Risimu ra Tinsimu 4

₁Murhandziwa, u mpama, wo va mbhurhi ya ku vatlwa;

endzeni ka nturhu, mahlo ya wena ma fana ni ya matuva;

misisi ya wena yi fana ni ntlhambi wa timbuti

leti rhelelaka ti suka entshaveni ya Giliyadi.

₂Meno ya wena ma vangama ku fana ni tinyimpfu

leta ha ku tsemetiwaka voya, ti hlambisiwa,

leti tswalaka ha swimbirhi-mbirhi,

ni yin'we ya tona a yi fisi.

₃Milomo ya wena ya ku fanela,

ni xinon'wana xa wena xi vumbekile.

Marhama ya wena endzeni ka nturhu

ma fana ni magrenada mambirhi.

₄Xinhan'wana xa wena onge i xihondzo xa Davhida

lexi akiweke hi maribye,

laha ku hayekiwaka switlhangu swa madzana-dzana,

hinkwaswo swi ri swa tinghwazi.

₅Mavele ya wena hi vumbirhi bya wona

ma fana ni swimbavalana swimbirhi

leswi tswariweke siku rin'we,

swi dyelaka exikarhi ka swiluva.

₆Ndzi ta titshamela entshaveni ya mirhi ya mirha,

ni le xitsungeni xa mirhi ya risuna,

vurhonga byi ko byi tshwuka,

ni dyambu ri ko ri tlhava.

₇Murhandziwa, u xongile swinene,

a xi kona lexi solekaka eka wena.

₈Suka la Lebanoni, hi famba swin'we, wena nhwana wa mina,

a hi fambe swin'we hi suka laha Lebanoni.

Sukela nhlohlorhi ya ntshava ya Amana,

ni ya Seniri ni ya Hermoni,

u huma ekheleni ra tinghala,

u suka ni le tintshaveni ta tiyingwe.

₉U ndzi yivile mbilu, we murhandziwa, nhwana wanga;

loko u ndzi tlhava hi tihlo, wa ndzi tsakisa,

vuhlalu lebyi u byi ambaleke byi ndzi koka mahlo.

₁₀Rirhandzu ra wena, a hi ku tsokombela ka rona murhandziwa, we nhwana wanga,

vhinyo a yi fiki eka rirhandzu ra wena hi ku tsokombela,

ku nun'hwela ka mafurha lawa u ma tolaka

ku tlula swinun'hweriso hinkwaswo.

₁₁Milomo ya wena yi ntonta vulombe, we murhandziwa;

ehansi ka ririmi ra wena ku ni swihlenge ni ntswamba,

ku nun'hwela ka swiambalo swa wena

ku fana ni ku nun'hwela ka Lebanoni.

₁₂Murhandziwa, ye nhwana wanga, i ntanga lowu biyeleriweke,

o va wona hakunene! I xihlovo lexi funengetiweke.

₁₃I ntanga lowu milaka mirhi ya magrenada,

ni mihandzu hinkwayo leyo nandziha,

ku katsa ni swimidyana swa swinun'hweriso swa hena na narda,

₁₄na safroni, na khalamusi, na kinamoni,

ni mirhi hinkwayo ya risuna,

ni mirha, ni mhangana,

ni swinun'hweriso hinkwaswo swa nkoka.

₁₅I xihlovo xa le ntangeni,

xihlovo xa mati lama pfelelaka,

i xinambyana lexi khulukaka, xi khuluka xi huma eLebanoni.

₁₆We moya wa le n'walungwini, pfuka,

na wena moya wa le dzongeni, tana!

Hungelani entangeni wa mina, mi hangalasa ku nun'hwela ka wona,

leswaku murhandziwa a ta ta entangeni wa yena,

a ta dya mihandzu ya wona leyo nandziha.