1 DIKGOSI 8

₁Foo Solomone a phutha bagolwane ba Iseraele, le ditlhogo tsotlhe tsa ditso, dikgosana tsa makgotla a borraabo mo baneng ba Iseraele, a ba phuthela kwa go kgosi Solomone mo Jerusalema, go tla ba tlhatlosa letlole la kgolagano ya ga Jehofa mo motseng wa ga Dafite, o e leng Sione. ₂Banna botlhe ba Iseraele ba phuthegela kwa go kgosi Solomone kwa modirong, ka kgwedi ya Ethanime, e e leng kgwedi ya bosupa. ₃Bagolwane botlhe ba Iseraele ba tla mme baperesiti ba tsaya letlole. ₄Ba tlhatlosa letlole la ga Jehofa, le Mogope wa bophuthegelo, le dilwana tsotlhe tse di itshepileng tse di mo Mogopeng; e bong tsone tseo baperesiti le Balefi ba di tlhatlosa. ₅Kgosi Solomone le ba phuthego yotlhe ya Baiseraele, ba ba phuthegetseng kwa go ene, ba ne ba na nae fa pele ga letlole, ba isa ditlhabelo tsa dinku le dikgomo tse di sa kakeng tsa bolelwa le fa e le go balwa ka bontsi. ₆Baperesiti ba isa letlole la kgolagano ya ga Jehofa mo teng, kwa bonnong jwa lone, mo bobuelong jwa ntlo, mo felong ga boitshepo jo bo itshepileng, e bong fa tlase ga diphuka tsa botšheruba. ₇Gonne botšheruba ba ne ba tsharololetse bonno jwa letlole diphuka tsa bone, mme botšheruba ba khurumetsa letlole le disikaro tsa lone kwa godimo. ₈Disikaro di ne di le ditelele, dintlha tsa disikaro tsa ba tsa bonala motho a le mo felong ga boitshepo fa pele ga bobuelo; mme tsa bo di sa bonale motho a le kwa ntle; mme ke gone kwa di gone le gompieno. ₉Go ne go se na sepe mo letloleng, fa e se matlapa a mabedi a Moše a a tsentseng gone kwa Horebe, jale ka Jehofa a dira kgolagano le bana ba Iseraele, ka ba tswa mo lefatsheng la Egepeto.

₁₀Ga dirala ya re baperesiti ba sena go tswa mo felong ga boitshepo, leru la tlala ka ntlo ya ga Jehofa. ₁₁Baperesiti ba ba ba retelelwa ke go ema ba direla ka ntlha ya leru; gonne kgalalelo ya ga Jehofa e ne e tletse ka ntlo ya ga Jehofa. ₁₂Foo ga bua Solomone a re:

₁₄Kgosi ya retologa, ya segofatsa phuthego yotlhe ya Baiseraele, mme phuthego yotlhe ya Baiseraele ya ema ka dinao.

₁₅Mme a re: “A go bakweng Jehofa, Modimo wa Baiseraele, yo o ne a bua ka molomo le Dafite rre, o go diraditse ka letsogo la gagwe a re: ₁₆‘E sa le ka tsatsi le ke ntshitseng batho ba me Baiseraele mo Egepeto ka lone, ga ke a ka ka itshenkela motse mo ditsong tsotlhe tsa Iseraele go tla ke aga ntlo gone, gore leina la me le nne gone; mme ka itshenkela Dafite, gore a tle a nne molaodi wa batho ba me Baiseraele.’

₁₇“Jaana go ne go le mo pelong ya ga Dafite rre, go agela leina la Jehofa Modimo wa Iseraele ntlo. ₁₈Mme Jehofa a raya Dafite rre a re: ‘E re ka go le mo pelong ya gago go agela leina la me ntlo, o dirile sentle ka go ne go le mo pelong ya gago; ₁₉le fa go ntse jalo ga o ketla o aga ntlo eo; mme morwao yo o tlaa tswang mo meleng wa gago, ke ene yo o tlaa agelang leina la me ntlo.’

