Vutlhari 15

₁We Xikwembu xa hina, u tele tintswalo ni musa,

u lehisa mbilu ni ku fuma hi nsovo misava hinkwayo.

₂Hambiloko hi dyoha, hi tiva matimba ya wena, hi va wena.

Kambe a hi nga dyohi, hikuva hi tiva leswaku hi hlayiwa exikarhi ka vanhu va wena.

₃Ku lulama loku hetisekeke i ku tiva wena,

ku tiva matimba ya wena i masungulo ya vutomi lebyi nga heriki.

₄A hi xisiwangi hi leswo biha leswi kumiwaka hi vutivi bya vanhu,

kumbe hi leswi nga pfuniki nchumu leswi sasekisiweke hi pende hi muendli wa swona,

kumbe hi swikwembu swa hava leswi phamiweke

hi mavala yo hambana-hambana.

₅Ku vona kunene swilo leswi, ku pfuxa ku hiseka loko biha ka swiphukuphuku,

hikuva swona swi navela swifaniso leswi pfumalaka vutomi.

₆Lava endlaka swikwembu leswi, kumbe ku swi navela, kumbe ku swi gandzela,

va rhandza leswo biha,

va boheka ni ku tsemba leswo hava leswi.

₇Muvumbi wa timbita ú tirhisa vumba byo olova,

a vumba hi vukheta xibya xin'wana ni xin'wana leswaku hi xi tirhisa.

Swibya swin'wana leswi a swi endlaka swi tirhisiwa ku endla leswinene, swin'wana ku endla leswo biha,

kambe ú swi endla hinkwaswo hi vumba byin'we, a swi vumba hi ndlela yin'we.

Loyi a nyikaka swibya leswi mintirho ya swona

i muvumbi wa swona.

₈Hi yena munhu loyi na yena a vumbiweke hi ntshuri wa misava ku nga ri khale.

Hi yena loyi a nga ta tlhelela entshurini endzhaku ka nkarhinyana,

loko a fanela ku tlherisela moya lowu a wu lombiweke.

Hi yena loyi a onhaka ntirho wa yena hi ku vumba swikwembu leswi nga pfuniki nchumu

hi vumba lebyi a endlaka timbita ha byona.

₉A nga tsundzuki leswaku ú tswaleriwe ku fa,

ni leswaku ú ta hanya xinkarhanyana ntsena.

Ú phikisana ni vafuri va nsuku ni silivhere,

vafuri va koporo ú va encisa ku endla leswi va swi endlaka.

A tikurisa hi leswi a swi vumbaka,

kambe swo va swikwembu swa hava ntsena.

₁₀Mbilu ya yena yi endliwile hi nkuma, ritshuri ri tlula ku tshemba ka yena.

Vutomi bya yena byi tluriwa hi vumba,

₁₁hikuva ú tsandzekile ku tiva muvumbi wa yena,

loyi a huhuteleke emirini wa yena moya lowu hanyaka ni ku tirha.

₁₂A ehleketa leswaku ku hanya i ku tlanga ntsena,

a anakanya leswaku vutomi i bindzu ra ku engetela mali.

A vula leswaku ú fanele ku kuma mali hambi ku ri hi ndlela leyo biha.

₁₃Munhu loyi ú tiva ku tlula van'wana leswaku wa dyoha,

loko a tirhisa vumba byin'we ku endla swikwembu swa hava ni timbita leti fayekaka.

₁₄We HOSI Xikwembu, valala lava xaniseke vanhu va wena,

i vanhu lava tlulaka hinkwavo hi vuphukuphuku ni ku pfumala miehleketo ku tlula swihlangi.

₁₅Va anakanyile leswaku swifaniso swa vona swa manyala leswi vatliweke i swikwembu,

hambiloko swi ri ni mahlo lama nga voniki,

ni tinhompfu leti nga hefemuliki,

ni tindleve leti nga twiki,

ni tintiho leti nga khomiki,

ni milenge leyi nga fambiki.

₁₆Swi endliwile hi munhu,

swi vumbiwile hi loyi moya wa yena wu lombiweke.

A ku na munhu la nga endlaka xikwembu xa hava lexi fanaka na yena.

₁₇Munhu un'wana ni un'wana ú fanele ku fa,

kambe leswi hinkwaswo a swi endlaka hi mavoko yo homboloka ya yena, a swi tisanga vutomi ni siku ni rin'we.

A antswa ku tlula leswi a swi gandzelaka leswi pfumalaka vutomi,

hikuva yena ú na byona.

₁₈Valala va vanhu va wena va gandzela ni swiharhi swo nyenyetsa swinene,

leswi kalaka mano ku tlula swivumbiwa swin'wana hinkwaswo.

₁₉Naswona swiharhi swa kona, a swi sasekanga hi ndlela leyi swin'wana swi sasekeke ha yona.

Xikwembu xi swi tshikile, xi nga swi nkhensi kumbe ku swi katekisa.