Pisalema ya 24

₁Misava ni hinkwaswo leswi nga ka yona i swa HOSI Xikwembu;

matiko ni hinkwavo lava akeke eka wona i swa xona.

₂Xi andlarile misava ehenhla ka mati ya le hansi,

xi yi tiyisile ehenhla ka swidziva.

₃Xana i vamani lava nga ta tlhandlukela entshaveni ya HOSI Xikwembu xana?

Lava nga ta yima endhawini ya xona leyo hlawuleka i vamani xana?

₄Hi lava nga ni timbilu to basa ni mavoko lama tengeke,

lava nga naveliki swilo swa hava,

lava nga hlambanyiki hi ku xisa.

₅Vanhu vo tano, HOSI Xikwembu xi ta va katekisa,

xi ta va lwela, xona xi nga muponisi wa vona.

₆Vanhu volavo va navela HOSI,

va tsakela vukona bya xona Xikwembu xa va ka Yakobo.

₇N'wina tinyangwa, tlakukani swinene,

pfulekani, n'wina timbanti ta khale,

leswaku mufumi wo dzuneka a ta kota ku nghena.

₈Mufumi wo dzuneka i mani xana?

I HOSI, Xikwembu xa matimba lamakulu,

xona xi nga nhenha etinyimpini.

₉N'wina tinyangwa, tlakukani swinene,

pfulekani, n'wina timbanti ta khale,

leswaku mufumi wo dzuneka a ta kota ku nghena.

₁₀Mufumi wo dzuneka i mani xana?

I HOSI, Xikwembu xa matimba hinkwawo!

Hi xona xi nga mufumi wo dzuneka!