Goliathe o ikgantshetsa Baiseraele
1Jaana Bafilisitia ba phuthela dintwa tsa bone tlhabanong, ba phuthegela kwa Soko, o o leng wa Juta, ba thibelela fa gare ga Soko le Aseka, mo Efese-tamime. 2Saule le banna ba Iseraele ba ne ba phuthegile, mme ba thibelela mo molapong wa Ela, ba abela Bafilisitia tlhabano. 3Bafilisitia ba ema mo thabeng e e ntlheng nngwe, mme Baiseraele ba ema mo thabeng e e ntlheng e nngwe; go ne go le molapo gare ga bone.
4Mme ga tswa seganka mo bothibelelong jwa Bafilisitia, yo o bidiwang Goliathe, wa Gathe, o ne a le boleele jwa mabogo a le marataro le paralatso ya menwana. 5A rwele tlhoro ya phemelo ya kgotlho mo tlhogong, a apere moitshomelo wa phemelo; bokete jwa seaparo e le dikilokerama di le 57. 6A tswele diphemelo e bong dithejana tsa kgotlho mo maotong a gagwe, le putlela ya kgotlho gare ga marudi a gagwe. 7Lore lwa lerumo la gagwe lo ne lo le kana ka mosipuri wa monyedi, le lerumo la gagwe la tshipi tota le le bokete jwa dikilokerama di supa; motsholathebe wa gagwe a mo etelela pele. 8A ema a kua dintwa tsa Iseraele a ba raya a re: “Lo tswetseng lo tla go aba tlhabano ya lona? A ga ke Mofilisitia, a lona ga lo batlhanka ba ga Saule? Itshenkeleng monna mongwe a fologele kwano go nna. 9E tlaa re fa a nonofile go tlhabana le nna, le go mpolaya, foo re nne batlhanka ba lona; mme fa ke mo fenya ke mmolaya, foo lo tlaa nna batlhanka ba rona, lo tlaa re direla.” 10Mofilisitia a re: “Ke a di kgoba dintwa tsa Iseraele gompieno; nnayang motho, gore re tlhabane mmogo.” 11E rile Saule le Baiseraele botlhe ba utlwa mafoko ao a Mofilisitia, ba tseakana, ba boifa thata.
Dafite o mo masoleng a ga Saule
12Jaana Dafite e ne e le morwa Moeferatha yole wa Bethelehema wa Juta, yo leina la gagwe go tweng, Jese; a na le bana ba basimane ba fera e le mebedi. Mme e rile mo motlheng wa ga Saule, monna yo a bo a setse a tsofetse, a le dinyaga dintsi mo bathong. 13Bomorwa Jese ba bagolwane ba bararo ba ne ba lateletse Saule kwa tlhabanong. Maina a bomorwawe ba bararo ba ba ileng tlhabanong e ne e le Eliabe wa motsalwapele, le yo o rulaganyeng nae Abinatabe, le wa boraro Shama. 14Dafite a bo a le yo mmotlana. Ba bagolwane ba bararo ba bo ba setse Saule morago. 15Jaana Dafite o ne a tle a boaboele mo go Saule, a itse go ya go hudisa dinku tsa ga rraagwe kwa Bethelehema.
16Mofilisitia a nna a atamela ka moso le maitseboa, a iponatsa ka malatsi a le 40.
17Jese a raya Dafite morwawe a re: “A ko o isetse bomogoloo emere ya mabele a a gadikilweng a, le dinkgwe tse some tse, o di ise ka bonako kwa go bomogoloo kwa bothibelelong; 18o isetse molaodi wa bone wa makgolo a a some dikase tse di some tse, o bone go re bomogoloo ba tshela jang, o tle le phetolo ya bone.” 19Jaana Saule, le bone le batho botlhe ba Iseraele ba ne ba le mo molapong wa Ela, ba tlhabana le Bafilisitia.
