Pisalema ya 19

₁Matilo ma karhi ma vula ku dzuneka ka Xikwembu,

mpfhuka wu twarisa ntirho wa mavoko ya xona.

₂Siku ri kanela swona na rin'wana siku,

vusiku byi vikela byin'wana vusiku evutlhari bya kona.

₃A swi na ririmi kumbe marito,

ni mpfumawulo a swi na wona;

₄kambe ku vulavula ka swona ku hangalaka emisaveni hinkwayo,

ni marungulo ya swona ma fika evugimamusi.

Kona kwale, Xikwembu xi dzimele dyambu entsonga:

₅Loko ri huma, ri fana ni muteki la pfukaka endlwini ya yena;

ri khoma ndlela ya rona ri tsakile kukota wanuna wa xitsutsumi emphikisanweni;

₆ri tlhava lomu matilo ma sungulaka kona,

ri rhendzeleka ri ya tlomuta laha ma helelaka kona;

a ku na nchumu lowu nga balekaka ku hisa ka rona.

₇Nawu wa HOSI wu hetisekile, wu hanyisa moya;

switsundzuxo swa yona swi tiyile, swi tlharihisa vo kala mano.

₈Swiletelo swa HOSI swi lulamile,

swi tsakisa mbilu;

swileriso swa yona swi tengile,

swi hanyanyisa mahlo;

₉ku chava HOSI i mhaka leyinene,

leyi nga ta ka yi nga heli;

leswi HOSI yi swi bohaka i ntiyiso,

swi lulamile hinkwaswo ka swona;

₁₀swi navetisa ku tlula ni nsuku,

hambi wu ri lowo tala, lowu tengeke;

swi tsokombela ku tlula ni vulombe,

hambi byi ri lebyi tshonaka exihlengeni.

₁₁Hi swona leswi swi ndzi tsundzuxaka, mina nandza wa wena;

ku hlayisa swona swa ndzi vuyerisa swinene.

₁₂I mani loyi a nga vonaka swihoxo swa yena xana?

Ndzi basise eka milandzu leyi tumbeleke.

₁₃Ndzi papalatise swidyoho swa lava titshembaka,

swi nga tshuki swi ndzi fuma, mina nandza wa wena;

kutani ndzi ta va ndzi nga ri na nandzu,

ndzi ta va ndzi ponile eka vudyoho lebyikulu.

₁₄Marito ya mina ni miehleketo ya mina, a swi ve leswi amukelekaka emahlweni ka wena,

we HOSI, wena u nga ribye ra mina ra vutumbelo, ni mukutsuri wanga.