Siraka 4

₁N'wananga, u nga tshuki u tsona xisiwana swilo swa ku hanya,

u nga hlweli ku pfuna loyi a kombelaka.

₂U nga xanisi la nga ni ndlala,

hambi ku ri ku hlundzukisa la pfumalaka.

₃U nga engeteli maxangu ya loyi a nga ku xanisekeni,

hambi ku ri ku tsona la kombelaka.

₄U nga ali ku nyika swilo eka mukomberi loyi a weleke ekhombyeni,

hambi ku ri ku tshika xisiwana.

₅U nga fularheli mupfumari,

hambi ku ri ku n'wi xanisa ku ko a ku rhukana,

₆hikuva loko a ku rhuketela ú le ku vavisekeni,

Muvumbi wa yena ú ta yingisa xikhongelo xa yena.

₇Tiendle la rhandziwaka esinagogeni,

u titsongahata emahlweni ka lava nga ni xiyimo xa le henhla.

₈Rhiyela xisiwana ndleve,

xi hlamule hi ku rhula ni musa.

₉Lamulela vanhu eka lava lavaka ku va xanisa,

loko u avanyisa mhaka, u nga heli mbilu.

₁₀Tikombe tatana eka lava pfumalaka vatswari,

u pfuna tinoni hilaha vanuna va tona a va ti sirhelela hakona.

Hi ku endla sweswo u ta va n'wana wa Loyi a nga henhla-henhla,

kutani yena ú ta ku rhandza ku tlurisa leswi mana wa wena a ku rhandzisaka xiswona.

₁₁Vutlhari byi tlakusa vana va byona,

byi pfuna lava va byi navelaka.

₁₂Lava rhandzaka vutlhari, va rhandza ni vutomi,

lava vindzukaka ku byi lava, va ta tsaka ngopfu.

₁₃Loyi a byi hlayisaka, ú ta dzunisiwa,

HOSI Xikwembu xi ta n'wi katekisa hinkwako laha a fambaka kona.

₁₄Lava tirhelaka vutlhari i malandza ya Lowo Hlawuleka,

HOSI Xikwembu xi rhandza lava va byi rhandzaka.

₁₅Loyi a byi yingisaka, ú ta avanyisa matiko,

la byi rhiyelaka ndleve, ú ta hlayiseka.

₁₆Loyi a byi tshembaka, ú ta byi kuma,

byi ta va ndzhaka ya vatukulu va yena.

₁₇Eku sunguleni byi ta n'wi fambisa etindleleni to rhendzeleka-rhendzeleka,

byi n'wi vangela ku chava ni vutoya,

byi n'wi xanisa hi swilaveko swa byona,

ni ku n'wi ringa hi swileriso swa byona ku fika loko byi ta n'wi tshemba.

₁₈Endzhaku ka sweswo byi ta hatlisa byi ta eka yena ku n'wi tsakisa,

byi n'wi paluxela swihundla swa byona.

₁₉Kambe loko a dyoha, byi ta n'wi fularhela,

byi n'wi tshika a lova.

₂₀N'wananga, tisirhelele minkarhi hinkwayo, u tivonela eka leswo biha,

u nga tikhomisi tingana.

₂₁Ku tinyumisa swi vangela xidyoho,

kasi ku titsongahata ku tisa ku dzuneka ni xichavo.

₂₂U nga yi hi nghohe, hikuva swi ta ku vavisa,

kambe u nga pfumeli leswaku van'wana va humelela hi ku tsandzeka ka wena.

₂₃U nga tshiki ku vulavula hi nkarhi wa kona,

naswona u nga tumbeti vutlhari bya wena.

₂₄Vutlhari byi tiviwa eku vulavuleni,

ni vutivi byi paluxiwa hi marito.

₂₅U nga tshuki u kaneta ntiyiso ni siku ni rin'we,

tsundzuka leswaku a wu tivi hinkwaswo.

₂₆U nga vi ni tingana ku tivula swidyoho swa wena;

u nga tshuki u ringeta ku sivela nambu lowu khulukaka.

₂₇U nga pfumeli ku fambisiwa hi xiphukuphuku,

ni mahlweni ka mufumi, u nga yi hi nghohe.

₂₈Yima entiyisweni, hambiloko u nga fa hikwalaho ka swona.

HOSI Xikwembu xi ta ku lwela.

₂₉Hlela marito ya wena loko u vulavula,

u nga lolohi ni ku honisa swiendlo swa wena.

₃₀Emutini wa wena u nga vi tanihi nghala,

hambi ku ri ku tshamela ku kuma swihoxo eka malandza ya wena.

₃₁U nga vi loyi a tsakelaka ku nyikiwa ntsena,

u vuya u chava ku tlherisela, loko nkarhi wu fikile.