20Dafite a phakela, a tlogela dinku le modisa mongwe, a tsaya, a tsamaya, jaaka Jese a mo laotse; a ya a fitlha fa maemong a makoloi, ka ntwa e e bololang e ya go tlhabana e thelela tlhabano lošalaba. 21Baiseraele ba aba mephato, ntwa nngwe ya lebanngwa le e nngwe. 22Dafite a tlogela lekokoma la gagwe mo seatleng sa molebedi wa makokoma, a sianela kwa ntweng, a fitlha a dumedisa bomogoloe. 23Ya re a sa bua nabo, bonang, ga tla ene seganka, Mofilisitia wa Gathe yo o bidiwang Goliathe, a tswa mo ntweng ya Bafilisitia, a fela a bua one mafoko ao fela; Dafite a a utlwa. 24Banna botlhe ba Iseraele ba re ba bona monna yoo ba tshaba, ba boifa thata. 25Banna ba Iseraele ba re: “A lo bonye monna yo o tsileng? O a ba a tsile go kgoba Baiseraele; mme go tlaa dirala go re, monna yo o mmolayang, kgosi e tlaa mo humisa ka dikhumo tse dikgolo, o tlaa mo naya morwadie, mme o tlaa rebola ba ntlo ya ga rraagwe mo tirelong ya bogosi mo Iseraele.”
26Dafite a bua le banna ba ba emeng fa go ene a re: “Motho yo o tlaa bolayang Mofilisitia yo, a tlosa kgobo mo Iseraele, ga twe o tlaa direlwa jang? Gonne Mofilisitia yo o sa rupang yo e a bo e le mang fa e tlaa bo ne ne fano a kgoba dintwa tsa Modimo o o tshedileng?” 27Batho ba mo fetola ba bua jaana ba re: “Motho yo o mmolayang o tlaa direlwa jalo.”
28Ya re a sa bua le banna bao, Eliabe mogolowe a utlwa; bogale jwa ga Eliabe jwa tukela Dafite a re: “O tletseng kwano? Dinkunyana tsele o di tlogetse le mang kwa nageng? Ke a a itse mabela a gago, le bosilo jwa pelo ya gago; gonne o tsile, gore o tle o bone tlhabano.”
29Dafite a re: “Ke dirileng jaanong? A ga ke ne ke botsa sengwenyana fela?” 30A mo hularela, a leba kwa go yo mongwe, a bua ka mokgwa o o ntseng jalo fela; batho ba mo fetola gape ka mokgwa wa pele.
31E rile mafoko a a builweng ke Dafite a utlwala, ba a kakanya fa pele ga Saule; mme a roma a ya go mmitsa. 32Dafite a raya Saule a re: “A go se idibale pelo ya ga ope ka ntlha ya motho yole; motlhanka wa gago o tlaa ya go tlhabana le Mofilisitia yo.”
33Saule a raya Dafite a re: “Ga o a nonofa go ya go tlhabana le Mofilisitia yo; gonne o lekau fela, ene e sa le ka bokau jwa gagwe e ntse e le monna wa ntwa fela.” 34Mme Dafite a raya Saule a re: “Motlhanka wa gago o ne a disitse dinku tsa ga rraagwe; e rile go tla tau le bera, di tsaya kwanyana ya letsomane, 35ka di latela, ka di bolaya, ka golola kwanyana mo ganong la tsone; ya re di re di a ntlolela, ka di tshwara ka ditedu, ka di onya, ka di bolaya. 36Motlhanka wa gago a bolaya tau le bera ka bobedi jwa tsone; mme Mofilisitia yo o sa rupang yo, o tlaa nna jaaka nngwe wa tsone, ka a kgobile dintwa tsa Modimo o o tshedileng.” 37Dafite a re: “Jehofa yo o nkgolotseng mo leroong la tau le mo leroong la bera, o tlaa nkgolola mo seatleng sa Mofilisitia yo.” Saule a raya Dafite a re: “Ya fela, Jehofa o tlaa nna nao.” 38Saule a apesa Dafite diaparo tsa gagwe, a mo rwesa tlhoro ya phemelo ya kgotlho mo tlhogong, a mo apesa moitshomelo wa phemelo. 39Dafite a gokelela tšhaka ya gagwe mo diaparong tsa gagwe, mme a re o a tsamaya; gonne o na a ise a di leke. Dafite a raya Saule a re: “Ke retelelwa ke go tsamaya ka dilo tse; gonne ga ke ise ke di leke.” Mme Dafite a di apola. 40A tsaya thobane ya gagwe, mme a itebalebela majana a a borethe a le matlhano mo molatswaneng, a a tsenya mo kgwatlheng ya gagwe ya modisa, e bong mo pataneng ya gagwe; motsekedi wa gagwe le one a o tshotse; mme a atamela kwa go Mofilisitia.
