1 BAKORINTHE 10

₁Gonne bagaetsho, ga ke rate lwa tlhoka go itse fa borraetsho ba ne ba le fa tlase ga leru botlhe, mme botlhe ba ralala lewatle; ₂botlhe ba kolobelediwa Moše mo lerung le mo lewatleng; ₃botlhe ba ja dijo di le dingwe fela tsa semowa; ₄botlhe ba nwa metsi a le mangwe fela a semowa; gonne ba ne ba nwa mo lefikeng lengwe la semowa le le ba setseng morago; mme lefika leo e ne e le Keresete. ₅Le fa go ntse jalo Modimo ga o a ka wa itumelela bontsi jwa bone; gonne ba ile ba ribigediwa mo nageng.

₆Jaana dilo tse e ne e le dikaelo tsa rona, gore re se ka ra eletsa dilo tse di bosula, jaaka bone ba kile ba di eletsa. ₇Le gone lo se ka lwa nna baobamedi ba medimo ya disetwa, jaaka bangwe ba bone; jaaka go kwadilwe ga twe: “Batho ba ne ba dulela go ja le go nwa, mme ba nanoga ba tshameka.” ₈Le gone a re se direng boaka, jaaka bangwe ba bone ba kile ba dira, mme ba swa ka letsatsi le le lengwe fela, ba le 23 000. ₉Le gone a re se lekeng Morena, jaaka bangwe ba bone ba kile ba mo leka, mme ba bolawa ke dinoga. ₁₀Le gone lo se ka lwa ngongorega, jaaka bangwe ba bone ba kile ba ngongorega, mme ba nyelediwa ke mosenyi.

₁₁Jaana dilo tse, di ba dirafaletse ka mokgwa wa sekaelo; mme tsa kwalwa gore di nne tlhagiso mo go rona, ba dikhutlo tsa metlha di wetseng mo go rona.

₁₂Ke gone yo o gopolang gore o eme, a itise gore a se ka a wa. ₁₃Ga lo a welwa ke thaelo epe e e sa ka keng ya itshokelwa ke motho, mme Modimo o boikanngo, o o se ketlang o lo lesa lwa raelwa ka mo go fetang nonofo ya lona; mme o tlaa re mo thaelong o lo baakanyetse kgoro ya phalolo le yone, gore lo tle lo bone go e itshokela.

₁₄Ke gone baratwa ba me, tshabang kobamelo ya medimo ya disetwa. ₁₅Ke bua jaaka fa go buiwa le batho ba ba botlhale; akanyang se ke se buang. ₁₆Senwelo sa tshegofatso se re se lebogelang, a ga se kabalano le madi a ga Keresete? Senkgwe se re se ngathoganyang, a ga se kabalano le mmele wa ga Keresete? ₁₇Ka rona ba re leng bantsi, re senkgwe se le sengwe fela, re mmele o le mongwe fela, gonne rotlhe re ja senkgwe se se leng sengwe fela.

₁₈Bonang Iseraele ka fa nameng. Ba ba jang ditlhabelo, a ga ba na kabalano le sebeso? ₁₉Ke a bo ke reng? A ke go re, se se isediwang modimo wa sesetwa setlhabelo ke selo sengwe, kgotsa modimo wa sesetwa ka osi ke selo sengwe? ₂₀Ka re, dilo tse Baditšhaba ba di isang ditlhabelo ba di isetsa badimo, e seng Modimo. Ga ke rate lwa bo lo na le kabalano le badimo. ₂₁Ga lo ka ke lwa nwa senwelo sa Morena, le senwelo sa badimo; ga lo ka ke lwa jela mo lomating lwa Morena, le mo lomating lwa badimo. ₂₂Kgotsa a ke go re, re fufanya Morena? A re thata bogolo go ene?

₂₃Dilo tsotlhe di letlelesegile; mme dilo tsotlhe ga di molemo go dirwa. Dilo tsotlhe di letlelesegile; mme dilo tsotlhe ga di agelele. ₂₄A go se nne motho ope yo o ipatlelang molemo fela, mme a mongwe le mongwe a batlele wa ga gabo molemo.

₂₅Tsotlhe tse di rekisiwang kwa botlhabelong lo di je fela, lo sa botse sepe ka ntlha ya segakolodi, ₂₆gonne lefatshe ke la Morena le botlalo jwa lone.

₂₇Fa mongwe wa ba ba sa dumelang a lo laletsa modiro, mme lo rata go ya; se lo se fiwang lo se je fela lo sa botse sepe, ka ntlha ya segakolodi. ₂₈Mme fa motho mongwe a lo raya a re: “Selo se, se ne se isitswe setlhabelo,” foo lo se ka lwa se ja, ka ntlha ya yo o se kaileng, le ka ntlha ya segakolodi. ₂₉Fa ke re segakolodi, ga ke reye sa gago, ke raya sa yo mongwe; gonne go itaola ga me go a bo go sekisediwang ka segakolodi sa o sele? ₃₀Fa ke ja ka tshegofatso, ke bolelwa ka bosula ka ntlha yang ka ga se ke se lebogetseng? ₃₁Ke gone, le fa loo ja, le fa loo nwa, le fa e ka bo e le eng se lo se dirang, tsotlhe, fela lo di direle kgaleletso ya Modimo. ₃₂Se kgopiseng bape, le fa e le Bajuta, le fa e le Bagerika, le fa e le phuthego ya Modimo; ₃₃fela jaaka le nna ke kgatlha batho botlhe mo dilong tsotlhe, ke sa itirele, mme ke direla ba ba leng bantsi, gore ba tle ba bolokwe.