Siraka 7

₁N'wananga, u nga dyohi, kutani xidyoho xi ta va kule na wena.

₂Papalata leswo homboloka, kutani swi ta hambana na wena.

₃U nga byali mbewu ya vuhomboloki,

kutani a wu nga byi tshoveli ka 7.

₄U nga kombeli xiyimo xa le henhla eka HOSI Xikwembu,

kumbe ku vekiwa exikarhi ka lava va mavito eka mufumi wa tiko.

₅U nga tshuki u ringeta ku khorwisa HOSI Xikwembu leswaku u lulamile,

kumbe ku komba vutlhari bya wena eka mufumi.

₆U nga vi ni makungu ya ku va muavanyisi,

hikuva u ta tsandzeka ku herisa vuhomboloki,

u ta ya hi nghohe loko u avanyisa nkulukumba,

kutani u tivangela ku soriwa.

₇U nga tshuki u dyohela vanhu van'wana,

u nga tikhomisi tingana emahlweni ka vona.

₈U nga tshuki u dyoha hi ndlela yin'we kambirhi,

u ta biwa hambi loko u dyoha kan'we.

₉U nga tshuki u ku: “Xikwembu xa le henhla-henhla xi ta ndzi nkhensa hikwalaho ka tinyiko leto tala ta mina,

kutani loko ndzi xi humesela gandzelo, xi ta ri amukela.”

₁₀U nga tshuki u karhala ku khongela,

u nga rivali ku pfuna swisiwana hi tinyiko.

₁₁U nga tshuki u hleka la tsongahatiweke,

hikuva i Xikwembu lexi tsongahataka ni ku tlakusa munhu.

₁₂U nga lumbeti makwenu,

hambi ku ri ku lumbeta munghana.

₁₃U nga toloveli ku hemba,

hikuva ku vulavula mavunwa i swa hava.

₁₄U nga tshuki u vulavula ngopfu enhlengeletanweni ya vakulukumba va tiko,

ni loko u khongela, u nga tati marito.

₁₅U nga tshuki u chava mintirho leyo karhata ni ya masimu,

leyi nga mintirho leyi Loyi a nga henhla-henhla a hi nyikeke yona.

₁₆U nga tinghenisi eka ntlawa wa vadyohi,

tsundzuka leswaku Xikwembu a xi hlweli ku va ba.

₁₇Titsongahate swinene,

hikuva hinkwerhu hi ta fa ni ku bola.

₁₈U nga xengi munghana hi ku lava mali,

hambi makwenu hi ku tshembisiwa nsuku hinkwawo wa le Ofiri.

₁₉U nga hlweli ku teka nsati wo lulama loyi a tlhariheke.

Nsati wa vumunhu ú tlula nsuku hi nkoka.

₂₀U nga tshuki u xanisa nandza la tirhaka hi ku hetiseka,

kumbe muthoriwa loyi a ku tshembaka.

₂₁Rhandza nandza lowo tlhariha [kukota loko u tirhandza,]

u nga n'wi aleri loko a lava ku ntshunxeka.

₂₂Loko swifuwo swa wena swi ku vuyisela mali,

swi hlayise.

₂₃Loko u ri ni vana va xinuna, va laye

ni ku va khotsa nhamu loko va ha ri vatsongo.

₂₄Loko u ri ni vana va xisati,

vona leswaku va tshama va tengile,

u nga va pfumeleli ku endla leswi va swi lavaka.

₂₅Loko u kumela n'wana wa wena wa xisati enuna, u ta va u hetile ntirho lowukulu,

kambe n'wi nyike wanuna wa miehleketo leyinene.

₂₆Loko u ri ni nsati loyi a ku tsakisaka, u nga n'wi tshiki,

kambe u nga tshuki u tinyiketa eka loyi u nga n'wi rhandziki.

₂₇Xixima tata wa wena hi mbilu ya wena hinkwayo,

u nga rivali hilaha mana wa wena a tweke ku vava hakona loko a ku veleka.

₂₈Tsundzuka leswaku vutomi bya wena byi huma eka vona.

Xana u nga va nkhensa ha yini eka leswi va ku endleleke swona?

₂₉Chava HOSI Xikwembu hi mbilu ya wena hinkwayo,

xixima ni vaprista va xona.

₃₀Rhandza Muvumbi wa wena hi matimba ya wena hinkwawo,

seketela ni malandza ya yena.

₃₁Chava Xikwembu, u xixima vaprista,

u va yisela leswi u lerisiweke ku va nyika swona:

leswi u nga ta rhanga u swi tshovela emasin'wini ya wena, ni mhamba yo susa swidyoho, ni makatla ya swifuwo swa magandzelo,

ni mavele lama hlawulekeke ya magandzelo, ni mihandzu leyi rhangaka ku vupfa ya swilo leswi hlawulekeke.

₃₂Pfuna swisiwana,

kutani HOSI Xikwembu xi ta ku katekisa swinene.

₃₃Nyika vanhu hinkwavo hi ku hanana,

u xixima lava feke.

₃₄Twela lava feriweke vusiwana,

u rila na vona.

₃₅U nga kanakani ku endzela vavabyi,

hikuva u ta rhandziwa hikwalaho ka swona.

₃₆Tshama u ri karhi u anakanya leswaku siku rin'wana na wena u ta fa,

kutani a wu nga dyohi ni siku ni rin'we.