Abesalome o busediwa kwa Jerusalema ke Joabe
1Joabe morwa Seruja a lemoga fa pelo ya kgosi e le kwa go Abesalome. 2Mme Joabe a roma motho kwa Tekoa, a bitsa mosadi mongwe yo o botlhale gone, a mo raya a re: “Ke a go rapela, o tle o itsheme motho yo o hutsafetseng, o apare diaparo tsa khutsafalo, ke a go rapela, o se ka wa tlola lookwane, o nne jaaka mosadi yo o sa bolong go lelela moswi fela. 3O tsene kwa kgosing, o bue nae jaana le jaana.” Jalo Joabe a tsenya mafoko mo molomong wa mosadi.
4Ya re mosadi wa Tekoa a bua le kgosi, a wela ka sefatlhogo fa fatshe, a ikoba a re; “Thusa, kgosi.”
5Kgosi ya mo raya ya re: “O bolawa ke eng?” A e fetola a re: “Ruri ke mosadi wa motlholagadi, monna wa me o sule. 6Lelata la gago o ne a na le bana ba basimane ba le babedi, mme ba lwa mo nageng, go ne go se na ope yo o ba kgaoganyang, mme yo mongwe a itaya yo mongwe, a mmolaya. 7Mme bona, ba losika loo botlhe ba tsogologetse lelata la gago, ba re: ‘Ntsha yo o bolaileng ngwanaa rraagwe gore re mmolaele loso lwa ngwanaa rraagwe yo o mmolaileng, mme jalo re bolaye le ene mojaboswa’; jalo ba tlaa tima legala la me le le setseng, ba sa tlogelele monna wa me leina le fa e le lesalela mo lefatsheng.”
8Kgosi ya raya mosadi ya re: “Ya kwa ntlong ya gago, ke tlaa laela batho ka ga gago.”
9Mosadi wa Tekoa a raya kgosi a re: “Morena wa me, kgosi, a boikepo bo nne mo go nna le mo ntlong ya ga rre; a kgosi le setulo sa yone sa bogosi e tlhoke molato.”
10Kgosi ya re; “Le fa e le mang yo o buang sengwe nao, o mo lere kwa go nna mme ga a ketla a tlhola a go ama gope.”
11Foo mosadi a re: “Ke a go rapela, a kgosi e gakologelwe Jehofa, Modimo wa gago, gore mmusolosi wa madi a se ka a tlhola a senya, ka o ka tla a senya morwaake.” Mme a re: “Jaaka Jehofa a tshedile, moriri le fa e le o mongwe fela wa ga morwao ga o ketla o wela fa fatshe.”
12Foo mosadi a re: “Ke a go rapela, o mme lelata la gago le bue lefoko lengwe le kgosi morena wa me.” Mme ya re: “Buela pele.”
13Mosadi a re: “Ke ka ntlha yang o diretse batho ba Modimo tiro e e ntseng jalo? Gonne fa o bua lefoko le, kgosi e etsa mongwe yo o molato, ka kgosi e sa ye go batla molelekiwa wa yone. 14Gonne go swa ke ga rona, mme re etsa metsi a a tshologetseng fa fatshe, a a sa ka keng a tlhola a selwa; le gone Modimo ga o tlose botshelo, mme o dira maano a go re, yo o lelekilweng a se ka a nna molatlhegi mo go one. 15Jaana ka re, e re ka ke tsile go bua lone lefoko le le kgosi morena wa me, ke ka gonne batho ba mpoifisitse; mme lelata la gago la re: Jaana ke tlaa bua le kgosi; e tle e re gongwe kgosi e dire topo ya motlhanka wa yone. 16Gonne kgosi e tlaa utlwa go golola motlhanka wa yone mo seatleng sa monna yo o ratang go ntshenya, le morwaake mmogo, re tswa mo bosweng jwa Modimo. 17Foo lelata la gago la re: Ke a go rapela, o mme lefoko la kgosi morena wa me le nne boikhutso; gonne kgosi morena wa me o ntse jaaka moengele wa Modimo mo go farologanyeng molemo le bosula; Jehofa Modimo wa gago a nne nao.”
