Pisalema ya 96

₁Yimbelelani risimu lerintshwa mi dzunisa HOSI Xikwembu,

n'wina vanhu va misava hinkwayo, yimbelelani mi xi dzunisa.

₂Yimbelelani mi dzunisa HOSI, mi tlangela vito ra yona;

siku rin'wana ni rin'wana vulani leswaku Xikwembu i muponisi.

₃Hlayelani vanhu hinkwavo ku dzuneka ka HOSI,

matiko hinkwawo a ma tivisiwe mintirho ya yona leyo hlamarisa.

₄HOSI Xikwembu i xikulu, xi dzuneka ngopfu,

xi fanele ku chaviwa ku tlula swikwembu swin'wana hinkwaswo.

₅Swikwembu hinkwaswo swa vamatiko swo va swifaniso ntsena,

kasi HOSI Xikwembu hi xona xi tumbuluxeke matilo.

₆Ku dzuneka ni vukulukumba swi le ka xona,

Tempele ya xona yi tele hi matimba ni ku saseka.

₇N'wina vamatiko, dzunisani HOSI Xikwembu,

tlangelani matimba ya xona.

₈Xi twariseni mi dzunisa vito ra xona,

tanani eTempeleni ya xona mi ri ni swa magandzelo.

₉Korhamani emahlweni ka xona loko xi humelela eku kwetsimeni ka xona,

n'wina vanhu va misava hinkwayo, xi kombeni xichavo.

₁₀Byelani vanhu va matiko hinkwawo mi ku: “HOSI Xikwembu xa fuma,

hikokwalaho misava yi tiyile, a yi tsekatseki;

xi ta avanyisa vanhu hi ku lulama.”

₁₁Matilo a ma tsake, misava a yi be nkulungwana,

lwandle a ri pfume ni hinkwaswo leswi nga ka rona.

₁₂Masimu ni hinkwaswo leswi milaka eka wona a swi tsake,

mirhi hinkwayo a yi yimbelele hi ku tsaka,

₁₃hikuva HOSI Xikwembu xa ta ku ta fuma misava;

xi ta yi avanyisa hi ku lulama, xi fambisa vamatiko entiyisweni wa xona.