2 DIKGOSI 1

₁Jaana e rile morago ga loso lwa ga Ahabe, Moabe a tsuololela Iseraele.

₂Ahasia a wa ka fa fensetereng se se selotloa sa ntlwana ya gagwe e e godimo e e mo Samaria, mme a lwala; a roma batho, a ba raya a re: “Yang lo botse mo go Baalesebube modimo wa Ekerone, gore, a ke tlaa fola mo botlhokong jo?” ₃Moengele wa ga Jehofa a raya Elija wa Motišebe a re: “Nanoga o ye go kgatlhantsha barongwa ba kgosi ya Samaria, o ba reye o re: ‘A ke ka gobo go se na Modimo mo Iseraele, fa e bo ne ne jaana lo ya go botsa mo go Baalesebube modimo wa Ekerone?’ ₄Ke gone Jehofa o bua jaana, a re: ‘Ga o ketla o fologa mo bolaong jo o palameng mo go jone, o tlaa swa ruri.’ ” Elija a tsamaya. ₅Barongwa ba boela kwa kgosing, mme ya ba raya ya re: “Lo boetseng?”

₆Ba mo raya ba re: “Go tlile monna mongwe go re kgatlhantsha, a re raya a re: ‘Boelang kwa kgosing e e lo romileng, lo mo reye lo re: Jehofa o bua jaana a re: A ke ka gobo go se na Modimo mo Iseraele fa e bo ne ne fano o roma o ya go botsa mo go Baalesebube modimo wa Ekerone jaana? Ka ntlha ya moo ga o ketla o fologa mo bolaong jo o palameng mo go jone, mme o tlaa swa ruri.’ ”

₇Ya ba raya ya re: “E ne e le monna yo o ntseng jang yo o tsileng go lo kgatlhantsha, a ba a lo bolelela mafoko a?”

₈Ba e fetola ba re: “E ne e le monna yo o bobowa, a itlamile mo lothekeng ka moitlamo wa letlalo.” A re: “Ke Elija wa Motišebe.”

₉Foo kgosi ya roma kwa go ene molaodi mongwe wa batho ba ba 50, a na le ba ba 50 ba gagwe. A ya kwa go ene; mme bonang, a bo a dutse mo tlhoreng ya thaba. A bua nae a re: “Wena monna wa Modimo, kgosi ya re o fologe.”

₁₀Elija a fetola molaodi wa ba ba 50, a re: “Fa ke le monna wa Modimo, a molelo o fologe kwa legodimong, o go nyeletse le ba ba 50 ba gago.” Ga fologa molelo kwa legodimong, wa mo nyeletsa le ba ba 50 ba gagwe.

₁₁Gape ya roma kwa go ene molaodi yo mongwe wa banna ba ba 50, a na le ba ba 50 ba gagwe. Ene a mo raya a re: “Wena monna wa Modimo, kgosi e buile jaana ya re o fologe ka bonako.”

₁₂Elija a ba fetola, a ba raya a re: “Fa ke le monna wa Modimo, a molelo o fologe kwa legodimong, o go nyeletse le ba ba 50 ba gago.” Mme molelo wa Modimo wa fologa kwa legodimong, wa mo nyeletsa le ba ba 50 ba gagwe.

₁₃Gape ya roma molaodi wa ba ba 50 ba boraro, a na le ba ba 50 ba gagwe. Molaodi wa boraro, wa ba ba 50 a ya a fitlha a wela ka mangole fa pele ga Elija, a mo rapela, a mo raya a re: “Wena monna wa Modimo wee, ke a go rapela, a botshelo jwa me le botshelo jwa batlhanka ba gago ba ba 50 ba, bo ratege mo ponong ya gago. ₁₄Bona, ga fologa molelo kwa legodimong wa nyeletsa balaodi ba babedi ba pele le ba ba 50 ba bone; jaana a botshelo jwa me bo ratege mo ponong ya gago.”

₁₅Moengele wa ga Jehofa a raya Elija a re: “Fologa nae; o se ka wa boifa.” Mme a nanoga, a fologela nae kwa kgosing. ₁₆A mo raya a re: “Jehofa o bua jaana a re: ‘E re ka o romile batho ba ya go botsa mo go Baalesebube modimo wa Ekerone, a ke ka gobo go se na Modimo mo Iseraele o go ka bodiwang lefoko la one? Ka ntlha ya gone moo, ga o ketla o fologa mo bolaong jo o palameng mo go jone, mme o tlaa swa ruri.’ ”

₁₇Jalo a swa jaaka lefoko la ga Jehofa le Elija o ne a le buile. Jehorame a simolola go busa mo boemong jwa gagwe, ka ngwaga wa bobedi wa ga Jehorame morwa Jehošafate; gonne o ne a se na ngwana wa mosimane.

₁₈Ditiro tse dingwe tsa ga Ahasia tse o ne a di dira, a ga di a kwalwa mo lokwalong lwa ditirafalo tsa dikgosi tsa Iseraele?