Pisalema ya 18

₁Ndza ku rhandza we HOSI, wena matimba ya mina.

₂HOSI i vutumbelo bya mina, i khokholo ranga ni mukutsuri wanga,

i Xikwembu xa mina, ni ribye ranga leri ndzi tumbelaka eka rona;

i xitlhangu xa mina, lexi nga ni matimba ya ku ndzi ponisa,

naswona i khokholo ra mina.

₃A ku dzunisiwe HOSI!

Ndzi huwelela eka yona, kutani ndzi ponisiwa eka valala va mina.

₄Mapindzi ya rifu a ma ndzi tsondzerile,

ni maboboma lama lovisaka a ma ndzi khukhurile.

₅Xivandla xa vafi a xi ndzi phasa-phasile hi tinghole ta xona,

rifu a ri ndzi rhiyele ntlhamu wa rona.

₆Emaxangwini ya mina, ndzi vitanile HOSI,

ndzi huwelela eka Xikwembu xanga;

kutani xi twile rito ra mina xi ri eTempeleni ya xona;

loko ndzi rila eka xona, xi ndzi twile.

₇Kavaloko misava yi ninginika, yi tsekatseka,

kutani masungulo ya tintshava ma rhurhumela ni ku gudlagudla,

hikuva HOSI a yi pfurha hi vukari.

₈Tinhompfu ta yona ti huma musi,

ni nomo wa yona wu huma ndzilo lowu herisaka,

makala lama vuvumelaka ma huma eka yona.

₉Kutani HOSI yi ovela matilo ehansi, yi rhelela

yi tlhandlekile milenge ehenhla ka papa ra ntima,

₁₀yi khandziya golonyi ya mapapa, yi haha ha yona,

yi rhelela yi ri etimpapeni ta moya.

₁₁HOSI yi tisiva hi xinyami matlhelo hinkwawo,

ehenhla ka yona ku ri ni mapapa lamakulu ya ntima, yo tala mati.

₁₂Rihati ri vangama emahlweni ka yona emapapeni,

ku huma xihangu ni makala lama vuvumelaka;

₁₃kutani HOSI yi bonga yi ri etilweni,

Xikwembu xa le henhla-henhla xi huwelela hi rito lerikulu,

xi humesa xihangu ni makala lama vuvumelaka.

₁₄HOSI yi copa valala hi miseve ya yona,

yi va hangalasa,

yi vangamisa rihati,

yi va hlanganisa tinhloko.

₁₅Ehansi ka lwandle, ka vonaka,

siku u karihelaka valala va wena, we HOSI;

masungulo ya misava ma fununguriwa,

siku vukari bya wena byi bulukaka.

₁₆HOSI yi tshambulutile voko ra yona yi ri ehenhla, yi ndzi khoma,

yi ndzi humesa exidziveni.

₁₇Yi ndzi ponisile emavokweni ya nala wa mina wa matimba,

ni ka lava a va ndzi venga,

hikuva a va ndzi tlula hi ntamu.

₁₈A va ndzi sivelerile loko ndzi ri ekhombyeni,

kambe HOSI yi ndzi seketerile.

₁₉Yi ndzi ntshunxile, yi ndzi lamulela,

hikuva ya ndzi tsakela.

₂₀HOSI yi ndzi nyikile leswi yelanaka ni mintirho ya mina leyo lulama;

yi ndzi hakerile leswi ringanaka ni ku tenga ka mavoko ya mina,

₂₁hikuva ndzi fambile etindleleni ta HOSI,

ni ku xi dyohela a ndzi xi dyohelanga, Xikwembu xa mina;

₂₂swileriso swa xona hinkwaswo, ndzi swi hlayisile,

ni milawu ya xona, a ndzi yi tlulanga.

₂₃HOSI a yi kumanga nandzu eka mina,

hikuva ku dyoha, a ndzi ku chava ngopfu.

₂₄Hikokwalaho, HOSI yi ndzi hakerile

leswi yelanaka ni ku lulama ka mina,

ni ku tenga loku yi ku voneke emavokweni ya mina.

₂₅We HOSI, u tshembekile eka loyi a tshembekaka;

a wu veki nandzu eka munhu loyi a nga riki na nandzu.

