Go tlhabanwa le Bafilisitia
1Saule o rile a simolola go busa a bo a le dinyaga di le 30; a busa Iseraele ka dinyaga di le pedi. 2Mme Saule a itshenkela banna ba Iseraele ba le 3 000; ba 2 000 a bone ba nna le Saule mo Mikemaša, le mo thabeng ya Bethele; ba le 1 000 ba nna le Jonathane mo Gibea wa Benjamine; batho ba bangwe a ba naya tsela, mongwe le mongwe a ya mogopeng wa gagwe.
3Jonathane a kgemetha setlhopha sa masole a Bafilisitia se se mo Gibea, mme Bafilisitia ba utlwa. Saule a leletsa lonaka mo lefatsheng lotlhe a re: “A Bahebere ba utlwe.” 4Baiseraele botlhe ba utlwa go twe, Saule o kgemethile setlhopha sa masole a Bafilisitia, le gone fa Baiseraele ba nkgela Bafilisitia sebodu. Batho ba ne ba phuthegetse mmogo kwa Gilegale ba setse Saule morago.
5Bafilisitia ba phuthega ba tla go tlhabana le Iseraele, ba le dikara tsa tlhabano di le 30 000, le bapalama dipitse ba le 6 000, le batho ba le bantsi jaaka mošawa o o fa losing lwa lewatle; ba tlhatloga, ba thibelela mo Mikemaša go pota Bethafene ka fa botlhabatsatsi. 6E rile banna ba Iseraele ba bona fa ba le mo pitlaganong, (ka batho ba ne ba tlaletswe), foo ba iphitlha mo dikgageng le mo dikgweng, le mo mafikeng, le mo mesimeng, le mo mekoleng. 7Jaana bangwe ba Bahebere ba ne ba kgabagantse Joretane ba ile lefatsheng la Gate le Gileate; Saule ene a bo a sa ntse a le mo Gilegale, mme batho botlhe ba mo setse morago ba roroma. 8A tlhola malatsi a supa, ka fa lobakeng lo lo laotsweng ke Samuele; mme Samuele a se ke a tla mo Gilegale, batho ba bo ba mo phatlalaletse. 9Saule a re: “Lereng kwano go nna tshupelo e e fisiwang, le ditshupelo tsa kagiso.” A isa tshupelo e e fisiwang. 10Ga dirala ya re a sena go fetsa go isa tshupelo e e fisiwang, bonang, Samuele a tla; mme Saule a tswa a ya go mo kgatlhantsha gore a mo dumedise. 11Samuele a re: “O dirile eng?” Saule a re: “Ke ka gonne ka bona fa batho ba mphatlalaletse, le gore, wena o sa tle ka malatsi a a kailweng, le gore gape, Bafilisitia ba phuthegela mmogo mo Mikemaša; 12ke gone ke buileng ka re: ‘Jaanong Bafilisitia ba tlaa ntshologela kwa Gilegale,’ mme ka bo ke ise ke rapele Jehofa ke lope tlhogonolofatso; ke gone ka moo ka ipatelela, ka isa tshupelo e e fisiwang.”
13Samuele a raya Saule a re: “O dirile boeleele; ga o a tshegetsa taolo ya ga Jehofa Modimo wa gago, e o e go laoletseng; ka gobo jaana Jehofa o ka bo a go tlhomamiseditse bogosi mo Iseraele ka bosakhutleng. 14Mme jaanong bogosi jwa gago ga bo ketla bo nnela ruri. Jehofa o itshenketse monna yo o ntseng ka fa pelong ya gagwe; e bile Jehofa o mo laoletse go nna kgosana ya batho ba gagwe, ka o ne o se ka wa tshegetsa se Jehofa o se go laoletseng.”
15Samuele a nanoga, a tswa Gilegale, a ya Gibea wa Benjamine. Saule a bala batho ba ba bonwang fa go ene, ba nna e ka ne e le banna ba ba 600. 16Saule le Jonathane morwawe, le batho ba ba bonwang fa go bone, ba nna mo Gibea wa Benjamine; Bafilisitia ba thibelela mo Mikemaša. 17Ba ba tsamayang bonokwane ba tswa mo bothibelelong jwa Bafilisitia ba le masomo mararo; lesomo lengwe la menogela kwa tseleng e e yang Ofera, kwa lefatsheng la Shuale, 18le lengwe la menogela kwa tseleng e e yang Bethehorone, le lengwe la menogela tseleng e e yang molelwaneng o o okameng molapo wa Seboime, ntlheng ya naga.
19Jaana go ne go sa bonwe mothudi ope go ya le lefatshe lotlhe la Iseraele; ka Bafilisitia ba rile: “Bahebere ba ka tla ba ithulela ditšhaka le marumo.” 20Baiseraele botlhe ba ne ba tle ba ye kwa go Bafilisitia, mongwe le mongwe a ye go batola mogoma wa gagwe, le mohana wa gagwe, le selepe sa gagwe, le kepu ya gagwe. 21Le fa go ntse jalo ba ne ba na le ditootso tsa go lootsa dikepu, le mehana, le ditlhabo tse di maphata, le dilepe, le go baakanya ditlhabi. 22Jalo ga dirala ya re mo letsatsing la tlhabano ga se ka ga fitlhelwa tšhaka, le fa e le lerumo mo seatleng sa ope wa batho ba ba nang le Saule le Jonathane; mme mo go Saule le Jonathane morwawe tsa fitlhelwa. 23Mme setlhopha sa masole a Bafilisitia sa tswela kwa phateng ya Mikemaša.
