Risimu ra Tinsimu 5

₁Ndzi ta entangeni wa mina, murhandziwa,

we nhwana wanga,

ndzi ta hlengeleta mafurha ya mirha ni swinun'hweriso swa mina,

ndzi dya swihlenge swa mina ni vulombe bya swona,

ndzi nwa vhinyo ya mina ni ntswamba wa mina.

N'wina vanakulorhi, dyanani mi nwa,

nwanani mi kolwa, n'we vanghana.

₂A ndzi etlele, kambe mbilu a yi nga ri kona evurhongweni.

Ndzi twa ku gongondza ka murhandziwa:

Ú ri: “Ndzi pfulele murhandziwa, we xiluva xanga,

wena xituvana xa mina lexi hetisekeke,

hikuva nhloko ya mina yi tsakamile hi mberha,

misisi ya mina yi thoneriwile hi mathonsi ya vusiku.”

₃Mina ndzi ku: “Ndzi hluvurile,

xana ndzi fanele ku tlhela ndzi ambala ke?

Ni milenge, ndzi hlambile,

xana ndzi fanele ku tlhela ndzi yi thyakisa ke?”

₄Hiloko murhandziwa wa mina a khoma rivanti,

mbilu ya mina yi khapa hi ntsako,

₅kutani ndzi pfuka, ndzi ya pfulela murhandziwa wa mina.

Loko ndzi khoma rivanti,

swandla swa mina swi thona-thona mafurha ya mirha,

lama nga tintihweni wona ma xiririka kunene.

₆Ndzi pfulela murhandziwa wa mina,

kambe a a sukile a famba.

Loko a hundzuluka a ndzi komba xikosi, ndzi helela hi matimba.

Ndzi n'wi lavile, kambe a ndzi n'wi kumanga,

ndzi n'wi vitanile, kambe a nga pfumelanga.

₇Ndzi hlanganile ni varindzi,

loko va ri karhi va rhendzeleka ni muti,

va ndzi ba, va ndzi vavisa,

va ndzi tekela ni nceka wa mina.

₈N'wina vanhwanyana va Yerusalema, ndza mi kombela,

loko mi kuma murhandziwa wanga,

n'wi byeleni leswaku rirhandzu ra mina

eka yena, ra ndzi vabyisa.

₉Leswi u ngo kala u hi kombela hi ndlela leyi,

xana murhandziwa wa wena wo tlula varhandziwa va van'wana xana?

Wena mbhurhi ya timbhurhi,

xana murhandziwa wa wena ú tlula van'wana hi yini?

₁₀Murhandziwa wa mina ú yimekile, a tlhela a saseka,

ú hlawulekile exikarhi ka madzana-dzana.

₁₁Nhloko ya yena i nsuku lowu tengeke,

misisi ya yena yi songekile,

yi ni ntima wa wukuwuku.

₁₂Mahlo ya yena ma fana ni ya matuva

etlhelo ka swihlovo swa mati,

matuva lama tlhambukeriweke hi ntswamba,

ma tshamisekile hi fanelo.

₁₃Tinhlaya ta yena ti fana ni ntanga wa swinun'hweriso

leswi humesaka ku nun'hwela ko tsakisa.

Milomo ya yena i swiluva

leswi ntontaka mafurha ya mirha.

₁₄Mavoko ya yena i nsuku lowu vumbekeke,

lowu sasekisiweke hi maribye ya nkoka.

Miri wa yena wu rhetela ku fana ni matino ya ndlopfu,

lama nameketiweke maribye ya nkoka ya safiri.

₁₅Milenge ya yena i tiphuphu ta maribye yo rhetela,

leti tlhomiweke eminkotlotweni ya nsuku.

Xivumbeko xa yena xi fana ni ntshava ya Lebanoni,

xi hlawulekile ku fana ni mirhi ya Kedari.

₁₆Ku vulavula ka yena ku tsokombela ngopfu,

vuyena byakwe hinkwabyo bya rhandzeka swinene.

N'wina vanhwanyana va Yerusalema,

loyi hi yena murhandziwa wa mina, yena munghana wanga.