2 DITIRAFALO 1

₁Solomone morwa Dafite a thatafadiwa mo bogosing jwa gagwe, Jehofa Modimo wa gagwe a nna nae, a mo godisa mo go feteletseng.

₂Solomone a bua le Baiseraele botlhe, le balaodi ba dikete, le ba makgolo, le baatlhodi, le kgosana nngwe le nngwe mo go Baiseraele botlhe, ditlhogo tsa makgotla a borara. ₃Jalo Solomone le phuthego yotlhe ba ya felong fa go tlotlometseng kwa Gibeone; gonne mogope wa bophuthegelo wa Modimo o ne o le gone, o Moše motlhanka wa ga Jehofa o ne a o dirile kwa nageng. ₄Mme letlole la Modimo, Dafite o ne a le tlhatlositse kwa Kiriathe-jearime a le isitse mo felong fa Dafite o ne a go le baakanyeditse, ka a ne a le tlhometse mogope kwa Jerusalema. ₅Gape le sebeso sa kgotlho, se Besalele morwa Uri, morwa Hure, o ne a se dirile se ne se le gone fa pele ga motlaagana wa ga Jehofa; mme Solomone le phuthego ba ne ba tle ba botse kwa go sone. ₆Solomone a tlhatlogela gone kwa sebesong sa kgotlho fa pele ga Jehofa, se se kwa mogopeng wa bophuthegelo, a isa mo go sone ditshupelo di le 1 000 tse di fisiwang.

₇E rile mo bosigong joo Modimo wa bonala kwa go Solomone, wa mo raya wa re: “Lopa se ke tlaa se go nayang.”

₈Solomone a raya Modimo a re: “O supeditse Dafite rre bopelonomi jo bogolo, mme o ntirile kgosi mo boemong jwa gagwe. ₉Jaana Jehofa Modimo, a tsholofetso e o e boleletseng Dafite rre e tlhomamisiwe, gonne o ntirile kgosi ya batho ba ba tshwanang le lorole lwa lefatshe ka bontsi. ₁₀Mme ka re, a ko o nneye botlhale le kitso, gore ke tswe ke be ke tsene fa pele ga tšhaba e; gonne e mang yo o ka atlholang batho ba, ba gago, ba ba leng bogolo jo bo kanakana?”

₁₁Modimo wa raya Solomone wa re: “E re ka selo se, se ne se le mo pelong ya gago, mme o se ka wa lopa khumo, kgotsa dithoto, kgotsa tlotlo, kgotsa botshelo jwa bone ba ba go ilang, le gone wa se ka wa lopa go tshela ka lobaka lo loleele; mme o itopetse botlhale le kitso, gore o tle o atlhole batho ba me, ba ke go dirileng kgosi ya bone, ₁₂o a bo newa botlhale le kitso; mme ke tlaa go naya khumo le thoto le tlotlo, tse di se kang tsa bonwa ke dikgosi dipe tse di kileng tsa nna pele ga gago, le fa e le tse di tlaa tlang morago ga gago, ga go ketla go nna le dipe tse di tlaa bonang jalo.”

₁₃Jalo Solomone a bowa mo loetong lwa gagwe kwa felong fa go tlotlometseng mo go kwa Gibeone, a tswa fa pele ga mogope wa bophuthegelo, a tla mo Jerusalema; mme a busa Baiseraele.

₁₄Solomone a phutha dikara le bapalami ba dipitse; a na le dikara di le 1 400 le bapalami ba dipitse ba le 12 000, ba o ne a ba baya mo metseng ya dikara le kwa kgosing kwa Jerusalema. ₁₅Kgosi ya dira selefera le gouta tsa nna jaaka maje mo Jerusalema, le masetara a a dira gore a nne jaaka ditlhare tsa masekamore a a mo lefatsheng le le khuti, ka bontsi. ₁₆Dipitse tse Solomone o ne a na natso tsa bo di tswa kwa Egepeto; babapaledi ba kgosi ba di amogela di le makgathi, lekgathi lengwe le lengwe ka fa tlhwatlhweng ya lone. ₁₇Ba ne ba tle ba ye ba tseye ba ntshe mo Egepeto kara e le nngwe ka dipapetla di le 600 tsa selefera, le pitse nngwe ka dipapetla di le 150. Ga nna jalo mo dikgosing tsotlhe tsa Bahita le kgosi tsa Siria, ba di tsaya ka madi a bone.