1 BATHESALONIKA 3

₁Ke gone ka moo, e rile re retelelwa ke go tlhola re itshokile, ra kaya fa go ka nna molemo go tlogelwa mo Athene re le rosi; ₂mme ra roma Timotheo mokaulengwe wa rona, le modiredi wa Modimo mo Mafokong a a Molemo a ga Keresete, gore a ye go lo tlhomamisa, le go lo gomotsa ka ga tumelo ya lona; ₃gore ope a se ka a tshikinngwa ke dipitlagano tse; gonne lona ka losi lo a itse fa re laoletswe gone moo. ₄Gonne le gale, e rile re sa na le lona ra lo bolelela gale fa re na le go boga pitlagano, fela jaaka go dirafetse, e bile le lona lo a itse. ₅Ka ntlha ya moo, le nna, e rile ke retelelwa ke go tlhola ke itshokile, ka roma gore ke itse tumelo ya lona, e se re kgotsa moraedi a ba a bile a lo raetse, le tiro ya rona ya nna lefela.

₆Mme e rile Timotheo a sena go tla fela, jaana a re tswela koo go lona, mme a re leretse mafoko a a itumedisang a tumelo ya lona le lorato, le gore lo sa ntse lo re gakologetswe ka molemo ka metlha yotlhe, lo ntse lo tlhologeletswe go re bona, fela jaaka le rona re tlhologeletswe go bona lona. ₇Ka ntlha ya gone moo, bagaetsho, ra gomotsega ka ga lona mo tlalelong ya rona yotlhe le pitlagano, ka tumelo ya lona, ₈gonne jaana re a tshela, fa lona lo eme lo tiile mo Moreneng. ₉Gonne tebogo e ka nna efe e re ka bong re e ntshetsa Modimo, ka ntlha ya boitumelo jotlhe jo re itumelang ka jone ka ga lona fa pele ga Modimo? ₁₀Re ntse re rapela segolo thata bosigo le motshegare, gore re ke re lo bone difatlhogo, re swetse mo go sa ntseng go tlhaetse ga tumelo ya lona.

₁₁Jaana Modimo le Rra wa rona ka esi, le Morena wa rona Jesu, o ka ka a re siamisetsa tsela go ya koo go lona. ₁₂A Morena a dire mo go lona gore lo gole, lo totafale mo go rataneng, le mo go rateng batho botlhe, fela jaaka le rona re ntse ka ga lona; ₁₃gore a tle a tlhomamise dipelo tsa lona mo go senang molato, mo boitshepong fa pele ga Modimo le Rra wa rona, mo go tleng ga Morena wa rona Jesu, a tla le baitshepi botlhe ba gagwe.