Zakariya 6

₁Ndzi tlhela ndzi tlakusa mahlo, kutani ndzi vona makalichi ya mune ma huma hi le xikarhi ka tintshava timbirhi; tintshava ta kona a ti ri ta koporo. ₂Kalichi leyo sungula a yi kokiwa hi tihanci to tshwuka, leya vumbirhi hi tihanci ta ntima, ₃leya vunharhu hi tihanci to basa, kutani leya vumune a yi kokiwa hi tihanci ta mavalavala. ₄Kutani ndzi vutisa ntsumi leyi a yi vula-vula na mina ndzi ku: “We N'wini wanga, xana swilo leswi swi vula yini xana?” ₅Kutani ntsumi yi ndzi hlamula yi ku: “Leswi i mimoya ya mune ya le tilweni; a yi tile emahlweni ka N'wini wa misava hinkwayo, kutani sweswi ya hangalaka. ₆Kalichi leyi nga ni tihanci ta ntima yi kongoma etikweni ra le n'walungwini; leyi nga ni tihanci to basa, yi landza leyo sungula hi le ndzhaku; leyi nga ni tihanci ta mavalavala yona yi kongoma edzongeni.” ₇Tihanci leti to tiya a ti navela ku huma ti ya famba-famba ti valanga misava. HOSI Xikwembu xi ku ka tona: “Fambani mi ya valanga misava!” Kutani swi va tano. ₈Hiloko Xikwembu xi ndzi huwelela xi ku: “Tihanci leti kongomeke etikweni ra le n'walungwini, ti fikisile moya wa mina wa ku rhula kwale n'walungwini.”

₉HOSI Xikwembu xi ndzi lerisa xi ku: ₁₀“Amukela mihlengo ya lava nga vukhumbini, leyi tisiweke hi Helidayi, na Tobiya, na Yedaya; vanhu lava va ha ku fika va huma eBabilona; yana eka vona namuntlha, u ta va kuma emutini wa Yosiya n'wana Sofoniya. ₁₁Kutani u amukela eka vona silivhere ni nsuku, u endla harhi ha swona, u yi tlhandleka enhlokweni ya Yoxuwa muprista lonkulu, n'wana Yosadaki. ₁₂Kutani n'wi byele leswaku mina HOSI ya matimba hinkwawo ndzi ri:

₁₄Kutani harhi ya vuhosi yi ta vekiwa eTempeleni ya HOSI Xikwembu, yi tsundzuxa vanhu mintirho ya Helidayi, na Tobiya, na Yedaya, na Yosiya n'wana Sofoniya. ₁₅Hambi va ri lava nga kule, va ta ta va ta pfuna ku aka Tempele ya HOSI Xikwembu; kutani mi ta tiva leswaku HOSI ya matimba hinkwawo, hi yona yi ndzi rhumeke eka n'wina. Swilo leswi swi ta humelela loko mi tikarhatela ku yingisa rito ra HOSI Xikwembu xa n'wina.