18Foo kgosi ya fetola mosadi ya re: “Ke a go rapela, o se ka wa ntobela sepe se ke tlaa se go botsang.” Mosadi a re: “A kgosi morena wa me a bue.”
19Kgosi ya re: “A seatla sa ga Joabe ga se na nao mo seong se sotlhe fela?” Mosadi a fetola a re: “Jaaka mowa wa gago o tshedile, kgosi morena wa me, ga go na ope yo o ka fapogelang ntlheng ya le legolo, kgotsa ntlheng ya la molema a tswa mo go sengwe se kgosi morena wa me o se buileng; gonne motlhanka wa gago Joabe, ke ene yo o ne a ntaola, a ba a tsenya mafoko otlhe a mo molomong wa lelata la gago; 20motlhanka wa gago Joabe o dirile selo se, go tla a sokolola ponalo ya mafoko a; mme morena wa me o botlhale, ka fa botlhaleng jwa moengele wa Modimo, go itse dilo tsotlhe tse di mo lefatsheng.”
21Kgosi ya raya Joabe ya re: “Bona jaana, ke dirile selo se; mme ka re, ya o buse lekau leo, e bong Abesalome.”
22Joabe a wela fa fatshe ka sefatlhogo a ikoba, a segofatsa kgosi; Joabe a re: “Gompieno motlhanka wa gago o a itse fa ke bonye botsalano mo matlhong a gago, kgosi, morena wa me, ka e le fa kgosi e dirile topo ya motlhanka wa yone.” 23Jalo Joabe a nanoga a ya Gešure, mme a lere Abesalome mo Jerusalema.
24Kgosi ya re: “A a fapogele kwa ntlong ya gagwe, mme a se bone sefatlhogo sa me.” Abesalome a fapogela kwa ntlong ya gagwe, mme a se ka a bona sefatlhogo sa kgosi.
Abesalome o agisanya le Dafite
25Jaana mo go Baiseraele botlhe go ne go se na ope yo o bokwang jaaka Abesalome ka bontle jwa gagwe; go tswa patong ya lonao go ya fela kwa phogong go ne go se na bogolenyana bope mo go ene. 26E ne e tle e re a ipeola tlhogo, (o ne a tle a ipeole tlhogo bokhutlong jwa ngwaga mongwe le mongwe, gonne moriri wa gagwe o le bokete mo go ene, a ipeole tlhogo ka ntlha ya gone); a lekanye bokete jwa moriri wa tlhogo ya gagwe, mme bo nne dišekela di le makgolo mabedi ka fa boketeng jwa kgosi. 27Abesalome a tsala bana ba basimane ba le bararo, le wa mosetsana a le mongwe fela, leina la gagwe e le Tamare; yoo e ne e le mosadi yo o sefatlhogo se sentle.
28Abesalome a aga dinyaga di le pedi tse di tletseng mo Jerusalema; a sa bone sefatlhogo sa kgosi. 29Foo Abesalome a romela Joabe gore a tle a mo rome kwa kgosing; mme a gana go tla; a roma gape lwa bobedi, mme a gana go tla. 30Ka ntlha ya moo a raya batlhanka ba gagwe a re: “Bonang, tshimo ya ga Joabe e gaufi le ya me, o na le barele gone; yang lo e tshube ka molelo.” Mme batlhanka ba ga Abesalome ba tshuba tshimo ka molelo.
31Foo Joabe a nanoga, a tla mo go Abesalome mo ntlong ya gagwe, a mo raya a re: “Batlhanka ba gago ba tshubile tshimo ya me ka ntlha yang?”
32Abesalome a fetola Joabe a re: “Bona, ke romile kwa go wena, ka re: ‘Tla kwano, gore ke tle ke go rome kwa kgosing, go e raya go re: Ana ke dule kwa Gešure go reng? Go ne go le molemo bogolo fa nka bo ke sa ntse ke le gone; jaana ka re o mme ke bone sefatlhogo sa kgosi; mme fa go na le boikepo mo go nna, a e mpolaye.’ ”
33Joabe a ya kwa kgosing a e bolelela; e rile e sena go bitsa Abesalome, a tla kwa kgosing, a ikobela fa fatshe ka sefatlhogo fa pele ga kgosi; mme kgosi ya atla Abesalome.