₂₀“Jehofa o tlhomamisitse lefoko la gagwe le o le buileng; gonne ke tsogile ke eme mo boemong jwa ga Dafite rre, ke dutse mo setulong sa bogosi sa Iseraele, jaaka Jehofa a boletse, mme ntlo ke e agetse leina la ga Jehofa, Modimo wa Iseraele. ₂₁Ke tlhomile gone bonno jwa letlole, le kgolagano ya ga Jehofa e mo go lone, e o ne a e dira le borraetsho, jale fa a ba ntsha mo lefatsheng la Egepeto.”

₂₂Solomone a ema fa pele ga sebeso sa ga Jehofa mo ponong ya phuthego yotlhe ya Baiseraele, a otlololela mabogo a gagwe kwa legodimong. ₂₃A re: “Jehofa, Modimo wa Iseraele, ga go na Modimo ope o o tshwanang nao, kwa legodimong kwa godimo, le fa e le mo lefatsheng kwano tlase; yo o tshegeletsang batlhanka ba gago kgolagano le boutlwelobotlhoko, e bong ba ba sepelang fa pele ga gago ka pelo yotlhe ya bone; ₂₄yo o tshegeleditseng motlhanka wa gago Dafite rre se o se mmoleletseng; ee, o ne wa bua ka molomo, mme o se diraditse ka letsogo la gago, jaaka go ntse gompieno. ₂₅Ke gone jaana, Jehofa, Modimo wa Iseraele, a ko o tshegeletse motlhanka wa gago Dafite rre, se o se mo solofeditseng wa re: ‘Ga go ketla go go tlhokafalela monna mo ponong ya me, yo o tlaa dulang mo setulong sa bogosi sa Iseraele; ke raya fa bana ba gago ba tlaa tlhokomela tsela ya bone, go sepela fa pele ga me jaaka o sepetse fa pele ga me.’ ₂₆Ke gone jaana, Modimo wa Iseraele, ke a go rapela, a lefoko la gago le ke le rurifadiwe, le o le buileng le motlhanka wa gago Dafite rre.

₂₇“A ruri Modimo o tlaa aga mo lefatsheng? Bona, legodimo le legodimo la magodimo ga le kake la nna bonno jo bo go lekanyeng; bogolo jang ntlo e ke e agileng! ₂₈Le fa go ntse jalo, a ko o tlhokomele morapelo wa motlhanka wa gago le mokokotlelo wa gagwe, Jehofa Modimo wa me, go reetsa pitso le morapelo o motlhanka wa gago o rapelang ka one gompieno fa pele ga gago; ₂₉gore matlho a gago a budulogele ntlo e bosigo le motshegare, e bong felo fa o buileng ka ga gone wa re: ‘Leina la me le tlaa nna gone’; go reetsa morapelo o motlhanka wa gago o tlaa rapelang ka one a lebile felo fa. ₃₀O tle o reetse mokokotlelo wa motlhanka wa gago, le wa batho ba gago Baiseraele, fa ba rapela ba lebile felo fa; ee, o tle o utlwe o le bonnong jwa gago kwa legodimong; mme o re o utlwa, o itshwarele.

₃₁“Fa motho a leofela wa ga gabo, fa go bewa ikano mo go ene go mo ikanisa, fa a tla a ikana fa pele ga sebeso sa gago mo ntlong e; ₃₂foo o tle o utlwe o le kwa legodimong, mme o dire, o atlhole batlhanka ba gago, o sekise moikepi, go tla o lere tsela ya gagwe mo tlhogong ya gagwe ka esi; o siamisetse mosiami tshiamo, go tla o mo naya ka fa tshiamong ya gagwe.

₃₃“E tlaa re fa batho ba gago Baiseraele ba kgemethwa fa pele ga mmaba, ka ntlha ya gonne ba go leofetse; fa ba boela mo go wena ba ipolela leina la gago, ba rapela, ba go kokotlela mo ntlong e; ₃₄foo o tle o utlwe o le kwa legodimong, mme o itshwarele boleo jwa batho ba gago Baiseraele, o ba busetse mo lefatsheng le o ne wa le naya borraabo.

₃₅“Fa legodimo le tswalegile, go se na pula ka ntlha ya gonne ba go leofetse; fa ba rapela ba go leofetse; fa ba rapela ba lebile felo fa, ba ipolela leina la gago, ba hularela boleo jwa bone, ka o ba utlwisa botlhoko, ₃₆foo o tle o utlwe o le kwa legodimong, mme o itshwarele boleo jwa batlhanka ba gago, le jwa batho ba gago Baiseraele, ka o ba ruta tsela e e molemo e ba tshwanetseng go sepela mo go yone; o nese pula mo lefatsheng la gago, le o le neileng batho ba gago go nna boswa.

