Pisalema ya 81

₁Yimbelelani mi dzunisa Xikwembu lexi xi hi nyikaka matimba,

banani minkulungwana mi tlangela Xikwembu xa va ka Yakobo.

₂Sumani risimu mi ba swigubu,

chayani swipendana ni tiharipa.

₃Banani mhalamhala loko n'weti wu tshama,

ni loko wu ba mahlampfu esikwini ra nkhuvo wa hina.

₄Lexi i xiletelo eka Vaisraele,

wu nga nawu lowu wu humaka eka Xikwembu xa va ka Yakobo.

₅Xikwembu xi wu nyikile va ka Yosefa,

siku xi humeke ku ya lwa ni tiko ra Egipta.

Ndzi twa rito leri ndzi nga ri tiviki leri nge:

₆“Ndzi mi rhurile ndzhwalo emakatleni,

mavoko ya n'wina a ma ha tikeriwi hi nchumu.

₇Mi huwelerile eka mina mi ri emaxangwini, kutani ndzi mi lamulerile;

ndzi mi hlamurile ndzi ri emapapeni lama dzindzaka,

ndzi mi kamberile eswihlobyeni swa Meriba.

₈N'we vanhu va mina, yingisani loko ndzi mi khongotela,

a ndzi ta tsaka ngopfu loko mi ndzi twa, n'wina Vaisraele!

₉Mi nga tshuki mi tirhela swikwembu swin'wana,

mi nga nkhinsameli swikwembu swa vanhu vambe.

₁₀Hi mina HOSI Xikwembu xa n'wina

lexi xi mi humeseke etikweni ra Egipta:

kangatelani mavoko ya n'wina, ndzi ta mi phamela.

₁₁“Kambe Vaisraele vanhu va mina a va ndzi yingisanga,

a va vanga na mhaka na mina.

₁₂Hikokwalaho ndzi va tshikile va tiendlela hi ku rhandza,

va endla leswi tinhloko ta vona ti va byelaka swona.

₁₃A ndzi ta tsaka ngopfu loko Vaisraele vanhu va mina va ndzi yingisa,

va famba etindleleni ta mina.

₁₄A ndzi ta hatla ndzi tlakusa voko ra mina,

ndzi ba valala va vona ndzi va wisela hansi.

₁₅Lava va ndzi vengaka mina HOSI, a va ta nkhinsama emahlweni ka n'wina Vaisraele,

va endlisa sweswo minkarhi hinkwayo.

₁₆Kambe n'wina a ndzi ta mi phamela vuswa bya xibasa,

ni vulombe byo huma ebakweni ra maribye, mi dya byona mi xurha.”