2 DITIRAFALO 3

₁Foo Solomone a simolola go aga ntlo ya ga Jehofa mo Jerusalema, mo thabaneng ya Morija, kwa Jehofa o ne a bonalela Dafite rraagwe gone, felo fa o go baakantseng, mo felong fa Dafite o ne a go laotse, mo seboping sa pholelo sa ga Orenane wa Mojebuse. ₂A simolola go aga ka tsatsi la bobedi la kgwedi ya bobedi, ka ngwaga wa bone wa puso ya gagwe. ₃Jaana e ke yone metheo e Solomone o ne a e beela kago ya ntlo ya Modimo: Boleele ka selekanyo sa mabogo ka fa selekanyong sa ntlha, e ne e le boleele jwa dimetara di le 27, boatlhamo dimetara di le 9. ₄Mokatako o o fa pele ga ntlo, boleele jwa one e le jwa dimetara di le 9, ka fa boatlhamong jwa ntlo, bogodimo e le jwa dimetara di le 54. Ka fa teng a e manega gouta e e sa pekwang. ₅Ntlo e kgolo a e thiba ditlhomeso ka dimati tsa mafira ka fa teng, a di manega gouta e e itshekileng, a e kwalakwatsa ditlhare tsa makolane, le bompolokwane. ₆A kgabisa ntlo ka majana a a tlhokegang, gore e nne ntle; mme gouta e ne e le gouta ya Parafaima. ₇Le gone a manega ntlo, le mesipuri, le direpudi, le dimota tsa yone, le ditswalo tsa yone ka gouta; a e kwalakwatsa ditšheruba mo dimoteng. ₈A dira ntlo e e boitshepo jo bo itshepileng; boleele jwa yone e le jwa dimetara di le 9, ka fa boatlhamong jwa ntlo, boatlhamo jwa yone e le jwa dimetara di le 9; a e manega gouta e e itshekileng, e feta ditone tse 20 ka bokete: ₉Bokete jwa dimapo e le dikerame tsa gouta di le 570. Matlwana a a kwa godimo a a manega gouta.

₁₀Mo ntlong e e boitshepo jo bo itshepileng a dira ditšheruba di le pedi tsa tiro ya setshwantsho; a di manega gouta. ₁₁Diphuka tsa ditšheruba di le boleele jwa dimetara di le 9; lofuka lwa tšheruba nngwe lo le dimetara di le 2,2, lo fitlha kwa lomoteng lwa ntlo; lofuka lo longwe le lone lo le dimetara di le 2,2, lo fitlha kwa lofukeng lwa tšheruba e nngwe. ₁₂Lofuka lwa tšheruba e nngwe lo le dimetara di le 2,2, lo fitlha kwa lomoteng lwa ntlo; lofuka lo longwe lo le dimetara di le 2,2 le lone lo tshwaragana le lofuka lwa tšheruba e nngwe. ₁₃Diphuka tsa ditšheruba tseo tsa tsharologa tsa nna dimetara di le 9; tsa bo di eme ka dinao, difatlhogo tsa tsone di lebile kwa teng ga ntlo. ₁₄Sesiro a se dira ka bobududu le bohibidu jo bo mokgona, le bohibidu jo bo letlhololo, le leloba le le boleta, mme a logela ditšheruba mo go sone.

₁₅Le gone a dira maotwana a le mabedi fa pele ga ntlo, a le bogodimo jwa dimetara di le 15,5, le tlhogo e e mo godimo ga lengwe le lengwe la one e le dimetara di le 2,2. ₁₆Mo bobuelelong a dira bompolokwane a ba baya mo godimo ga maotwana; a dira digaranata di le 100 a di baya mo bompolokwaneng. ₁₇A tlhoma maotwana fa pele ga tempele, lengwe ka fa ntlheng ya le legolo le lengwe ka fa ntlheng ya la molema; a raya le le ka fa ntlheng ya le legolo leina a re: Jakine, le le ka fa ntlheng ya la molema a le raya leina a re: Boase.