1 TIMOTHEO 4

₁Mowa o bua ka thanolo gore, mo metlheng ya morago bangwe, ba tlaa tenega mo tumelong, ba tlhokomela mewa e e timetseng, le dithuto tsa badimo. ₂Ka boitimokanyo jwa batho ba ba buang maaka, e le ba digakolodi tsa bone di ntseng jaaka e kete di fisitswe ka tshipi e e molelo; ₃ba itsa batho go nyala, ba laola gore go ilwe dijo tse Modimo o di tlhophetseng go amogelwa ka tebogo ke ba ba dumelang le ba ba itseng boammaaruri. ₄Gonne sebopiwa sengwe le sengwe sa Modimo se molemo, ga go sepe se se nang le go ganwa, fa se amogelwa ka tebogo; ₅gonne se a bo se itshepisiwa ka lefoko la Modimo le ka thapelo.

₆Fa o gakolola bakaulengwe ka ga dilo tse, o tlaa bo o le modiredi yo o molemo wa ga Keresete Jesu, yo o otlwang ka mafoko a tumelo, le a thuto e e molemo, e o ntseng o e setse morago le gompieno. ₇Mme o gane ditlhamane tse di bosula le tsa sesadi segolo. O itshikinye mo poifomodimong: ₈Gonne go tshikinya mmele go molemo mokhutshwane; mme poifomodimo e molemo ka ga dilo tsotlhe, ka e na le tsholofetso ka ga botshelo jwa gompieno, le ka ga jone jo bo tlaa tlang. ₉Go boikanngo polelo e, e bile e tshwanetswe ke kamogelo yotlhe. ₁₀Gonne re a dira e bile re a leka ka ntlha ya gone mo, ka gonne re na le tsholofelo ya rona, e tlhomilwe mo Modimong, o o tshedileng, o e leng Mmoloki wa batho botlhe, bogolo wa bone ba ba dumelang.

₁₁Dilo tse, o di ba laolele o di ba rute. ₁₂Ope a se ka a nyatsa bokau jwa gago; o nne sekao sa ba ba dumelang, mo puong le mo mokgweng wa go tshela, mo loratong, mo tumelong le mo boitshekong. ₁₃O tlhokomele go bala, le go laya, le go ruta, ke tle ke tsamaye ke tle. ₁₄O se ka wa tlhokomologa neo e e mo go wena, e o neilweng ka perofeso e pataganye le peo ya diatla tsa bagolwane. ₁₅O tle o tlhoafale mo dilong tse; o ineele mo go tsone ka bojotlhe jwa gago; gore botswelelopele jwa gago bo bonatshege mo go botlhe. ₁₆O ipone o bo o bone le go ruta ga gago. O nnele ruri mo dilong tse, gonne ka go dira jalo o tlaa bo o ipoloka o ba o boloka ba ba go utlwang.