Puso ya ga kgosi Josia wa Juta
1E rile Josia a simolola go busa a bo a le dinyaga di le 8; a busa ka dinyaga di le 31 mo Jerusalema; leina la ga mmaagwe e ne e le Jetita morwadia Ataia wa Bosekathe. 2A dira se se siameng mo matlhong a ga Jehofa, a sepela mo tseleng yotlhe ya ga Dafite rraagwe, a se ka a fapogela ka fa ntlheng ya le legolo kgotsa ya la molema.
Lokwalo lwa molao lo a bonwa
3Ga dirala ya re ka ngwaga wa 18 wa kgosi Josia, kgosi ya roma Shafane morwa Asalia, morwa Mešulame, mokwaledi kwa ntlong ya ga Jehofa, a re: 4“Ya kwa go Hilekia moperesiti yo mogolo, gore a tle a bale madi a a lerilweng mo ntlong ya ga Jehofa, a balebedi ba kgoro ba a phuthileng mo bathong. 5A ba a tsenye mo seatleng sa badiri ba e leng balebedi ba ntlo ya Jehofa; a ba a neye badiri ba ba mo ntlong ya ga Jehofa go mamatlela mathubego a ntlo. 6Ba a neye babetli, le baagi, le baagi ba dimota; ba a ntshetse go reka dikgong le maje a a betlilweng go tla ba mamatlelela ntlo.” 7Mme le fa go ntse jalo go ne go sa dirwe palo nabo ya madi a a tsentsweng mo seatleng sa bone; gonne ba dira ka boikanngo.
8Hilekia moperesiti yo mogolo a raya Shafane mokwaledi a re: “Ke bonye lokwalo lwa molao mo ntlong ya ga Jehofa.” Hilekia a neela Shafane lokwalo, a lo bala. 9Shafane mokwaledi a ya kwa kgosing, a busetsa phetolo kwa kgosing, a re: “Batlhanka ba gago ba phuthile madi a a fitlhetsweng mo ntlong, ba a tsentse mo seatleng sa badiri ba ba lebelang ntlo ya ga Jehofa.” 10Shafane mokwaledi a bolelela kgosi a re: “Hilekia moperesiti o nneetse lokwalo.” Mme Shafane mokwaledi a lo bala fa pele ga kgosi.
11Ga dirala, e rile kgosi e sena go utlwa mafoko a lokwalo lwa molao, a ikgagola diaparo. 12Kgosi ya laola Hilekia moperesiti, le Ahikame morwa Shafane, le Akebore morwa Mikaia, le Shafane mokwaledi, le Asaia motlhanka wa kgosi, ya re: 13“Yang lo botse mo go Jehofa, lo boletse nna le batho, le Bajuta botlhe ka ga mafoko a lokwalo lo lo bonyweng; gonne bogale jwa ga Jehofa jo bo re tuketseng bo bogolo, ka borraetsho ba se ka ba reetsa mafoko a lokwalo lo, go dira jaaka tsotlhe tse di kwadilweng ka ga rona.”
14Jalo Hilekia moperesiti, le Ahikame, le Akebore, le Shafane, le Asaia ba ya kwa go Huleta moperofeti wa sesadi, mosadi wa ga Shalume morwa Tikefa, morwa Harahase, molebedi wa diaparo; (jaana Huleta o ne a agile mo Jerusalema mo kgaolong ya bobedi;) mme ba bua nae. 15Mosadi a ba raya a re: “Jehofa Modimo wa Iseraele o bua jaana, a re: ‘Rayang monna yo o lo romileng kwa go nna lo re: 16Jehofa o bua jaana a re: Bona, ke tlaa tlisa bosula mo felong fa, le mo banning ba gone, e bong mafoko otlhe a lokwalo lo kgosi ya Juta e lo badileng; 17ka ba ntatlhile, ba fisetsa medimo e sele maswalo, gore ba tle ba ntlhotlheletse bogaleng ka ditiro tsotlhe tsa diatla tsa bone; ke gone ka moo bogale jwa me bo tlaa tukela felo fa, mme ga bo ketla bo tingwa.’ 18Kgosi ya Juta e e lo romileng gore lo botse mo go Jehofa, lo mo reye jaana, lo re: ‘Jehofa Modimo wa Iseraele o bua jaana a re: Ka ga mafoko a o a utlwileng: 19E re ka pelo ya gago e ne e sisimoga, mme wa ikokobetsa fa pele ga Jehofa, jale ka o utlwa se ke se buileng ka ga felo fa, le ka ga banni ba gone, ka re, ba tlaa nna tshwafatso le phutso, mme o ikgagotse diaparo, wa lela fa pele ga me; le nna ke go utlwile, go bua Jehofa.’ 20Ke gone bona, ke tlaa go phuthela kwa go borraago, mme o tlaa phuthelwa phupung ya gago ka kagiso, le gone matlho a gago ga a ketla a bona bosula jotlhe jo ke tlaa bo tlisang mo felong fa.” Mme ba busetsa phetolo e kwa kgosing.
