Milorho a yi vuli nchumu
1Xiphukuphuku xi xisiwa hi ku tshemba ka hava,
xi nyanyuriwa hi milorho.
2Munhu loyi a tshembaka milorho,
ú fana ni loyi a lavaka ku khoma ndzhuti kumbe mheho.
3Swivono leswi voniwaka emilorhweni
swi fana ni xikandza xa wena lexi u xi vonaka exivukwini.
4I mani la nga humesaka swilo leswo tenga eka leswi nga tengangiki xana?
I mani la nga humesaka swilo leswi nga kona eka leswi nga riki kona xana?
5Milorho, ni vungoma, ni swihlohlwa a swi pfuni nchumu,
eka swona u vona ntsena leswi u swi lavaka.
6Handle ka loko yi rhumiwile hi Loyi a nga henhla-henhla,
u nga yi tshembi.
7Milorho yi xisile vanhu lavo tala,
yi onhile makungu ya lava pfumelaka eka yona.
8Nawu wa Xikwembu wu hetisekile handle ka swilo leswi swo hemba,
ni vutlhari lebyi vulavuriwaka hi loyi a lulameke, byi hetisekile handle ka swona.
Ta ku endza
9N'wendzi loyi a endzaka ngopfu, ú tiva swilo swo tala,
kutani munhu wa vutivi ú vulavula hi ku twisisa.
10Loyi a nga hava vutivi, ú tiva swilo switsongo ntsena,
kambe loyi a endzaka ú engetelela vutlhari bya yena.
11Eku famba-fambeni ka mina ndzi vonile leswo tala,
kutani a ndzi koti ku hlamusela hinkwaswo leswi ndzi swi dyondzeke.
12A ndzi fanerile ku va ndzi file minkarhi yo tala,
kambe ndzi phonyokile hikwalaho ka vutivi lebyi ndzi nga na byona.
Ta ku chava Xikwembu
13Lava chavaka Xikwembu va ta hanya,
hikuva ku tshemba ka vona ku le ka loyi a va ponisaka.
14Loyi a chavaka Xikwembu a nga ka a nga nyumi,
ni ku va toya, hikuva ú tshemba xona ntsena.
15Ku katekile loyi a chavaka Xikwembu!
Xana ú languta eka mani, naswona ú pfuniwa hi mani?
16Vonani, HOSI Xikwembu xi hlayisa hinkwavo lava va xi rhandzaka,
xi va sirhelela ni ku va pfuna hi matimba,
xi va sirhelela eka mumu, xi va ndzhuti wa vona ninhlekanhi,
xi va sivela ku khuguka ni ku wa.
17Xa va katekisa ni ku va tsakisa,
xi va hanyisa ni ku va nyika vutomi.
Ta ku humesa magandzelo
18Loko munhu a humesela Xikwembu gandzelo ra swilo
leswi a swi kumeke hi ku homboloka, gandzelo rolero ri nyamile.
Tinyiko ta muhomboloki a ti amukeleki.
19Loyi a nga henhla-henhla a nga tsakisiwi hi magandzelo ya vahomboloki;
swidyoho swa vona swi nga ka swi nga rivaleriwi hi ku humesa magandzelo ya ntsandza-vahlayi.
20Munhu loyi a yivaka xifuwo xa xisiwana ku humesa gandzelo,
ú fana ni munhu loyi a dlayaka n'wana emahlweni ka tata wa yena.
21Swakudya i vutomi eka swisiwana,
loyi a swi tekelaka swakudya leswi, wa swi dlaya.
22Ku tekela munhukuloni swilo swa yena
kumbe ku n'wi tsona muholo wa yena i ku n'wi dlaya.
23Loko munhu a aka, kutani un'wana a mbindzimuxa leswi akiweke,
xana hivumbirhi va vuyeriwa ha yini handle ka ku xaniseka?
24Loko munhu a katekisa, kutani un'wana a rhuketela,
xana Xikwembu xi ta yingisa wihi ke?
25Loko munhu a khoma ntsumbu, kutani a titengisa hi ku hlamba, kambe a wu khoma nakambe,
xana ku hlamba loku ku n'wi pfuna yini?
26Loko munhu a titsona swakudya hikwalaho ka swidyoho swa yena,
kutani a tlhela a dyoha,
xana i mani loyi a nga ta yingisa swikhongelo swa yena ke?
Xana ku titsongahata ka yena swi n'wi pfuna yini?
