Siraka 11

₁Vutlhari byi tlakusa xisiwana,

byi xi tshamisisa exikarhi ka tinganakana.

₂U nga tshuki u ndhundhuzela munhu hikwalaho ka ku saseka ka yena,

kumbe ku n'wi nyenyemuka hikwalaho ka ku swarha ka yena.

₃Nyoxi i yitsongo eka swivumbiwa swin'wana leswi hahaka,

kambe vulombe bya yona byi tlula swakudya hinkwaswo hi ku nyanganya.

₄U nga tshuki u tikukumuxa hikwalaho ka swiambalo swa wena swo saseka,

kumbe ku tikurisa siku u tlakusiwaka,

hikuva mintirho ya Xikwembu ya hlamarisa,

naswona yi fihleriwe vanhu.

₅Tihosi leti nga susiwa eswiluvelweni swa tona ti tele,

kutani lava no ehleketiwa va nga ehleketiwi, va ambexiwa swidlodlo swa vuhosi.

₆Vafumi vanyingi va khomisiwe tingana,

ni vavanuna vo tala va ndhuma va werile ehansi ka mfumo wa van'wana.

₇U nga kumi swihoxo u nga si lavisisa mhaka,

rhanga hi ku yi xiyaxiya, kutani u tshinya.

₈U nga kavanyeti munhu a nga si heta ku vulavula,

rhanga hi ku twa leswi a vulaka swona u nga si n'wi hlamula.

₉U nga kanetani ni vanhu emhakeni leyo ka yi nga ri ya wena,

kumbe ku tshama ni vahomboloki loko va ri karhi va tsema mhaka.

₁₀N'wananga, u nga tikarhati hi leswo tala.

Loko u nghena-nghena eka swilo swo tala swi ta ku tikela,

loko u swi landzelela u ta tsandzeka, hambiloko u lava ku swi tshika, u ta hluleka.

₁₁Ku ni loyi a tirhaka hi ku chivirika swinene, kambe a nga kumi nchumu.

₁₂Ku ni munhu wa xisiwana loyi a tirhaka hi ku nonoka,

a ri hava ni matimba,

kambe a tsakisa HOSI Xikwembu,

kutani xi n'wi humesa eku nonon'hweriweni ka yena.

₁₃Loko a tshamisekile,

hinkwavo va n'wi hlamala.

₁₄Leswinene ni leswo biha, vutomi ni rifu,

vusiwana ni rifuwo, swi huma eka Xikwembu.

₁₅[Vutlhari, ni ku twisisa, ni ku tiva nawu wa Xikwembu, ni rirhandzu, ni ku endla leswinene,

hinkwaswo leswi swi huma eka Xikwembu.

₁₆Swidyoho ni munyama swi ve ni vahomboloki ka ha ri eku sunguleni,

kutani lava tsakelaka ku homboloka, va ta va na swona ku kondza va dyuhala.]

₁₇Tinyiko ta HOSI Xikwembu eka vakhongeri hi leti tshamaka ti ri kona minkarhi hinkwayo,

loko xi va tsakela xi va katekisa hilaha ku nga heriki.

₁₈Munhu a nga tifumisa hi ku tirha hi matimba ni ku titsona swilo,

kambe xana swi ta n'wi pfuna yini?

₁₉A nga tibyela a ku: “Sweswi ndzi nga ha tshama ndzi tiphina hi leswi ndzi nga na swona!”

Kambe a nga tivi leswaku ku ta hundza nkarhi muni ku kondza a siyela van'wana rifuwo ra yena, a fa.

₂₀Endla tifanelo ta wena, tirha hi matimba,

tirha ku kondza u dyuhala.

₂₁U nga tshuki u navela leswi vadyohi va endlaka swona.

Titiyise entirhweni wa wena, kutani u tshemba HOSI Xikwembu,

hikuva ku fumisa xisiwana xikan'we-kan'we,

hi ku hatlisa, swa olova eka xona.

₂₂Minkateko ya HOSI Xikwembu i hakelo ya vakhongeri,

kutani xi hatlisa ku va katekisa.

₂₃U nga tshuki u vilela u ku: “Xana i ncini lexi ndzi xi pfumalaka?

Xana ndzi ta katekisiwa ha yini hi nkarhi lowu taka?”

₂₄U nga tibyeli u ku: “Leswi ndzi nga na swona, swi ringene!

Xana i khombo muni leri nga ndzi welaka?”

₂₅Enkarhini wa minkateko, makhombo ma rivariwa,

naswona enkarhini wa makhombo, minkateko a ya ha tsundzukiwi.

₂₆Swa olova eka HOSI Xikwembu

ku hakela munhu esikwini ra ku fa ka yena ku ya hi mahanyelo ya yena.

₂₇Siku leri swiendlo swa yena swi ta paluxiwa emahlweni ka vanhu hinkwavo,

kutani ntsako hinkwawo wa yena wu ta herisiwa hi nkarhinyana lowu wa ku vaviseka.

₂₈Hikokwalaho, u nga vuli munhu leswaku ú katekile, a nga si fa,

hikuva munhu ú tiviwa hi vana va yena.

₂₉U nga tshuki u rhamba mani na mani emutini wa wena,

hikuva vanhu va mano va nga ku kanganyisa hi tindlela leto tala.

₃₀Munhu wa manyunyu ú fana na ntlhamu, a nga ku nghenisa ekhombyeni,

tanihi nhlori ú lava ku kuma laha u tsandzekaka kona.

₃₁Ú ta endla leswaku leswinene swi hundzuka leswo biha,

kutani ú ta kuma swihoxo hambi eka swiendlo leswinene ngopfu.

₃₂Nhlahle yi vanga makala layo tala lama pfurhaka,

kutani muhomboloki ú tumbelela vanhu, a va dlaya.

₃₃Tivonele eka munhu wo tano, hikuva ú le ku lukeni ka mano layo biha,

ú ta ku onhela minkarhi hinkwayo.

₃₄Ku rhurhela muluveri emutini wa wena, swi ta ku vangela mpfilumpfilu,

swi ta ku hambanisa ni ndyangu wa wena.