Pisalema ya 48

₁HOSI Xikwembu xa hina i Xikwembu lexikulukumba,

xi dzuneka ngopfu emutini lowu wu nga wa xona,

entshaveni ya xona leyo hlawuleka;

₂xiyimo xa ntshava ya Siyoni a hi ku saseka ka xona,

vanhu va misava hinkwayo va tsakela yona,

hikuva muti wa Mufumi wa hinkwaswo wu le ka yona,

hi yona “Ntshava-ya-le-N'walungwini”.

₃Xikwembu xi le ndzeni ka makhokholo ya yona,

xi tiveka xi ri mulweri wa yona.

₄Vonani hilaha tihosi ti hlengeletaneke hakona,

ti tela ku ta hlasela ntshava ya Siyoni;

₅kambe loko ti yi vona, ti hlamala swinene,

ti chava, ti hangalaka,

₆ti ri karhi ti rhurhumela,

ni ku vaviseka kukota wansati loko a veleka,

₇kumbe tingalava ta le Tarxixi

loko ti fayeteriwa hi bubutsa ra le vuxeni.

₈Leswi hi tshamaka hi byeriwa swona, sweswi hi swi vona hi mahlo

swi humelela emutini wa HOSI ya matimba hinkwawo,

wu nga muti wa Xikwembu xa hina

lowu xi wu tiyiseke, wu va kona hilaha ku nga heriki.

₉We Xikwembu, hi anakanya hi vuntshwa rirhandzu ra wena lero tshembeka,

hi ri eTempeleni ya wena.

₁₀Ku dzuneka ka wena ku tate misava, we Xikwembu;

vito ra wena ri tiveka hinkwako.

U tirha hi ku lulama ntsena.

₁₁Hikokwalaho ntshava ya Siyoni a yi tsake;

ku avanyisa ka wena a ku tsakise

miti hinkwayo ya tiko ra Yuda.

₁₂Famba-fambani, mi rhendzeleka ni muti wa Siyoni,

mi hlaya ni swihondzo swa wona;

₁₃xiyaxiyani rirhangu ra wona,

mi nghena ni le makhokholweni ya wona,

mi ta kota ku hlayela vana va n'wina mi ku:

₁₄“Lexi hi xona Xikwembu,

Xikwembu xa hina hilaha ku nga heriki;

xi ta hi komba tindlela minkarhi hinkwayo.”