Siraka 2

₁N'wananga, loko u lava ku tirhela HOSI Xikwembu,

tilulamisele ku tiya eku ringiweni.

₂Tshembeka, u tiya, u va u tikhoma

eminkarhini ya makhombo.

₃Tshama eka HOSI Xikwembu, u nga xi tshiki,

leswaku u ta fundzhiwa emakun'wini ya vutomi bya wena.

₄Amukela hinkwaswo leswi swi ku humelelaka,

ni le ka leswi swi ku tsongahataka lehisa mbilu.

₅Tanihi leswi nsuku wu sasekisiwaka hi ndzilo,

vumunhu byi ringiwa hi ku twisiwa ku vava.

₆Tshemba HOSI Xikwembu, kutani xi ta ku pfuna.

Famba etindleleni ta xona, u kholwa eka xona.

₇N'wina mi chavaka HOSI Xikwembu, langutelani tintswalo ta xona,

mi nga tshuki mi xi tshika, mi nga ta wa.

₈N'wina mi chavaka HOSI Xikwembu, xi tshembeni,

mi ta kuma hakelo.

₉N'wina mi chavaka HOSI Xikwembu, langutelani leswinene,

mi ta kuma tintswalo ni ntsako lowu nga heriki.

₁₀Tsundzukani ni vatata wa n'wina, kutani mi tivutisa leswi:

I mani la nga tshama a tshemba HOSI Xikwembu, a va a khomisiwa tingana ke?

I mani la nga tshama a hisekela ku chava HOSI Xikwembu, a va a tshikiwa ke?

I mani la nga tshama a xi vitana, a nga hlamuriwi ke?

₁₁HOSI Xikwembu xi ni tintswalo, xi twela vanhu vusiwana,

xi va rivalela swidyoho swa vona ni ku va ponisa emakhombyeni.

₁₂Va ni khombo lava heleriwaka hi ku tiyisela,

ni vadyohi lava fambaka etindleleni timbirhi!

₁₃Va ni khombo lava helaka mbilu, va hava ni ripfumelo!

Hikokwalaho va ta pfumala xisirhelelo.

₁₄Va ni khombo lava lahlekeriwaka hi ku tiyisela emaxangwini!

Va ta endla yini siku leri Xikwembu xi nga ta va avanyisa ke?

₁₅Lava chavaka HOSI Xikwembu, va nga tshiki ku hlayisa marito ya xona,

kutani lava va xi rhandzaka va famba etindleleni ta xona.

₁₆Lava chavaka HOSI Xikwembu, va xi tsakisa,

kutani lava va xi rhandzaka va tsakisiwa hi milawu ya xona.

₁₇Lava chavaka HOSI Xikwembu, va xi hitekela,

va titsongahata emahlweni ka xona, va ku:

₁₈“A hi weleni emavokweni ya HOSI Xikwembu, hi nga tshuki hi wela emavokweni ya vanhu,

hikuva tanihi ku dzuneka ka xona, tintswalo ta xona na tona i tikulu swinene.”