2 DITIRAFALO 12

₁Ga dirala e rile bogosi jwa ga Rehoboame bo sena go tlhomama, le ene a le thata, a tlogela molao wa ga Jehofa, le Baiseraele botlhe nae. ₂Ga dirala ya re ka ngwaga wa botlhano wa kgosi Rehoboame, Shišake kgosi ya Egepeto a bololela Jerusalema, ka ba ne ba leofetse Jehofa, ₃a na le dikara di le 1 200, mme bapalami ba dipitse ba le 60 000; batho ba ba tlang nabo ba tswa Egepeto ba bo ba se na palo: Balubime, le Basukime le Baethiopia. ₄A gapa metse e e thekeleditsweng e e leng ya Juta, a ba a tla mo Jerusalema.

₅Shemaia moperofeti a tla kwa go Rehoboame, le kwa dikgosaneng tsa Juta, tse di phuthegetseng kwa Jerusalema, ka ntlha ya ga Shišake, mme a ba raya a re: “Jehofa, o bua jaana a re: ‘Lo ntatlhile, ke gone ka moo le nna ke lo tlogetse mo seatleng sa ga Shišake.’ ”

₆Foo dikgosana tsa Iseraele tsa ikokobetsa, le kgosi, mme ba re: “Jehofa o tshiamo.”

₇E rile Jehofa a bona fa ba ikokobeditse, lefoko la ga Jehofa la tla kwa go Shemaia, la re: “Ba ikokobeditse; ga nketla ke ba senya, mme ke tlaa ba naya kgololo ka ntlha nngwe, le bogale jwa me ga bo ketla bo gorometsegela Jerusalema ka Shišake. ₈Le fa go ntse jalo ba tlaa nna batlhanka ba gagwe; gore ba itse tirelo ya me, le tirelo ya magosi a mafatshe.”

₉Jalo Shišake kgosi ya Egepeto a bololela Jerusalema, mme a tsaya a tlosa dikhumo tsa ntlo ya ga Jehofa, le dikhumo tsa ntlo ya kgosi; a tsaya gotlhe fela; a tlosa le dithebe tsa gouta tse Solomone o kileng a di dira. ₁₀Kgosi Rehoboame a dira dithebe tsa kgotlho mo boemong jwa tsone, a di tsenya mo diatleng tsa balaodi ba balebedi ba ba lebelang kgoro ya ntlo ya kgosi. ₁₁Ga dirala e ne e tle e re fa kgosi e tsena mo ntlong ya ga Jehofa, balebedi ba di sikare, ba itse go di busetsa mo ntlwaneng ya balebedi. ₁₂Mme ya re a ikokobetsa, bogale jwa ga Jehofa jwa mo fapoga, go tla a se ka a mo senyetsa ruri, gape mo Juta ga fitlhelwa dilo tse di molemo.

₁₃Jalo kgosi Rehoboame a ithatafatsa mo Jerusalema, mme a busa; gonne Rehoboame o rile a simolola go busa a bo a le dinyaga di le 41, mme a busa ka dinyaga di le 17 mo Jerusalema, e le motse o Jehofa o ne a o itshenketse mo ditsong tsotlhe tsa Iseraele, go tla a baya leina la gagwe gone. Leina la ga mmaagwe e ne e le Naama mosadi wa Moamone. ₁₄Mme a dira se se bosula, ka a se ka a itlhomamisa ka pelo go batla Jehofa.

₁₅Jaana ditiro tsa ga Rehoboame tsa ntlha le tsa morago, a ga di a kwalwa mo mafokong a ga Shemaia moperofeti, le a ga Ito molebi, ka fa mokgweng wa palo ya ditshika. Ga bo go ntse go le dintwa gare ga Rehoboame le Jeroboame ka metlha yotlhe. ₁₆Mme Rehoboame a robala le borraagwe, a fitlhwa mo motseng wa ga Dafite; mme Abija morwawe a busa mo boemong jwa gagwe.