Tobiti 6

₁Kavaloko Tobiya na Rafaele va khoma ndlela leyi kongomaka eMediya, kutani mbyana ya Tobiya a yi famba na vona. Va famba ku kondza dyambu ri pela, kutani va gova kusuhi ni nambu wa Tigrisi. ₂Tobiya a ngirimela ku ya hlamba enambyeni lowu, loko xikan'we nhlampfi leyikulu yi tlula yi huma ematini, yi ringeta ku n'wi khoma hi nenge. Tobiya a kalakala, ₃kutani ntsumi Rafaele a ku ka yena: “Khoma nhlampfi yeleyo! U nga yi tshiki yi baleka.”

Tobiya a khoma nhlampfi leyi, a yi humesela eribuweni ra nambu.

₄Ntsumi yi ku ka yena: “Boxa nhlampfi leyi u teka mbilu ya yona, ni xivindzi xa yona, ni nyongwa ya yona. Swi hlayise, i murhi. Marhumbu wona ma cukumete.”

₅Kutani Tobiya a endla hilaha ntsumi yi n'wi leriseke hakona. Endzhaku ka swona, Tobiya a ya oxa nhlampfi leyi endzilweni, kutani va dya xiphemu xin'wana xa yona. Leyi seleke a yi lunga hi munyu ti va timbuva ta riendzo ra vona.

Kutani Tobiya na Rafaele va ya emahlweni ni riendzo ra vona ku kondza va fika ekusuhi ni tiko ra le Mediya. ₆Kutani Tobiya a vutisa ntsumi a ku: “Azariya makwerhu, xana xivindzi ni mbilu ni nyongwa swa nhlampfi swi nga hanyisa vuvabyi byihi?”

₇Ntsumi yi ku ka yena: “Mbilu ni xivindzi swi tirhisiwa ku hlongola demona kumbe moya lowo biha eka munhu, swa hisiwa. Musi wa swona wu mbulukela munhu yoleyo a xanisekaka, kutani demona kumbe moya lowo biha swi n'wi sukela xikan'we. A va a nga ha tlheli a karhateka ni siku ni rin'we. ₈Hi nyongwa yona, u nga tshungula munhu loyi a nga ni mapapa yo basa ematihlweni, wo n'wi chucha matihlo hi yona. Endzhaku u ma wupfuta, kutani munhu loyi ú ta tlhela a vona.”

₉Loko Tobiya na Rafaele va fika kusuhi na Ekibatana etikweni ra Mediya, ₁₀Rafaele a ku ka Tobiya: “Tobiya makwerhu!”

Tobiya a ku: “Ina, swi lo yini?”

Rafaele a ku ka yena: “Vusiku bya namuntlha hi ta ya tshama endlwini ya xaka ra ka n'wina Raguwele. Raguwele ú na n'wana un'we ntsena wa xisati loyi a thyiweke Sara. ₁₁Kutani leswi u nga wena ntsena xaka ra ka vona ra xiviri, u ni fanelo ku n'wi teka a va nsati wa wena ni ku va mudyandzhaka wa hinkwaswo leswi tata wa yena a nga na swona. ₁₂Nhwana loyi ú tlharihile, ú ni vunhenha, naswona ú sasekile swinene. Tata wa yena i munhu lonene. Vusiku byebyi ndzi ta kombela Raguwele ku ku nyika Sara a va nsati wa wena. Hakunene ú ta pfumela, kutani loko ndzi vuya hi le Rhage, hi ta dya nkhuvo wa vukati bya n'wina. Raguwele a nga ka a nga ali, ù ta pfumela leswaku u n'wi teka, naswona a nga ka a nga n'wi nyiketi eka wanuna un'wana. Loko a endla tano, ú ta fanela hi ku avanyiseriwa rifu hi ku ya hi nawu wa Muxe. Raguwele wa swi tiva leswaku hi wena ntsena loyi u nga ni fanelo yo teka n'wana wa yena ni ku va mudyandzhaka wa hinkwaswo leswi a nga na swona. Hikokwalaho, twana leswi ndzi ku byelaka. Raguwele na mina hi ta vulavurisana hi mhaka leyi, hi ta twanana leswaku Sara a vutiwa hi wena. Loko hi tlhelela emutini wa Rhage, hi ta muka na Sara.”

₁₃Kutani Tobiya a ku ka yena: “Azariya makwerhu, ndzi twile leswaku nhwana loyi a a tekiwile hi vavanuna va 7 hi ku landzelana ni leswaku hinkwavo va lovile enhangeni ya yena va nga si n'wi hlomisa. ₁₄Ndzi twile leswaku va dlayiwile hi demona. Demona leri a ri n'wi vavisi Sara, hikuva ra n'wi rhandza, kambe ri dlaya wanuna un'wana ni un'wana loyi a ringetaka ku n'wi tshinelela. Demona leri ndza ri chava. Ndzi ndzexe eka tatana, kutani loko ndzo fa, vatswari va mina va ta fa hi gome. Va hava n'wana un'wana wa ku va lahla.”

₁₅Kambe ntsumi yi ku: “Xana u rivarile switsundzuxo swa tata wa wena ke? Ú ku lerisile ku teka ensati exikarhi ka maxaka ya ka n'wina. Sweswi ndzi yingise swinene. U nga vileri hikwalaho ka demona leri. Teka Sara a va nsati va wena. Ndza swi tiva leswaku vusiku byebyi bya namuntlha Raguwele ú ta ku nyika Sara ku va nsati wa wena. ₁₆Loko u nghena laha Sara a etlelaka kona, teka swichupuchupu swa mbilu ni xivindzi swa nhlampfi leyi. U swi tlhandleka ehenhla ka makala yo vuvumela ya murhi wa risuna, ₁₇leswaku musi wa kona wu ta hangalaka hinkwako ekamarini. Loko demona leri ri twa ku nun'hwa ka musi lowu, ri ta balekela ekule, ri nga ha vuyi. Kambe loko wena na Sara mi nga si etlela swin'we, hivumbirhi bya n'wina rhangani hi ku khongela Xikwembu-xa-le-henhla-henhla leswaku xi mi twela vusiwana ni ku mi sirhelela. U nga chavi nchumu, hikuva Sara ú endleriwile wena ku sukela khale ka khaleni. U ta n'wi ponisa emavokweni ya demona leri, kutani u ta muka na yena. Wena na Sara mi ta veleka vana lavo tala lava mi nga ta va rhandza swinene. Hikokwalaho u nga vileri!”

Loko Tobiya a twa marito lawa, a tala hi rirhandzu ro rhandza Sara, kutani a fa hi ku n'wi navela.