Pisalema ya 9

₁We HOSI, ndza ku tlangela hi mbilu ya mina hinkwayo,

ndzi rungulela vanhu mintirho ya wena hinkwayo leyo hlamarisa.

₂Hikwalaho ka wena, ndza tsaka hi ntsako lowukulu,

ndzi yimbelela ndzi dzunisa vito ra wena, wena Xikwembu xa le henhla-henhla.

₃Loko u humelela, valala va mina va tsutsuma,

va khuguka va wa, va fela kwalaho.

₄Wena u yima na mina, u lwela tifanelo ta mina;

u tshamile exitshan'wini xa wena xa vuhosi, u avanyisa hi ku lulama.

₅U tshinyile matiko, u lovisa lavo homboloka,

mavito ya vona u ma herisela makumu.

₆Valala va nyamalalele makumu,

miti ya vona u yi hangalasile, ku sala marhumbi ntsena,

yi nga ka yi nga ha tsundzukiwi hi munhu.

₇Kambe HOSI yi tshama eku fumeni ka yona hilaha ku nga heriki,

yi yimisile xitshamu xa yona xa vuavanyisi;

₈kutani yi fuma misava hi ku lulama,

yi avanyisa vanhu hi ntiyiso.

₉HOSI i khokholo ra lava xanisiwaka,

eminkarhini ya makhombo, va tumbela kona.

₁₀Vanhu lava tivaka vito ra wena, we HOSI, va titshembela wena,

hikuva a wu fularheli lava fambaka va ku lava.

₁₁Yimbelelani mi dzunisa HOSI leyi fumaka yi ri eSiyoni,

rungulani mintirho ya yona ematikweni!

₁₂Xikwembu a xi rivali vapfumari,

ku rila ka vona xa ku twa,

xi rihiseta lava va va dlayaka.

₁₃We HOSI, ndzi twele vusiwana,

languta ku xanisiwa ka mina hi lava va ndzi vengaka,

ndzi tlakule u ndzi susa etinyangweni ta rifu,

₁₄leswaku ndzi ta tlhela ndzi yima etinyangweni ta Siyoni,

ndzi byela vanhu hinkwaswo leswi ndzi ku dzuniselaka swona,

ndzi tsaka hi leswi u ndzi poniseke.

₁₅Vamatiko va hojomerile ekheleni leri va ri celeke;

ntlhamu lowu a va wu rhiyile, wu tlhele wu phasa milenge ya vona.

₁₆HOSI yi titivisile,

hi ku avanyisa ka yona loku lulameke:

Lavo homboloka va phasiwile

hi swiendlo swa vona vinyi.

₁₇Lavo homboloka va kongoma exivandleni xa vafi,

va nga vamatiko hinkwavo lava nga riki na mhaka na Xikwembu.

₁₈Vapfumari va nga ka va nga rivariwi minkarhi hinkwayo,

ni ku tshemba ka swisiwana ku nga ka ku nga heleli makumu.

₁₉We HOSI, suka u yima, ku nga vi na munhu la ku kulelaka;

matiko a ma te emahlweni ka wena, ma ta avanyisiwa.

₂₀We HOSI, chavisa vamatiko, va ta tiva leswaku vo va vanhu ntsena!