1 DIKGOSI 10

₁E rile mohumagadi kgosi ya Sheba a utlwela tumedi ya ga Solomone ka ga leina la ga Jehofa, mohumagadi yoo a tla go mo lekisa ka dipotso tse di thata. ₂A tla mo Jerusalema a le lekoko le legolo thata, a na le dikamela tse di belesitseng ditswaiso, le gouta e le kgolo, le majana a a thata go rekwa. Ya re a fitlha kwa go Solomone a bua nae ka ga dilo tsotlhe tse di mo pelong ya gagwe. ₃Solomone a mmolelela dipotso tsotlhe tsa gagwe, go sa fitlhega sepe mo kgosing se o se kang a se mmolelela. ₄E rile mohumagadi kgosi ya Sheba a sena go bona botlhale jotlhe jwa ga Solomone le ntlo e o e agileng, ₅le dijo tsa lomati lwa gagwe lwa bojelo, le go dula ga batlhanka ba gagwe, le go ema ga badiredi ba gagwe, le diaparo tsa bone, le batsholela dinwelo ba gagwe, le botlhatlogo jo o tlhatlogelang kwa ntlong ya ga Jehofa ka jone; go bo go sa tlhole go le mowa ope mo go ene. ₆A raya kgosi a re: “Poledi e ke e utlwileng kwa lefatsheng la gaetsho ka ga ditiro tsa gago, le botlhale jwa gago, e ne e le poledi ya mmaanete fela. ₇Le fa go ntse jalo ga ke a ka ka dumela mafoko ao, go tsamaya ke tla, mme matlho a me a go bona. Bona, le fa e le bontlhanngwe ke ne ke sa bo bolelelwa: Botlhale jwa gago, le letlhogonolo la gago go feta tumedi e ke e utlwileng. ₈A bo batho ba gago ba le sego; go sego batlhanka ba ba gago ba ba tlholang ba eme fa pele ga gago, ba utlwa botlhale jwa gago. ₉A go bakwe Jehofa Modimo wa gago, yo o ne a itumela mo go wena, a go baya mo setulong sa bogosi sa Iseraele; e re ka Jehofa a ratile Baiseraele ka gale le ka gale, ke gone ka fa o ne a go dira kgosi ka gone, gore o tle o dire katlholo le tshiamiso.”

₁₀Mohumagadi a naya kgosi dikilokerame tsa gouta di le 4 000, le ditswaiso di le ditona thata, le majana a a thata go rekwa, ga go a ka ga tlhola go tla ditswaiso tse di letlotlo le le kanang ka le mohumagadi kgosi ya Sheba o ne a le naya kgosi Solomone.

₁₁Le lone lesomo la dikepe tsa ga Hirame tse di lerileng gouta e e tswang kwa Ofire, tsa tlisa letlotlo le legolo la ditlhare tsa maalamuga, le majana a a thata go rekwa, di tswa gone kwa Ofire. ₁₂Kgosi ya direla ntlo ya ga Jehofa, le ntlo ya kgosi maotwana ka ditlhare tsa maalamuga, le diharepe, le disaletare, a di direla baopedi; ga go a ka ga tlhola go tla ditlhare tsa maalamuga tse di ntseng jalo, le fa e le go bonwa, nako e sa le eno.

₁₃Kgosi Solomone a naya mohumagadi kgosi ya Sheba keletso yotlhe ya gagwe, sengwe le sengwe se o ne a se lopa, kwa ntle ga tse Solomone o ne a di mo naya fela ka go rata ga gagwe ga segosi, mohumagadi a hulara, a ya lefatsheng la ga gabo, ene le batlhanka ba gagwe.

₁₄Bokete jwa gouta e e neng e tla mo go Solomone ka ngwaga o le mongwe fela e ne e le dikilokerame tsa gouta di le 23 000, ₁₅kwa ntle ga e babapatsi ba ne ba a tlisa, le ya papalano ya barekisi ba bagolo, le ya dikgosi tsotlhe tsa batho ba ba tlhakatlhakanyeng, le ya balaodi ba lefatshe. ₁₆Kgosi Solomone a dira dithebe di le 200 tsa gouta e e papetlilweng ka noto; thebe nngwe le nngwe ya dirwa ka dikilokerame di supa tsa gouta e e papetlilweng ka noto. ₁₇A dira dithejana di le 300 tsa gouta e e papetlilweng ka noto, thejana nngwe le nngwe ya dirwa ka dikilokerame di le pedi tsa gouta; mme kgosi ya di tsenya mo ntlong ya Sekgwa sa Lebanone.

₁₈Gape kgosi ya dira setulo sa bogosi se segolo ka dinaka tsa tlou, a se manega gouta e e itshekileng thata. ₁₉Direpudi tse di tlhatlogelang setulong sa bogosi di ne di le thataro, setlhoa sa setulo se bopegile kgogoropo ka kwa morago; mme ga bo go le mabogo ka fa lotlhakoreng longwe le longwe fa bodulong, go eme ditau di le pedi ka fa mabogong. ₂₀Ga bo go eme gone ditau di le 12 mo direpuding tse thataro tsa serepudi ntlheng e nngwe le e nngwe; go ne go sa dirwa mo go ntseng jalo mo bogosing bope bo sele.

₂₁Le dinwelo tsotlhe tsa kgosi Solomone e ne e le tsa gouta, le dilwana tsa ntlo ya Sekgwa sa Lebanone e le tsa gouta e e sa pekwang; go se na dipe tsa selefera, selefera se ne se sa kaiwe sepe mo metlheng ya ga Solomone. ₂₂Gonne kgosi e ne e na le lesomo la dikepe tsa Tarešiše mo lewatleng di na le tsa ga Hirame. Dikepe tsa Tarešiše di ne di tle di tle gangwe fela mo dinyageng di le tharo, di tle le gouta, le selefera le dinaka tsa ditlou, le dikgabo, le diphikoko.

₂₃Kgosi Solomone a gaisa dikgosi tsotlhe tsa lefatshe ka dikhumo le ka botlhale. ₂₄Lefatshe lotlhe la rata go bona Solomone, go utlwa botlhale jwa gagwe jo Modimo o ne o bo tsentse mo pelong ya gagwe. ₂₅Motho mongwe le mongwe a tle le neo ya gagwe, dilwana tsa selefera, dilwana tsa gouta, diaparo, dibolao, ditswaiso, dipitse, bommoulo ka selekanyo ka ngwaga le ngwaga.

₂₆Solomone a phutha dikara le bapalama dipitse; o ne a na le dikara di le 1 400 le bapalama dipitse ba le 12 000, ba o ne a ba baya mo metseng ya dikara le mo Jerusalema, fa kgosing. ₂₇Mo Jerusalema kgosi ya tlisa selefera sa nna jaaka maje fela, le masetara a a tlatsa a nna jaaka ditlhare tsa masekamore tse di mo lefatsheng la melapo ka bontsi. ₂₈Dipitse tse Solomone o ne a na natso tsa tsewa kwa Egepeto; babapaledi ba kgosi ba di amogele di le makgathi, lekgathi lengwe le lengwe ka tlhatlhwa. ₂₉Kara e ne e tsewa e tswa kwa Egepeto ka dišekela tsa selefera di le 600, pitse e tsewa, e tswa ka 150; ga direlwa jalo dikgosi tsotlhe tsa Bahite, le dikgosi tsa Siria, tsa di tsaya gone ka bone e bong ka bapaledi.