Pisalema ya 125

₁Lava tshembaka HOSI Xikwembu,

va fana ni ntshava ya Siyoni,

leyi nga tsekatsekiki,

leyi tiyeke hilaha ku nga heriki.

₂Tanihi tintshava leti rhendzelaka muti wa Yerusalema,

HOSI Xikwembu xi rhendzele vanhu va xona sweswi ni masiku hinkwawo.

₃Lavo homboloka va nga ka va nga yi emahlweni

va fuma tiko leri nyikiweke lavo lulama;

ehandle ka swona, lavo lulama lava

va nga tshuka va ringiwa va endla leswo biha.

₄We HOSI, katekisa vanhu lavo lulama,

lava navelaka hi mbilu hinkwayo ku endla leswinene.

₅Kambe lava fambaka hi tindlela leto homboloka,

va hlongole we HOSI swin'we ni lava endlaka leswo biha.

Ku rhula a ku ve na Vaisraele!