Siraka 43

₁Matilo yo basa lama hatimaka ma sasekile njhani!

Ku dzuneka ka wona ku tsakisa mahlo!

₂Loko dyambu ri huma ri twarisa

leswaku ntirho wa mavoko ya Loyi a nga henhla-henhla wu sasekile.

₃Ninhlekanhi ri omisa misava;

ku hava loyi a nga balekaka ku hisa ka rona.

₄Loko ri pela ri tshivela ndzilo etinhlohlorhini ta swintshabyana,

tanihi khele ra ndzilo ro hisa leri pfurhaka ni ku hatima.

Ri humesela masana ya ndzilo,

ri tlunya mahlo ya vanhu hi ku hatima ka rona.

₅HOSI Xikwembu lexi tumbuluxeke dyambu i xikulu,

ri hatlisa ri famba endleleni ya rona hi ku landza xileriso xa xona.

₆Xikwembu xi endla leswaku n'weti wu komba ku hundza ka tinguva,

wu va xikombiso hilaha ku nga heriki xa ku tsema nkarhi.

₇N'weti wu komba masiku ya minkhuvo leyo hlawuleka.

Ku vonakala ka wona, loko wu basile, ka tsongahala.

₈“N'hweti” yi kuma vito ra yona eka n'weti.

Swi sasekile ku vona n'weti loko wu ri karhi wu basa siku rin'wana ni rin'wana,

wu va xikombiso xa mavuthu ya Xikwembu,

wu ri karhi wu voninga etilweni.

₉Ku vangama ka tinyeleti ku sasekisa tilo nivusiku,

ku khavisa tilo ra Xikwembu.

₁₀Hi ku lerisa ka Muhlawuleki, tinyeleti ti yima laha ti faneleke ku yima kona,

a ti timi timboni ta tona.

₁₁Vonani nkwangulatilo, mi dzunisa Mutumbuluxi wa wona.

Ku voninga ka wona ku sasekile swinene!

₁₂Tanihi vurha lebyi kongaka hi mavoko ya Loyi a nga henhla-henhla,

nkwangulatilo wu tata vugimamusi hi xirhendzevutana xa ku saseka.

₁₃Xikwembu xa lerisa, kutani ku wa gamboko,

xi rhumela rihati ku hetisisa ku avanyisa ka xona.

₁₄Vuhlayiselo bya tilo bya pfuriwa,

kutani mapapa ma huma eka byona tanihi tinyanyana leti hahaka.

₁₅Hi vuhosi bya xona, Xikwembu xi hlanganisa mapapa,

xi hundzuluxa mati ya va xihangu.

₁₆Loko xi humelela, tintshava ta ninginika,

mheho ya dzonga yi hunga hi ku landza xileriso xa xona.

₁₇Loko xi vulavula, tilo ra duma,

bubutsa leri humaka en'walungwini ni swidzedze swi vavisa misava.

Xi nisa gamboko ri hangalaka tanihi tinyanyana leti hahaka,

yi wa tanihi tinjiya leti xikelaka emisaveni.

₁₈Ku saseka ka gamboko ka hi hlamarisa,

hi languta hi ku hlamala loko ri wa.

₁₉Xi phuphutela gwitsi emisaveni tanihi munyu,

kutani loko ri gwitsila ri hundzuka swiluva swa xirhami.

₂₀Xi vanga mheho yo titimela leyi humaka en'walungwini,

kutani mati ma hundzuka xirhami.

Mativa lamakulu ni lamatsongo ma gwitsila,

ma funengetiwa hi xilo xo titimela lexi fanaka ni xisirhelelo xa nsimbhi.

₂₁Xi omisa tintshava ta mananga hi dyandza,

kutani byanyi byi vuna hi ku hisa.

₂₂Kambe hunguva yi pfuxa hinkwaswo;

loko mberha yi wa, yi titimeta hinkwaswo.

₂₃Xi miyeta malwandle lamakulu,

kutani xi veka swihlala exikarhi ka wona.

₂₄Vatluti va hi byela ta makhombo ya lwandle,

kutani timhaka ta vona ta hi hlamarisa.

₂₅Elwandle ku hanya swivumbiwa swo hambana-hambana leswi hlamarisaka swinene

ni swiharhi leswikulu swo chavisa.

₂₆Un'wana ni un'wana wa varhumiwa lava va Xikwembu ú hetisa xikongomelo xa yena.

Xikwembu xi hlayisa swilo hinkwaswo hi rito ra xona.

₂₇Hambiloko hi ya mahlweni ni ku vulavula swo tala hi nge fiki emakumu ka swona,

kutani hinkwaswo leswi swi vula leswaku Xikwembu i hinkwaswo.

₂₈Matimba ya ku xi dzunisa hi nga ya kuma kwihi?

Xi tlula swivumbiwa hinkwaswo swa xona hi vukulu.

₂₉Vukulu bya HOSI Xikwembu bya chavisa,

matimba ya xona ya hlamarisa swinene.

₃₀Hambiloko mi xi dzunisa hi matimba ya n'wina hinkwawo,

ku dzunisa ka n'wina ku nga ka ku nga ringani ni vukulu bya xona.

Hambiloko mi xi twarisa hi matimba ya n'wina hinkwawo minkarhi hinkwayo,

mi nga ka mi nga xi twarisi hilaha swi fanelaka hakona.

₃₁Xana I mani loyi a nga tshama a xi vona, kutani a hlamusela ta xona?

Xana i mani loyi a nga xi dzunisaka hilaha swi faneleke hakona?

₃₂Swihundla leswi tlulaka leswi hi swi vuleke a swi si paluxiwa,

hikuva hi tiva mintirho ya xona yi nga ri mingani ntsena.

₃₃HOSI Xikwembu xi tumbuluxile swilo hinkwaswo,

kutani xi nyikile lava xi khongelaka vutlhari.