Pisalema ya 21

₁Mufumi wa tiko ú tsakisiwa hi matimba ya wena we HOSI,

ú tsake ngopfu, hikuva u n'wi pfunile ku hlula valala va yena.

₂Leswi a a swi navela, u n'wi nyikile,

u wu n'wi tsonanga leswi a swi kombeleke.

₃U tile eka yena, u n'wi katekisa swinene,

u n'wi tlhandlekile xidlodlo xa nsuku wo tenga enhlokweni.

₄Ú komberile vutomi eka wena, kutani u n'wi nyikile,

u n'wi andzisele ni masiku ya ku hanya.

₅Ku dzuneka ka yena i kukulu, hikuva u n'wi pfunile,

u n'wi nyikile ndzhuti ni ku chaviseka.

₆Hi wena u endleke leswaku a kateka minkarhi hinkwayo,

a tshama a tsakile emahlweni ka wena.

₇Mufumi wa tiko ú tshemba HOSI, Xikwembu xa le henhla-henhla,

a nga ka a nga khuguriwi a wa, hikuva xa n'wi sirhelela hi rirhandzu ra xona lero tshembeka.

₈Ú ta hlula valala va yena hinkwavo,

ni lava va n'wi vengaka, ú ta va hangalasa.

₉Loko u humelela we mufumi, u ta fana ni malangavi ya ndzilo,

HOSI Xikwembu a xi herise valala va wena,

xi va hisa hi ndzilo wa vukari bya xona.

₁₀Vana ni vatukulu va vona, u ta va herisa laha misaveni,

a ku nga poni na un'we wa vona.

₁₁Vanhu va nga hlengeletana endhawini yin'we va boha makungu ya ku lwa na wena,

kambe va nga ka va nga humeleli,

₁₂hikuva wena u ta va hlongorisa,

u va copa tinhloko hi miseve.

₁₃We Hosi komba matimba ya wena,

leswaku hi ta yimbelela, hi tlangela vunhenha bya wena.