Dafite o bolaya Goliathe
41Mofilisitia a tla a atamela kwa go Dafite, monna yo o tshotseng thebe a mo eteletse pele. 42E rile Mofilisitia a koba, a bona Dafite, a mo nyatsa; gonne e ne e le lekau fela, a le mohibidu, le gone a le montle go lejwa. 43Mofilisitia a raya Dafite a re: “A ke ntša fa e bo ne ne o tla o tshotse ditsamma jaana?” Mofilisitia a roga Dafite ka medimo ya gagwe. 44Mofilisitia a raya Dafite a re: “Tla kwano go nna, mme nama ya gago ke tlaa e naya dinonyane tsa loapi le dibatana tsa naga.”
45Foo Dafite a raya Mofilisitia a re: “O tla kwa go nna ka tšhaka le ka lerumo, le ka putlela, mme nna ke tla kwa go wena mo ineng la ga Jehofa wa masomosomo, Modimo wa dintwa tsa Iseraele, yo o mo kgobileng. 46Jehofa o tlaa go tsenya mo seatleng sa me gompieno; mme ke tlaa go bolaya, ke tlosa tlhogo ya gago; ditoto tsa ntwa ya Bafilisitia ke tlaa di naya dinonyane tsa loapi gompieno, le dibatana tsa naga, gore lefatshe lotlhe le itse fa go na le Modimo mo Iseraele. 47Le gore, phuthego e, yotlhe, e itse fa Jehofa a sa golole ka tšhaka le ka lerumo; gonne tlhabano ke ya ga Jehofa, o tlaa lo tsenya mo seatleng sa rona.”
48Ga dirala ya re Mofilisitia a nanoga, a tla a atamela go tla go kopana le Dafite, Dafite a itlhaganela, a sianela kwa ntweng a ya go kopana le Mofilisitia. 49Dafite a tsenya letsogo mo kgwatlheng ya gagwe, a ntsha lentswe gone, a le konopela ka motsekedi, a gatla Mofilisitia mo phatleng; lentswe la tsena mo teng ga phatla ya gagwe, a wela ka sefatlhogo fa fatshe. 50Dafite a fenya Mofilisitia ka motsekedi le ka lentswe, a gatla Mofilisitia a mmolaya; go ne go se na tšhaka mo seatleng sa ga Dafite. 51Foo Dafite a siana, a ya a ema fa go Mofilisitia, a tshwara tšhaka ya gagwe, a e somola mo kgatlheng ya yone a mmolaya, a mo kgaola tlhogo ka yone. E rile Bafilisitia ba bona fa seganka sa bone se sule, ba tshaba. 52Banna ba Iseraele le ba Juta ba nanoga, ba thela lošalaba, ba konatelela Bafilisitia, ga tsamaya ba fitlha kwa Gathe, le kwa dikgorong tsa Ekerone. Bafilisitia ba ba tlhabilweng ba wela mo tseleng e e yang Shaaraime, e bong Gathe le kwa Ekerone. 53Bana ba Iseraele ba boa kwa go konateleleng Bafilisitia, ba thopa bothibelelo jwa bone. 54Dafite a tsaya tlhogo ya Mofilisitia a e isa kwa Jerusalema; mme dibolao tsa gagwe a di tsenya mo mogopeng wa gagwe.
Dafite o isiwa kwa go Saule
55E rile Saule a bona Dafite a bololela Mofilisitia, a raya Abenere molaodi wa ntwa a re: “Abenere, lekau leo ke morwa mang?” Abenere a re: “Jaaka mowa wa gago o tshedile, kgosi, ga ke itse.”
56Kgosi ya re: “O tle o botse go re, mosimane yo ke morwa mang.”
57E rile Dafite a bowa kwa go bolayeng Mofilisitia, Abenere a mo tsaya, a mo isa fa pele ga Saule a tshotse tlhogo ya Mofilisitia. 58Saule a mo raya a re: “O morwa mang wena lekau?” Dafite a mo fetola a re: “Ke morwa motlhanka wa gago Jese wa Mobethelehema.”
