Pisalema ya 127

₁Loko yindlu yi nga akiwi hi HOSI,

ntirho wa vaaki a wu pfuni nchumu.

Loko muti wu nga rindziwi hi HOSI,

valanguteri va rindzela mahala.

₂A swi pfuni nchumu ku hubuta u tirha,

u titsona ni vurhongo nimadyambu, u xanisekela ku kuma swakudya,

hikuva HOSI Xikwembu xi nyika lava xi va rhandzaka,

hambiloko va etlele.

₃Vana va xinuna i nyiko yo huma eka HOSI,

hakunene ku va ni vana i nkateko.

₄Vana va xinuna lava munhu a va kumaka loko a ha tiyile,

va fana ni miseve evokweni ra nhenha:

₅Ku katekile wanuna

loyi nkotloto wa yena wu taleke hi miseve ya kona.

Vanhu vo tano va nge chavi nchumu,

loko va kanetana ni valala ehubyeni.