Pisalema ya 16

₁We Xikwembu, ndzi hlayise,

hikuva hi wena khokholo na mina.

₂Eka HOSI, ndzi ri: “Hi wena n'wini wa mina,

a ndzi kumi ntsako loko ku nga ri ha wena ntsena.”

₃Loko swi ri swikwembu leswi va nge “swi hlawulekile” laha tikweni,

ni leswi va nge “swi ni matimba”,

leswi khale a ndzi swi tsakela, ndzi ri,

₄lava tsutsumelaka eka swona,

va tivangela maxangu layo tala;

mina ndzi nga ka ndzi nga swi phahli hi ngati,

hambi ma ri mavito ya swona, a ndzi nga ma kumbuki.

₅We HOSI, hi wena ndzhaka leyi ndzi averiweke yona,

hi wena u ndzi timulaka torha;

vutomi bya mina byi fumbarheriwile hi wena.

₆Ndzi averiwile vutshamo etindhawini leti tsakisaka,

ina, ndzi nyikiwile ndzhaka yo saseka ngopfu.

₇Ndzi tlangela HOSI, yona leyi yi ndzi letelaka;

nivusiku ripfalo ri ndzi tsundzuxa ta yona.

₈Minkarhi hinkwayo, ndzi rhangisa HOSI emahlweni ka mina;

ndzi nga ka ndzi nga tsekatseki, hikuva yi le vokweni ra mina ra xinene.

₉Hikokwalaho, mbilu ya mina yi tsakile, nomo wa mina wu ba nkulungwana,

na wona miri wa mina wu titwa wu hlayisekile.

₁₀We HOSI, a wu nga ndzi nyiketi exivandleni xa vafi,

a wu nga ndzi yisi enon'weni wa sirha, mina ndzi ku khongelaka.

₁₁U ndzi komba ndlela ya vutomi,

laha u nga kona, ntsako wa khapa;

evokweni ra wena ra xinene,

ka tiphiniwa hilaha ku nga heriki.