Xikhongelo xo khongelela Vaisraele
1We HOSI Xikwembu xa tilo ni misava,
hi langute, u hi twela vusiwana!
2Endla leswaku vanhu va matiko hinkwawo
va ku chava.
3Pfukela vanhu vambe,
kutani u va kombisa matimba ya wena.
4Tanihi laha va voneke ku hlawuleka ka wena loku humeleleke exikarhi ka hina,
endla leswaku na hina hi vona vukulu bya wena exikarhi ka vona.
5We HOSI Xikwembu, va dyondzise, tanihi loko na hina u hi dyondzisile,
leswaku ku hava Xikwembu xin'wana handle ka wena.
6Endla swikombiso leswintshwa ni mahlori lamantshwa,
hi kombe matimba lamakulu ya wena.
7Hlundzukela valala va wena ni ku va ba hi vukari bya wena,
u va dlayetela ni ku va herisa.
8Tsundzuka siku leri u ri hlawuleke, endla leswaku ri hatlisa ri humelela,
kutani endla leswaku vanhu va ta twarisa swihlamariso swa wena.
9Hi vukari bya wena herisa valala hinkwavo va wena lava saleke;
lava xanisaka vanhu va wena, va dlayetele hinkwavo.
10Fayetela tinhloko ta vafumi va valala
lava vulaka va ku: “Ku hava van'wana lava tlulaka hina hi vukulu emisaveni!”
11Hlengeleta tinyimba hinkwato ta Yakobo,
kutani u va tlherisela tiko leri u va nyikeke rona khale.
12We HOSI Xikwembu, twela vusiwana Vaisraele lava vuriwaka vanhu va wena,
lava u va hlawuleke ku va mativula ya wena.
13Tsetselela Yerusalema, muti wa wena lowo hlawuleka,
laha u hlawuleke ku tshama kona.
14Tata Tempele ya wena leyi nga entshaveni ya Siyoni hi ku dzuneka ka wena
ni tinsimu to dzunisa.
15Humesa vumbhoni eka vanhu va wena lava u va tumbuluxeke eku sunguleni,
kutani hetisa leswi vaprofeta va swi vuleke khale hi vito ra wena.
16Hakela lava va ku tshembaka,
u tiyisa vumbhoni bya vaprofeta va wena.
17We HOSI Xikwembu, yingisa swikhongelo swa malandza ya wena,
hi ku hetisisa marito ya Aroni loko a kombelerile vanhu va wena eminkateko.
Kutani vanhu va misava hinkwayo va ta tiva
leswaku hi wena HOSI Xikwembu xa minkarhi hinkwayo.
Ta ku hlawula nsati
18Munhu a nga dya swakudya swo hambana-hambana,
kambe swakudya swin'wana swi tlula swin'wanyana hi ku nandziha.
19Tanihi leswi ririmi ri kotaka ku tiva swihari swin'wana ni swin'wana hi ku dya nyama ya swona,
munhu loyi a tlhariheke ú kota ku tiva marito yo hemba loko a yingisa lava vulavulaka.
20Munhu wa miehleketo leyo homboloka ú vanga mahlomulo,
kambe munhu wa vutivi wa n'wi rihisela.
21Wansati ú hlawula wanuna un'wana ni un'wana ku va nuna wa yena,
kambe wanuna ú tikarhata swinene ku hlawula nsati wa yena.
22Ku saseka ka wansati swi tsakisa wanuna,
a ku na swin'wana leswi a swi navelaka ku tlula wansati wa vumbhurhi.
23Loko wansati a vulavula hi musa ni ku titsongahata,
nuna wa yena ú katekile ku tlula vanakulobye hinkwavo.
24Loko wanuna a teka nsati, ú tikumela xilo lexi tlulaka hinkwaswo leswi a nga na swona hi nkoka,
nsati loyi wa n'wi pfuna ni ku n'wi seketela hi ndlela leyi yi n'wi fanelaka.
25Loko munhu a nga biyelanga leswi a nga na swona, makhamba ma ta nghena ma yiva.
Loko munhu a pfumala nsati, wa tsendzeleka ni ku hefemuteka.
26Xana i mani loyi a tshembaka khamba leri hatlisaka ku rhendzeleka ni miti?
Kutani xana i mani loyi a nga tshembaka wanuna loyi a pfumalaka ndyangu,
loyi a etlelaka laha dyambu ri n'wi pelelaka kona ke?
