Xikhongelo xo kombela ku rivaleriwa
Risimu ra Muyimbelerisi. Pisalema ya Davhida, leyi a yi yimbeleleke endzhaku ka loko muprofeta Natani a yile eka yena ku ya n'wi tshinya, hi leswi a a etlele na Batixeba.
1We Xikwembu, ndzi twele vusiwana hikwalaho ka rirhandzu ra wena;
susa milandzu ya mina, hikwalaho ka tintswalo ta wena letikulu.
2Ndzi hlantswe swinene u ndzi basisa,
u susa ku homboloka ka mina ni ku dyoha ka mina.
3Milandzu ya mina, ndza yi tiva,
ndzi tsundzuka swidyoho swa mina minkarhi hinkwayo.
4Ndzi dyoherile wena, wena ntsena,
ndzi endlile leswo biha emahlweni ka wena;
hikokwalaho loko u ndzi avanyisa u ndzi ba,
a wu nga vi na nandzu, u ta va u nga hoxanga.
5Hakunene, ndzi velekiwile eku hombolokeni,
ni mana wa mina ú ndzi tswarile eku dyoheni.
6Wena u tsakelaka munhu la nga ni ntiyiso embilwini ya yena,
ndzi dyondzise vutlhari exihundleni xa mina.
7Ndzi xuve hi xitluka xa murhi wa hisopa, kutani ndzi ta va la tengeke,
ndzi hlantswe, ndzi ta basa ku tlula ni gamboko.
8Ndzi byele marito ya ntsako ni ku rhula,
hambileswi u ndzi tshoveke swirho, sweswi ndzi tsakise.
9Swidyoho swa mina u nga ha swi languti,
susa ku homboloka ka mina hinkwako.
10We Xikwembu, vumba endzeni ka mina mbilu leyo tenga,
u tlhela u pfuxa moya wo lulama endzeni ka mina.
11U nga ndzi cukumeteli kule na wena,
u nga ndzi tekeli Moya wa wena lowo kwetsima.
12Tlhela u ndzi nyika ntsako, wena Muponisi wanga,
ndzi seketele, u pfuxa moya wa malwandla eka mina.
13Ndzi ta dyondzisa vadyohi tindlela ta wena,
lavo homboloka va ta tlhelela eka wena.
14We Xikwembu, wena Muponisi wanga, ndzi humese enandzwini wa ngati leyi halatiweke,
kutani ndzi ta yimbelela ndzi ku twarisa, wena Mukutsuri.
15We N'wini wanga, pfula nomo wa mina,
ndzi ta ku dzunisa ha wona.
16Ku humeseriwa magandzelo a wu swi lavi;
hambi ndzi nga ku hisela wona, ma nga ka ma nga ku tsakisi.
17We Xikwembu, ganzelo leri u ri amukelaka i moya lowu vavisekeke;
we Xikwembu, mbilu leyi tlhavekeke, leyi nga ni gome, a wu nga yi fularheli.
18Hikwalaho ka tintswalo ta wena, katekisa muti wa Siyoni,
u pfuxa rirhangu ra Yerusalema,
19kutani magandzelo hinkwawo lamanene lama hisiwaka ma ta ku tsakisa,
ni tinkuzi ti ta humesiwa ti yisiwa alitarini ya wena.
