Pisalema ya 86

₁We HOSI ndzi yingise u ndzi hlamula,

hikuva ndzi xisiwana, ndza pfumala.

₂Sirhelela vutomi bya mina,

hikuva ndzi nandza wa wena loyi a tshembekeke;

ndzi ponise, hikuva ndza ku tshemba,

u Xikwembu xanga.

₃We N'wini wanga ndzi twele vusiwana,

hikuva ndzi huwelela eka wena nhlekanhi hinkwawo.

₄We N'wini wanga, ndzi tsakise, hikuva ndzi nandza wa wena,

ndzi tlakusa mahlo ndzi languta eka wena.

₅U ni vunene we N'wini wanga, naswona wa rivalela,

hinkwavo lava va ku khongelaka wa va rhandza.

₆We HOSI, rhiya ndleve u yingisa xikhongelo xa mina;

loko ndzi kombela ku pfuniwa, u nga ndzi miyeleli.

₇Siku leri ndzi welaka ekhombyeni, ndzi huwelela eka wena,

hikuva u hlamula swikhongelo swa mina.

₈Exikarhi ka swikwembu, ku hava lexi fanaka na wena we N'wini wanga,

hambi mintirho ya wena a yi pimanisiwi na yin'wana.

₉Vanhu hinkwavo lava u va vumbeke, va ta ku nkhinsamela we HOSI,

va dzunisa vito ra wena.

₁₀Wena u nkulukumba, naswona u endla swilo leswo hlamarisa.

Hakunene, hi wena ntsena u nga Xikwembu.

₁₁We HOSI, ndzi dyondzise tindlela ta wena,

leswaku ndzi ta famba entiyisweni;

mbilu ya mina a yi lave xilo xin'we ntsena,

ku nga ku xixima vito ra wena.

₁₂We Xikwembu N'wini wanga, ndza ku nkhensa hi mbilu ya mina hinkwayo,

ndzi ta twarisa vito ra wena hilaha ku nga heriki,

₁₃hikuva u ndzi kombile rirhandzu lerikulu,

u ndzi kutsurile u ndzi humesa exivandleni xa vafi.

₁₄We Xikwembu, vanhu lava tikurisaka va ndzi hlasela,

ntlawa wa swigevenga wu lava ku ndzi dlaya;

vanhu lava a va na mhaka na wena!

₁₅Kambe wena N'wini wanga, u Xikwembu lexi twelaka vanhu evusiwana;

wa va tsetselela, u hlwela ku kariha, u tele tintswalo ni ku tshembeka.

₁₆Hundzuluka u ndzi languta, u ndzi twela vusiwana;

ndzi nyike matimba u ndzi ponisa,

hikuva ndzi vile nandza wa wena ku sukela evuhlangini bya mina.

₁₇Ndzi nyike xikombiso xa leswaku wa ndzi tsakela,

kutani lava va ndzi vengaka va ta khoma hi tingana loko va swi vona,

hikuva wena HOSI u ta va u ndzi pfunile, u ndzi tiyisa.