₃₇“Fa go le mmopamo mo lefatsheng, fa go le kgogodi, fa go le tshubego, kgotsa mapote gongwe tsie, kgotsa seboko, fa baba ba bone ba ba tlhasela mo lefatsheng la metse ya bone; le fa go ka bo go le sebetso sefe, le fa go ka bo go le botlhoko bofe; ₃₈le fa e ka bo e le morapelo le mokokotlelo ofe o o dirwang ke motho mongwe, kgotsa ke batho botlhe ba gago Baiseraele, ba mongwe le mongwe wa bone o tlaa itseng sebetso sa pelo ya gagwe tota, fa a otlolola mabogo a gagwe a lebile ntlo e; ₃₉foo o tle o utlwe o le bonnong jwa gago kwa legodimong, o itshwarele, o dire, o direle motho mongwe le mongwe ka fa ditseleng tsotlhe tsa gagwe, yo pelo ya gagwe o e itseng; (gonne wena, e bong wena wesi, o itse dipelo tsa bana ba batho botlhe fela); ₄₀gore ba tle ba go boife metlheng yotlhe e ba tshelang ka yone mo lefatsheng le o ne wa le naya borraabo.

₄₁“Gape ka ga moeng, yo e seng wa batho ba gago Baiseraele, e tlaa re fa a tswa lefatsheng le le kgakala ka ntlha ya leina la gago; ₄₂(gonne ba tlaa utlwa ka ga leina la gago le legolo, le ka ga seatla sa gago sa bonatla, le ka ga letsogo la gago le le otlologileng); fa a tla a rapela a lebile ntlo e; ₄₃o tle o utlwe o le bonnong jwa gago kwa legodimong, mme o dire ka fa go tsotlhe tse moeng a goelang koo go wena ka ga tsone; gore ditšhaba tsotlhe tsa lefatshe di itse leina la gago, go tla ba go boifa jaaka batho ba gago Baiseraele, le gore ba itse fa ntlo e ke e agileng e bidiwa ka leina la gago.

₄₄“Fa batho ba gago ba bololela baba ba bone ba ya go tlhabana nabo, le fa e ka nna tsela efe e o ba romang ka yone, fa ba rapela Jehofa ba lebile motse o o o itshenketseng, le ntlo e ke e agetseng leina la gago; ₄₅foo o tle o utlwe morapelo wa bone le mokokotlelo wa bone, o le kwa legodimong, mme o emele tshiamelo ya bone.

₄₆“Fa ba go leofela, (gonne ga go na motho ope yo o sa leofang), mme o nna bogale nabo, o ba neela baba, mme ba ba golega ba ba isa kwa lefatsheng la baba, kwa kgakala kgotsa fa gaufi; ₄₇le fa go ntse jalo fa ba ikgopodisa ba le mo lefatsheng le ba isitsweng kwa go lone ba golegilwe, fa ba sokologa, ba go kokotlela mo lefatsheng la bone ba ba ba tlositseng ba golegilwe, mme fa ba re: ‘Re leofile, re dirile ka bokgopo, re dirile ka boikepo’; ₄₈fa ba boela mo go wena ka pelo yotlhe ya bone, le ka mowa otlhe wa bone mo lefatsheng la baba ba bone, ba ba ba tlositseng ba golegilwe, fa ba go rapela ba lebile lefatshe la ga bone, le o ne wa le naya borraabo, motse o o o itshenketseng, le ntlo e ke e agetseng leina la gago, ₄₉foo o tle o utlwe morapelo wa bone le mokokotlelo wa bone o le bonnong jwa kwa legodimong, mme o emele tshiamelo ya bone. ₅₀O itshwarele batho ba gago ba ba go leofetseng, le ditlolo tsotlhe tsa bone tse ba go tloletseng mo go tsone; mme o ba neye go utlwelwa botlhoko ke ba ba ba tlositseng ba golegilwe, gore ba ba utlwele botlhoko; ₅₁gonne ke batho ba gago, le boswa jwa gago, jo o bo ntshitseng mo Egepeto, mo gare ga leiso la leubelo la tshipi.

