2 DITIRAFALO 26

₁Batho botlhe ba Juta ba tsaya Usia yo o ne a le dinyaga di le 16, ba mo dira kgosi mo boemong jwa ga Amasia rraagwe. ₂Mme a aga Elothe, a o busetsa mo go Juta, morago ga kgosi e sena go robala le borraagwe.

₃E rile Usia a simolola go busa a bo a le dinyaga di le 16; mme a busa ka dinyaga di le 52 mo Jerusalema. Leina la ga mmaagwe e ne e le Jekilia wa Jerusalema. ₄Mme a dira se se siameng mo matlhong a ga Jehofa, jaaka tsotlhe tse Amasia rraagwe o ne a di dira. ₅A itlhomamisa go batla Modimo mo metlheng ya ga Sekaria, yo o ne a na le tlhaloganyo mo ponatshegong ya Modimo; mme ya re a sa ntse a batla Jehofa, Modimo wa mo tlhogonolofatsa.

₆A bolola a tlhabana le Bafilisitia, a thuba loraka lwa Gathe, le loraka lwa Gabene le lorako lwa Ašetote; a aga metse mo lefatsheng la Ašetote le mo gare ga Bafilisitia. ₇Modimo wa mo thusa go tlhabana le Bafilisitia, le go tlhabana le Baarabia ba ba agileng mo Gure-baale le Bameunime. ₈Baamone ba naya Usia dineo; mme leina la gagwe la tumela ntlheng tsotlhe, la ya fela kwa botsenong jwa Egepeto; gonne o ne a thatafala mo go feteletseng.

₉Gape Usia a aga dikago tse di godileng mo Jerusalema fa kgorong ya kgokgotsho, le fa kgorong ya molapo, le fa tshokologong ya lorako, a di thatafatsa. ₁₀A aga dikago tse di godileng mo nageng, a gaba madu a le mantsi, gonne o na a na le dikgomo di le dintsi; le gone mo lefatsheng le le khuti le mo lobaleng; o ne a na le balemi, le badiri ba masimo a mafine mo dithabeng le mo matlhagareng a a ungwisang; gonne a rata tiro ya masimo.

₁₁Gape Usia o na a na le ntwa ya batlhabani, ba ba bololang ntwa ka masomo, ka fa palong ya go balwa ga bone mo go dirilweng ke Jeiele mokwadi, le Maaseia leotlana, fa tlase ga taolo ya ga Hanania molaodisiwa mongwe wa kgosi. ₁₂Palo yotlhe ya ditlhogo tsa makgotla a borara, e bong diganka tse di pelokgale, e ne e le 2 600. ₁₃Mo taolong ya bone go ne go le ntwa e e rutilweng, e le 307 500, ba ba tlhabanang ka thata e kgolo, ba thusa kgosi go tlhabana le mmaba. ₁₄Usia a baakanyetsa ntwa yotlhe dithebe le marumo, le ditlhoro tsa phemelo, le meitshomelo ya phemelo, le mara le maje a metsekedi. ₁₅A dira dikgaraga mo Jerusalema, tse di simolotsweng ke banna ba ba ditsetse tsa go tla di bewa mo dikagong tse di godileng mo godimo ga dikgokgotsho, go tla ba hula ka tsone metswi le maje a magolo. Mme leina la gagwe la tumela kwa kgakala; ka a ne a thusiwa mo go gakgamatsang, ga tsamaya a nna thata.

₁₆E rile a sena go nna thata, pelo ya gagwe ya tsholetsega a ba a tla a dira ditiro tsa sebodu, a leofela Jehofa, Modimo wa gagwe; gonne o ne a ya mo tempeleng ya ga Jehofa a ya go fisa maswalo mo sebesong sa maswalo. ₁₇Asaria moperesiti a tsena a mo setse morago, a na le baperesiti ba ga Jehofa ba le 80, ba e neng e le diganka tse di pelokgale. ₁₈Ba ganela le kgosi Usia, ba mo raya ba re: “Usia, ga se ga gago go fisetsa Jehofa maswalo, fa e se ga baperesiti bomorwa Arone fela, ba ba lomololetsweng go fisa maswalo; tswa mo felong ga boitshepo; gonne o tlodile; le gone ga e ketla e nna tlotlo e e tswang mo go Jehofa Modimo mo go wena.”

₁₉Foo Usia a nna bogale; mme o ne a tshotse leiswana mo seatleng, la go fisa maswalo; o rile a sa ntse a le bogale le baperesiti, lepero la tsoga mo phatleng ya gagwe fa pele ga baperesiti, mo ntlong ya ga Jehofa, fa sebesong sa maswalo. ₂₀Asaria moperesiti yo mogolo, le baperesiti botlhe, ba mo leba, mme bonang, a bo a le lepero mo phatleng, mme ba mo ntsha gone ka bonako; ee, le ene a itlhaganela go tswela kwa ntle, gonne Jehofa o na a mo iteile.

₂₁Usia kgosi a nna molepero go ya go fitlha mo tsatsing la loso lwa gagwe, mme a nna mo ntlong e e kwa thoko e lo yosi, ka a le molepero; gonne o na a kgaotswe mo ntlong ya ga Jehofa. Mme Jothame morwawe a laola ntlo ya kgosi, a atlhola batho ba lefatshe.

₂₂Ditiro tse dingwe tsa ga Usia tsa ntlha le tsa morago, Isaia moperofeti morwa Amose o na a di kwala. ₂₃Jalo Usia a robala le borraagwe; mme ba mo fitlha le borraagwe mo nageng ya phitlhelo e e leng ya dikgosi; gonne ba re: “Ke molepero.” Mme Jothame morwawe a busa mo boemong jwa gagwe.