₂₆U komba ku tenga ka wena eka loyi a tengeke;

kambe u komba ku tlhariha ka wena eka loyi a endlaka leswo homboloka.

₂₇Hi wena la ponisaka vaxaniseki,

kambe u tsongahata lava tikurisaka.

₂₈Hakunene, hi wena la ndzi lumekelaka rivoni!

We HOSI Xikwembu xa mina, wa ndzi voningela exinyamini.

₂₉Hi ku pfuniwa hi wena, ndzi nga pyanyetela ntlawa wa vahlaseri.

Hi matimba ya wena Xikwembu xanga, rirhangu, ndzi nga ri tlula.

₃₀Tindlela ta Xikwembu ti hetisekile;

leswi HOSI yi swi vulaka, swi kumeka swi tiyile;

hi yona xitlhangu xa hinkwavo lava tumbelaka eka yona.

₃₁I mani la nga Xikwembu,

loko ku nga ri HOSI ke?

Ribye ra vutumbelo i mani,

ehandle ka Xikwembu xa hina xana?

₃₂Hi xona Xikwembu lexi xi ndzi haverisaka matimba,

lexi xi ndzi pfulelaka ndlela yo fambeka swinene.

₃₃Xi vevukisa milenge ya mina ku fana ni ya timhunti,

xi ndzi tiyisa eka xiyimo xa mina xa le henhla.

₃₄Xi ndzi dyondzisa malwele ya nyimpi,

mavoko ya mina ma kondza ma kota ku konga vurha bya koporo.

₃₅We HOSI, u ndzi tamerisa xitlhangu ku nga ku ponisa ka wena;

voko ra wena ra xinene ra ndzi seketela,

wa ndzi kurisa, loko u tikarhatela mina.

₃₆U ndzi boxela ndlela yo anama yo famba ha yona,

kutani milenge ya mina a yi rhetemuki.

₃₇Ndzi hlongorisa valala va mina ndzi kondza ndzi va kuma,

a ndzi vuyi ndzi nga si va herisela makumu.

₃₈Ndzi va fayetela, kutani va tsandzeka ku pfuka,

ndzi va wisa, ndzi va kandziyela.

₃₉U ndzi haverisa matimba ya ku ya enyimpini,

u sindzisa lava a va lwa na mina ku ndzi nkhinsamela.

₄₀U endla leswaku valala va mina va ndzi komba xikosi,

kutani lava va ndzi vengaka, ndza va herisa!

₄₁Va tlhava mukhosi, kambe a ku na loyi a va lamulelaka;

va huwelela eka HOSI, kambe a yi va hlamuli.

₄₂Ndzi va sila ku fana ni ritshuri leri hahisiwaka hi moya;

ndzi va kuha kukota ndzhope egondzweni.

₄₃U ndzi kutsurile, loko tiko ri ndzi pfukela;

u ndzi vekile ku va mufambisi wa matiko,

kutani vanhu lava a ndzi nga va tivi,

sweswi i malandza ya mina.

₄₄Kan'we kan'we loko va twa ta mina, va tinyiketa eka mina,

vanhu vambe va ta eka mina va tilondlile,

₄₅va hela matimba,

va huma hi ku rhurhumela emakhokholweni ya vona.

₄₆HOSI Xikwembu xa hanya, a ku dzunisiwe xona xi nga ribye ra mina ra vutumbelo,

a ku twarisiwe Xikwembu lexi xi ndzi ponisaka.

₄₇Hi xona Xikwembu lexi xi ndzi rihiselaka,

lexi sindzisaka matiko ku va ehansi ka mina.

₄₈We Xikwembu, wa ndzi ntshunxa emavokweni ya valala va mina,

hakunene u ndzi pfuna ku hlula lava lwaka na mina,

u ndzi lamulela eka vanhu va tihanyi.

₄₉Hikokwalaho, we HOSI, ndzi ta ku twarisa exikarhi ka vamatiko,

ndzi ta yimbelela tinsimu ndzi dzunisa vito ra wena.

₅₀HOSI Xikwembu xi nyika ku hlula lokukulu

eka loyi xi n'wi vekeke ku va hosi,

xi komba tintswalo ta xona leto tshembeka

eka Davhida muhlawuriwa wa xona,

ni ka vatukulu va yena hilaha ku nga heriki.