke e direlwang, le go re Jehofa a ntefele ka molemo mo boemong jwa go mphutsa ga gagwe gompieno.” 13Dafite le banna ba gagwe ba feta le tsela; Shimei a tsamaya fa mofapheng wa thabana bolebagana nae, a eta a hutsakanya, a mo konopa ka maje, a kubisa lorole. 14Kgosi le batho botlhe ba ba nang nayo ba fitlha ba lapile; mme kgosi ya itapolosa gone.
Abesalome kwa Jerusalema
15Abesalome, le batho botlhe, e bong banna ba Iseraele, ba tla mo Jerusalema le Ahithofele a na nabo. 16Ga dirala, e rile Hušai wa Moareke, tsala ya ga Dafite, a tsile mo go Abesalome, Hušai a raya Abesalome a re: “A Modimo o boloke kgosi! A Modimo o boloke kgosi!”
17Abesalome a raya Hušai a re: “A jo ke jone botsalano jwa gago le tsala ya gago? O ne o sa eleng le tsala ya gago?”
18Hušai a raya Abesalome a re: “Nnyaa; yo Jehofa, le batho ba, le tšhaba e, le banna botlhe ba Iseraele ba mo itshenketseng, ke ene yo ke tlaa nnang wa gagwe, ke ene yo ke tlaa nnang nae. 19Gape ke tshwanetse ka bo ke direla mang? A ga ke a tshwanela go direla fa pele ga morwawe? Jaaka ke diretse fa pele ga rraago, ke tlaa nna fela jalo fa pele ga gago.”
20Foo Abesalome a bua le Ahithofele a re: “Re gakololeng ka fa re tlaa dirang ka gone.”
21Ahithofele a raya Abesalome a re: “Tsena kwa bagadingwaneng ba ga rraago, ba o ba tlogetseng go lebela ntlo; mme Baiseraele botlhe ba tlaa utlwa fa o nkgela rraago sebodu; foo mabogo a botlhe ba ba nang nao a tlaa thatafala.” 22Ba tsharololela Abesalome mogope mo godimo ga ntlo; Abesalome a tsena kwa bagadingwaneng ba ga rraagwe mo ponong ya Baiseraele botlhe.
23Kgakololo ya ga Ahithofele e o ne a tle a gakolole ka yone mo metlheng eo, e ne e tshwana jaaka ekete fa motho a botsa kwa bobuelong jwa Modimo; kgakololo yotlhe ya ga Ahithofele e ne e ntse jalo mo go Dafite le mo go Abesalome.
