Pisalema ya 3

₁We HOSI, valala va mina a hi ku tala ka vona,

va tele lava ndzi pfukelaka!

₂Va tele lava vulavulaka hi mina, va ku:

“Xikwembu xi nga ka xi nga n'wi pfuni!”

₃Kambe we HOSI, u xitlhangu xa mina matlhelo hinkwawo,

ndzi tidzunisa hi wena, hi wena u ndzi nyikaka xiyimo.

₄Ndzi tlakusa rito ndzi huwelela eka HOSI,

kutani yi ndzi hlamula yi ri entshaveni ya yona leyo hlawuleka.

₅Ndzi tilatile ehansi, ndzi etlela,

kambe ndzi tlhele ndzi pfuka, hikuva HOSI ya ndzi seketela.

₆A ndzi chavi vanhu va madzana-dzana

lava ndzi jameleke matlhelo hinkwawo.

₇Pfuka, we HOSI! Xikwembu xanga, ndzi ponise,

wena u baka valala va mina hinkwavo emarhameni,

wena u tshovaka meno ya lavo homboloka!

₈Ku ponisa ku huma eka wena HOSI,

minkateko ya wena a yi ve ehenhla ka vanhu va wena!