Munhu ú hombolokile, kambe Xikwembu xona xi lulamile
Risimu ra Muyimbelerisi. Pisalema ya Davhida nandza wa HOSI.
1Marito layo biha ya munhu wo homboloka
a ma suki embilwini ya mina:
Hi ku vona ka yena,
a swi pfuni nchumu ku chava Xikwembu.
2Ú tivona a lulamile ngopfu,
kutani loko swidyoho swa yena swi tshuka swi paluxiwa, a nga swi vengi.
3Leswi a swi vulavulaka i mavunwa ni ku kanganyisa ntsena;
ku tiva ni ku endla leswinene, ú swi tshikile khale.
4Hambi a etlele nivusiku, ú le ku lukeni ka mano layo biha,
a hlawula ndlela leyi nga riki yona,
a nga fularheli leswo biha.
5We HOSI, rirhandzu ra wena ri fika ni le matilweni,
ku tshembeka ka wena ku tlakukile ku fika emapapeni.
6Ku lulama ka wena ku fana ni tintshava letikulu,
ku avanyisa ka wena ku entile kukota swidziva swa lwandle,
we HOSI, u hlayisa vanhu ni swiharhi.
7We Xikwembu, rirhandzu ra wena lero tshembeka ri tsakisa ngopfu,
vanhu hinkwavo va tumbela ehansi ka timpapa ta wena.
8Va hanya endzalweni ya leswi u va phamelaka swona;
u va nwisa ni mati layo nandziha enambyeni wa wena,
9hikuva hi wena u nga xihlovo lexi xi hi nyikaka vutomi,
kutani hi voningiwa hi ku vonakala ka wena.
10We HOSI, u nga tshiki ku komba rirhandzu ra wena lero tshembeka eka lava va ku tivaka,
u nga karhali ku lwela vanhu va timbilu leto lulama.
11U nga pfumeli leswaku lava tikurisaka va nghena emutini wa mina,
ni leswaku lavo homboloka va ndzi humesa eka wona.
12Languta laha lavo homboloka va weleke kona:
Va wisiwile, va nge he pfuki!