₅₂“Gore matlho a gago a budulogele mokokotlele wa motlhanka wa gago, le mokokotlelo wa batho ba gago Baiseraele, go ba reetsa mogang ba goelang koo go wena. ₅₃Gonne o ne wa ba lomolola mo ditšhabeng tsotlhe tsa lefatshe, gore ba nne boswa jwa gago, jaaka o ne wa bua ka Moše motlhanka wa gago, jale ka o ntsha borraetsho mo Egepeto, wena Jehofa Modimo.”

₅₄Ga nna fela jaana, e rile Solomone a sena go wetsa go rapela morapelo o, le mokokotlelo o otlhe mo go Jehofa, a khubamologa fa pele ga sebeso sa ga Jehofa, a tloga mo go khubameng ka mangole a gagwe a otlololetse mabogo a gagwe legodimong. ₅₅A ema a segofatsa phuthego yotlhe ya Baiseraele ka lentswe le le tsholetsegileng a re: ₅₆“A go bakwe Jehofa yo o neileng batho ba gagwe Baiseraele boikhutso, ka fa go tsotlhe tse o di ba solofeditseng; ga go a tlhaela lefoko lepe la tsholofetso yotlhe ya gagwe e e molemo, e o ne a e solofetsa Moše motlhanka wa gagwe ka yone. ₅₇A Jehofa Modimo wa rona a nne le rona, jaaka a ne a ntse a na le borraetsho, a a se re tlogele le fa e le go re latlha; ₅₈gore a tle a sekegetse dipelo tsa rona kwa go ene, go sepela mo ditseleng tsotlhe tsa gagwe, le go tshegetsa ditaolo tsa gagwe, le melao ya gagwe, le dikatlholo tsa gagwe tse o di laoletseng borraetsho. ₅₉A mafoko a, a me, a ke dirileng mokokotlelo ka one fa pele ga Jehofa, a nne gaufi le Jehofa Modimo wa rona motshegare le bosigo, gore a emele tshiamelo ya motlhanka wa gagwe le tshiamelo ya batho ba gagwe Baiseraele, ka fa letsatsi lengwe le lengwe le tlaa lopang ka gone; ₆₀gore ditšhaba tsotlhe tsa lefatshe di itse gore Jehofa ke ene Modimo; go se na ope o sele. ₆₁Ke gone a dipelo tsa lona di nne boitekanelano le Jehofa Modimo wa rona, go sepela mo melaong ya gagwe, le go tshegetsa ditaolo tsa gagwe, jaaka go ntse gompieno.”

₆₂Mme kgosi, le Baiseraele botlhe nayo, ba isa tlhabelo fa pele ga Jehofa. ₆₃Tlhabelo ya ditshupelo tsa kagiso e Solomone o ne a e isetsa Jehofa e ne e le dikgomo di le 22 000, dinku di le 120 000. Jalo kgosi le bana botlhe ba Iseraele ba tshwaela Modimo ntlo ya ga Jehofa. ₆₄Ka tsatsi leo kgosi ya itshepisa bogare jwa lolwapa lo lo fa pele ga ntlo ya ga Jehofa, gonne o ne a isa gone tshupelo e e fisiwang, le tshupelo ya boupe, le mahura a ditshupelo tsa kagiso, gonne sebeso sa kgotlho se se fa pele ga Jehofa se ne se sa lekana go amogela tshupelo e e fisiwang le tshupelo ya boupe, le mahura a ditshupelo tsa kagiso.

₆₅Solomone a dira modiro ka lobaka loo le Baiseraele botlhe nae, phuthego e kgolo go tswa botsenong jwa Hamathe go ya molatswaneng wa Egepeto, fa pele ga Jehofa Modimo wa rona, malatsi a supa le malatsi a supa gape, e bong malatsi a le 14. ₆₆Ya re ka letsatsi le le ferang mebedi a naya batho tsela, mme ba boka kgosi, mme ba ya megopeng ya bone ba itumela, ba le pelo e e ipelang ka ntlha ya molemo otlhe o Jehofa o o supeditseng Dafite motlhanka wa gagwe, le Baiseraele batho ba gagwe.