Siraka 18

₁Loyi a hanyaka hilaha ku nga heriki,

ú vumbile misava hinkwayo.

₂HOSI Xikwembu hi xona ntsena xi nga ta vuriwa la lulameke,

[a ku na xikwembu xin'wana handle ka xona.

₃Xi fambisa misava hi matimba ya xona,

kutani swilo hinkwaswo swi endla ku rhandza ka xona.

N'wini wa swilo hinkwaswo i Xikwembu,

xi hambanisa leswo hlawuleka ni leswi nga hlawulekiki hi matimba ya xona.]

₄A xi nyikanga munhu matimba yo hlamusela mintirho ya xona.

I mani la nga lavisisaka ku enta ka yona?

₅I mani la nga pimaka vukulu ni matimba ya Xikwembu?

I mani la nga paluxaka swiendlo swa tintswalo ta xona?

₆Swi nga ka swi nga endleki ku hunguta kumbe ku engetelela nchumu eka swona,

a swi koteki hambi ku ri ku landzelerisa mahlori ya HOSI Xikwembu.

₇Munhu ú tsandzeka

hambi ku ri ku sungula ku ma hlaya.

₈Munhu i ncini? Ú na ntirho muni?

Swiendlo leswinene ni leswo homboloka swa yena swi vula yini?

₉Malembe ya munhu ma tele ngopfu

loko ma fika eka 100.

₁₀Kambe loko ma pimanisiwa ni nkarhi lowu nga heriki,

ma fana ni thonsi ra mati elwandle kumbe ndzoho ya sava.

₁₁Hikokwalaho HOSI Xikwembu a xi heleli vanhu mbilu,

xi va twela vusiwana.

₁₂Xa swi vona ni ku swi tiva leswaku va fanele ku fa,

kutani xa va rivalela.

₁₃Vanhu va komba tintswalo eka varikwavo ntsena,

kambe HOSI Xikwembu xi tsetselela vanhu hinkwavo.

Xa va laya, ni ku va letela, ni ku va dyondzisa,

xi va vuyisela eka xona tanihi murisi loyi a vuyisaka ntlhambi wa yena ekaya.

₁₄Xi ni tintswalo eka lava amukelaka ku tshinya ka xona,

ni le ka lava hisekelaka ku avanyisa ka xona.

₁₅N'wananga, u nga tseketseli munhu loko u ri karhi u n'wi pfuna,

hambi ku ri ku n'wi tlhava hi marito loko u n'wi nyika xanchumu.

₁₆Tanihi leswi mberha yi timulaka ku hisa,

rito lerinene ri tlula nyiko.

₁₇Hakunene, rito lerinene ri tlula nyiko leyikulu,

kambe eka munhu wa musa, swa kumeka hi vumbirhi bya swona.

₁₈Xiphukuphuku xa kalala ni ku rhukana,

kutani nyiko ya munhu wo gungula yi swirha mbilu ya munyikiwa.

₁₉Tiva swinene leswi u lavaka ku vulavula swona, u nga si vulavula.

Hlayisa miri wa wena, u nga si vabya.

₂₀Tikambe u nga si avanyisiwa hi HOSI Xikwembu,

leswaku loko nkarhi wa ku avanyisiwa wu fika xi ta ku rivalela.

₂₁Titsongahate u nga si vabya,

kutani loko u ri kusuhi ni ku dyoha, hatlisa u hundzuka.

₂₂Loko u hlambanya emahlweni ka HOSI Xikwembu, hatlisa u hetisa ku hlambanya ka wena,

rifu ri nga si ku fikela.

₂₃Tilulamise, u nga si tiboha hi ku hlambanya,

u nga fani ni lava ringaka HOSI Xikwembu.

₂₄Anakanya ku hlundzuka ka xona hi siku ra rifu ra wena,

ni nkarhi wa xona wa ku tirihisela loko xi ku fularhela.

₂₅Enkarhini wa ndzalo anakanya nkarhi wa ndlala,

loko u fumile tsundzuka vusiwana ni vusweti.

₂₆Ku suka nimixo ku fika nimadyambu swilo swa cincacinca,

emahlweni ka HOSI Xikwembu hinkwaswo swi hatlisa ku hundzuka.

₂₇Munhu wa vutlhari ú xiyaxiya hinkwaswo,

loko swidyoho swi n'wi rhendzerile wa tisirhelela eka swiendlo leswo homboloka.

₂₈Munhu un'wana ni un'wana wo tlhariha ú tiva vutlhari,

ú dzunisa ni loyi a byi kumaka.

₂₉Lava twisisaka swivulavulelo va tlhariha,

swivuriso leswi faneleke swi huma eka vona.

₃₀U nga landzeleli ku navela ka wena ka hava,

kambe tshikelela lwasi ra wena.

₃₁Loko u titsakisa hi ku navela ka hava,

valala va wena va ta ku hleka.

₃₂U nga tsakisiwi hi rifuwo ku tlula mpimo,

swi nga ku lovisa.

₃₃U nga tihundzuli mukomberi hi ku endla minkhuvo hi mali yo lomba,

loko u nga ri na nchumu enkwameni.